ថវិការជាទឹកប្រាក់ដុល្លាអាមេរិកឬប្រាក់រៀលសរុបប្រមាណ២០ម៉ឺនដុល្លាអាមេរិកត្រូវបានសប្បុរសជននានាប្រគល់ជួនឯកឧត្តម បណ្ឌិត សុខ អាន ឧបនាយករដ្ឋមន្រ្តី រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី កាលពីព្រឹកថ្ងៃទី២២ ខែកញ្ញា ឆ្នាំ២០១២សំរាប់ការងារកាកបាទក្រហមកម្ពុជា ។
នៅក្នុងពិធីអបអរទិវាពិភពលោកកាកបាទក្រហម អឌ្ឍច័ន្ទក្រហម ៨ ឧសភា ឆ្នាំ២០១២ដែលប្រារព្ធធ្វើនៅទីរួមខេត្តតាកែវ ឯកឧត្តម បណ្ឌិត សុខ អាន បានមានប្រសាសន៍រំលឹកអំពីតួនាទីដ៏សកម្មរបស់លោកជំទាវ កិតិ្តព្រឹទ្ធបណ្ឌិត ប៊ុន រ៉ានីហ៊ុនសែន ប្រធានកាកបាទក្រហមកម្ពុជា ក្នុងបុព្វហេតុមនុស្សធម៌។
ឯកឧត្តម បណ្ឌិត សុខ អានបានមានប្រសាសន៍ឱ្យដឹងថា ដោយសារតែការជួយ ប្រជាពលរដ្ឋមិនខ្លាចនឿយហត លោកជំទាវ កិត្តិព្រឹទ្ធបណ្ឌិត បានទទួលឋានៈជាវីរៈជនឆ្នើមប្រចាំតំបន់អាស៊ីប៉ាស៊ីហ្វីកប្រ ឆាំងនឹងជងឺអេដស៍។ក្រៅពីនេះអង្គការសហប្រជាជាតិក៏បានប្រគល់ឋានៈជាវីរៈជនឆ្នើមក្នុងការងារជួយកុមារ និង ស្រ្តីផងដែរ។
ឯកឧត្តម បណ្ឌិត សុខ អាន ជាមួយនិងការថ្លែងកោតសរសើរសកម្មភាពសាខាកាកបាទក្រហមកម្ពុជា ខេត្តតាកែវ ដែលបានបំពេញការងារមនុស្សធម៌បានល្អ និងទាន់ពេលឯកឧត្តម បានមានប្រសាសន៍ ផ្តល់ជាអនុសាសន៍ឱ្យក្រុមយុវជនកាកបាទក្រហមខេត្តតាកែវដែលមានចំនួន២៦៦១នាក់ក៏ដូចជាយុវជនកាយរិទ្ធខេត្តតាកែវបង្កើតសកម្មភាពចុះទៅជួយប្រជាពលរដ្ឋដែលជួបគ្រោះថ្នាក់ធម្មជាតិឱ្យបានទាល់ពេល វេលាដោយឯកឧត្តម បណ្ឌិត សុខ អាន បានបញ្ជាក់ថា ឯកឧត្តម និង សប្បុរសជននានានិងបន្តគាំទ្រសកម្មភាពនេះ។
ទាក់ទងនិងសកម្មភាពកាកបាទក្រហមខេត្តតាកែវនេះដែរឯកឧត្តម ឈិត សុខន ប្រធានក្រុមប្រឹក្សាខេត្តតាកែវ និងជាប្រធានគណៈកម្មាធិការសាខាកាកបាទក្រហមកម្ពុជា ខេត្តតាកែវ បានមានប្រសាសន៍ ឱ្យដឹងថាក្នុងឆ្នាំ២០១១កន្លងមកខេត្តតាកែវបានរងគ្រោះដោយទឹកជំនន់អូសបន្លាយយ៉ាងយូរមានចំនួន ៧ ស្រុក ៣៥ ឃុំ និង១៨១ ភូមិ ចំនួនគ្រួសារសរុបមានចំនួន៧,៨៦៩គ្រួសារ ក្នុងនោះសាខាបាន ផ្តល់អំណោយសង្គ្រោះបន្ទាន់បានចំនួន ៩៨៧ គ្រួសារ ចំណែកចំនួនគ្រួសារដែលនៅសេសសល់គឺបានទទួលអំណោយពីរាជរដ្ឋាភិបាលតាមរយៈ ឯកឧត្តម ក្រុមការងារចុះជួយខេត្តតាកែវ។ក្រៅពីអំណោយជំនួយសង្គ្រោះបន្ទាន់ ដោយទឹកជំនន់ឆ្នាំ២០១១នេះសាខាបានផ្តល់ជំនួយឧបត្ថមគ្រោះមហន្ត រាយផ្សេងៗទៀតមានដូចជា ខ្យល់ព្យុះ ភ្លើងឆេះផ្ទះ របាញ់ លង់ទឹក គ្រោះថ្នាក់ចរាចរ ខ្យល់គរ ចង់ករសម្លាប់ខ្លួន ជំងឺរាំរៃ ក្រីក្រ អេដស៍ ធ្លាក់ពីលើដើមឈើ ជាដើមមានចំនួនសរុប ១, ៦០២គ្រួសារ។
