ដោយ ៖ សាគុណ
ភ្នំពេញ ៖ ក្នុងឱកាសអញ្ជើញមកបំពេញទស្សនកិច្ចនៅព្រះរាជាណាចក្រកម្ពុជា លោក ង្វៀនដាង ទៀង អគ្គនាយកវិទ្យុសំឡេងវៀតណាម(VOV) និងគណៈប្រតិភូរួមដំណើរ បានអញ្ជើញចូលជួបសំដែងការគួរសមលោក ខៀវ កាញារីទ្ធ រដ្ឋមន្ត្រីក្រសួងព័ត៌មាន នារសៀលថ្ងៃទី២៤ ខែកញ្ញា ឆ្នាំ២០១២ នៅទីស្តី ការក្រសួង និងបានជម្រាបជូនពីដំណើរការនៃកិច្ចសហប្រតិបត្តិការរវាងវិទ្យុ VOV និងវិទ្យុជាតិកម្ពុជា ក្នុងរយៈពេលកន្លងមកនិងបន្តទៅមុខទៀត ។
លោក ង្វៀន ដាងទៀង (Nguyen Dang Tiem) បានលើកឡើងពីកិច្ចព្រមព្រៀងស្តីពី សហប្រតិបតិ្តការរវាងវិទ្យុជាតិកម្ពុជា និងវិទ្យុសំឡេងវៀតណាម កាលពីឆ្នាំ២០០៥ ដល់ ឆ្នាំ២០០៨ គឺសម្រេចបានលទ្ធផលល្អ ដោយវិទ្យុទាំងពីរបានចុះកិច្ចព្រមព្រៀងបន្តទៀត ដើម្បីធ្វើយ៉ាងណាជំរុញនិងពង្រីកអ្វីដែលយើងមានស្រាប់ ឱ្យបានទៅមុខលឿនបន្ថែមទៀត ។ លោកអគ្គនាយកក៏បានធ្វើការ រំលឹកពីចំណងមិត្តភាពនិងអនុស្សាវរីយ៍ ជាច្រើនរវាងវិទ្យុទាំងពីរ តាំងពីអំឡុងឆ្នាំ១៩៧៨ រហូតមក ដល់បច្ចុប្បន្ន ដោយកាលនោះយើងបានជួយទៅវិញទៅមកតាំងពីគ្រាដែលកម្ពុជាជួបការលំបាក ។ ដូច្នេះតាមរយៈដំណើរទស្សនកិច្ចនាឱកាសនេះ វិទ្យុ VOV នឹង ពិនិត្យក្នុងការរៀបចំបណ្តុះបណ្តាល ធនធានមនុស្សក្នុងស្ថាប័នវិទ្យុជាតិកម្ពុជា លើផ្នែកសារព័ត៌មាន និងអ្នកបច្ចេកទេសវិទ្យុហើយ ជាមួយនេះ វិទ្យុ VOV និងបញ្ជូនមន្ត្រីជំនាញបច្ចេកទេសមកជួយពិនិត្យមើលម៉ាស៊ីនផ្សាយកុំឱ្យមាន ភាពរអាក់រអួល និងជួសជុលកុំឱ្យខូចសម្រាប់ការប្រើប្រាស់បានយូរ ។
លោករដ្ឋមន្ត្រី ខៀវ កាញារីទ្ធ បានវាយតម្លៃខ្ពស់ចំពោះកិច្ចសហប្រតិបត្តិការគ្នាយ៉ាងល្អ រវាងវិទ្យុជាតិកម្ពុជា និងវិទ្យុសំឡេងវៀតណាម ក្នុងរយៈពេលកន្លងមក និងបន្តទៅមុខទៀត ហើយជា មួយនេះលោករដ្ឋមន្ត្រីក៏បានធ្វើការរំលឹកឡើងវិញពីទំនាក់ទំនងល្អលើវិស័យព័ត៌មាន រវាងប្រទេស យើងទាំងពីរ គឺមានតាំងពីមុនថ្ងៃរំដោះ ៧មករា ឆ្នាំ១៩៧៩ ដោយក្នុងនោះវៀតណាម បានជួយ បង្កើតឱ្យមានឡើងវិញនូវស្ថានីយ៍វិទ្យុជាតិកម្ពុជា និងទីភ្នាក់ងារសារព័ត៌មានកម្ពុជា AKP ។ ទន្ទឹមគ្នា នេះដែរ ថ្នាក់ដឹកនាំនៃក្រសួងព័ត៌មានភាគច្រើនបានទទួលការបណ្តុះបណ្តាលពីមន្ត្រីជំនាញរបស់ វៀតណាម និងធ្វើការទំនាក់ទំនងគ្នាបានយ៉ាងល្អ តែទោះជាយ៉ាងណាក្រសួងក៏នៅត្រូវការឱ្យភាគី វៀតណាមជួយបណ្តុះបណ្តាលបន្ថែមទៀត សម្រាប់មន្ត្រីជំនាញថែទាំសម្ភារបច្ចេកទេសនិងផ្នែក សំឡេងផ្សាយវិទ្យុអាចបម្រើការងារបានកាន់តែល្អ និងបន្តធ្វើជាថ្នាក់ដឹកនាំ ។
ឆ្លៀតក្នុងឱកាសនោះ លោករដ្ឋមន្ត្រីបានថ្លែងការអរគុណចំពោះប្រទេសវៀតណាម ដែលបានផ្តល់ជាម៉ាស៊ីនផ្សាយវិទ្យុ មួយចំនួន ដើម្បីយកតម្លើងនៅតាមបណ្តាខេត្ត ដើម្បីធ្វើឱ្យប្រព័ន្ធផ្សព្វផ្សាយរបស់ជាតិ បានកាន់តែទូលំ ទូឡាយទ្វេឡើងថែមទៀត ហើយតាមរយៈនេះដែរ លោករដ្ឋមន្ត្រីស្នើដល់វៀតណាម ពិនិត្យក្នុងការ ជួយបណ្តុះ បណ្តាលធនធានមនុស្ស សម្រាប់ធ្វើកម្មវិធីផ្សាយជាភាសាវៀតណាម នៅក្នុងស្ថានីយ៍វិទ្យុ ឱ្យបានវែងជាងមុន ព្រោះមានសារសំខាន់សម្រាប់ផ្សព្វផ្សាយរាល់ព័ត៌មានដែលកើតលើងនៅក្នុង និងក្រៅប្រទេសឱ្យប្រជាពលរដ្ឋវៀតណាម ដែលរស់នៅធ្វើកការរកស៊ីនៅកម្ពុជាបានដឹងផងដែរ ។ ដូច្នេះរាល់កិច្ចសហប្រតិបត្តិការរវាងប្រទេសយើងទាំងពីរកម្ពុជា-វៀតណាម គឺជាកត្តាមានសារសំខាន់ ដែលមិនអាចបំភ្លេចបានជារៀងរហូត ៕