ក្នុងដំណាក់កាលស្តារ និងកសាងឡើងវិញក្រោយទឹកជំនន់សាខាបានចុះធ្វើយុទ្ធនាការសំអាតបរិស្ថាន ជូនប្រជាពលរដ្ឋបានចំនួន ១៨ ភូមិនៅស្រុកបូរីជលសារ ទ្រាំង និង ស្រុកកោះអណ្តែត មានអ្នកស្ម័គ្រចិត្ត ចូលរួម៦០ នាក់បានចែកសាប៊ូដល់ប្រជាពលរដ្ឋ ដែលបានចូលរួមចំនួន ២,៨៩០ ដុំ និងចែកធុងចម្រោះទឹកស្អាតបានចំនួន ២,៩៤៤ ធុង=២,៩៤៤ គ្រួសារ។
ឯកឧត្តម ឈិត សុខុន បានថ្លែងឱ្យដឹងថា សម្រាប់ឆ្នាំ២០១២ ទិវាពិភពលោកកាកបាទក្រហម អឌ្ឍច័ន្ទក្រហមបានជ្រើសរើសប្រធានបទ យុវជនជាកំលាំងនាំ គ្នាធ្វើសកម្មភាព ដែលបញ្ហានេះកម្លាំងយុវជនសាខាកាកបាទក្រហម ខេត្តតាកែវដែលមានចំនួន ២៦៦១នាក់បាននិងកំលាំងក្លាយជាកម្លាំងមនុស្សធម៌វ័យក្មេង។ក្រៅពីការងារជួយសង្គ្រោះបន្ទាន់សាខាកាកបាទក្រហម ខេត្តតាកែវបានសង់អណ្តូងបាន៨១ នៅតាមសហគមន៍ក្នុងស្រុកចំនួន៨ និងក្រុង១ ។សាខាកាកបាទក្រហមកម្ពុជា ខេត្តតាកែវមាន ដៃគូរសហប្រតិបត្តិការជាមួយកាកបាទក្រហម ស្វីស បានថ្មី កសាងអនុវត្ត សកម្មភាពលើគម្រោង២ គឺគម្រោងលើកកំពស់សុខភាពបរិស្ថាន នៅកម្ពុជា អនុវត្ត ក្នុងស្រុកបាទី និងគម្រោងមូលនិធិសមធម៌ដែលមានការិយាល័យនៅបន្ទីពេទ្យ បង្អែកខេត្តសំរាប់ ជួយចេញថ្លៃសេវាព្យាបាលសោហ៊ុយ ធ្វើដំណើរ និង ថ្លៃអាហារដល់អ្នកជំងឺក្រីក្រដែលបានចូលមកសំរាកព្យាបាលជំងឺ ដែលក្នុងនោះឆ្នាំ២០១២បានជួយអ្នកជំងឺបាន ២៣៥៦នាក់។
ឯកឧត្តម ឈិត សុខុន បានមានប្រសាសន៍បញ្ជាក់ថា ជោគជ័យនៃប្រតិបត្តិការរបស់សាខាកាកបាទក្រហមកម្ពុជា ខេត្តតាកែវនេះជាការរួមចំណែកយ៉ាងសំខាន់ពីលោក ជំទាវ អាយ អានី សុខអាន ដែលបានអញ្ចើញចូលរួមក្នុង ទិវាពិភពលោកកាកបាទក្រហម អឌ្ឍច័ន្ទក្រហម លើកទី១៤២ ឆ្នាំ២០០៥ ដែលបានទទួលថវិការយ៉ាងច្រើនសន្ធឹកសន្ធាប់ដែលខេត្តតាកែវមិនធ្លាប់ទទួលបាន និងអាជ្ញាធរគ្រប់លំដាប់ថ្នាក់ ដែលបានផ្តល់កំលាំងគាំទ្រសហការយ៉ាងជិតស្និតជាមួយសាខាកាកបាទក្រហមកម្ពុជាខេត្តតាកែវ ជួយគ្រួសាររងគ្រោះសំរេចបានលទ្ធផលជាទីពេញចិត្ត ។ក្នុងឱកាសដ៏វិសេសវិសាលនេះដែរ ខ្ញុំសូមថ្លែងអំណរគុណជាអនែកជាថ្មីទៀតចំពោះ ឯកឧត្តម បណ្ឌិត សុខ អាន និង លោកជំទាវដែលតែងតែយកចិត្តទុកដាក់គាំទ្រខ្លាំងខ្លាដល់សកម្មភាព របស់សាខាកាកបាទក្រហម កម្ពុជា ខេត្តតាកែវ៕