ដោយ ៖ មរតក
ភ្នំពេញ ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា បានប្រតិកម្មខ្លាំងៗ ចំពោះបុគ្គលមួយចំនួនដែលនៅបន្ដធ្វើការរិះគន់លើបញ្ហាព្រំដែន បើទោះបីកន្លងមក សម្ដេចបានបកស្រាយនៅក្នុងរដ្ឋ សភាយ៉ាងលម្អិតអស់រយៈពេលជាង៥ម៉ោង និងបោះពុម្ពជាឯកសារសម្រាប់យកទៅសិក្សា និងស្រាវជ្រាវក៏ដោយ ។ ការថ្លែងប្រតិកម្មរបស់សម្ដេចបានធ្វើឡើងនៅព្រឹកថ្ងៃទី២៥ ខែកញ្ញា ឆ្នាំ២០១២ ក្នុងឱកាសដែលសម្ដេចអញ្ជើញជា អធិបតីដ៏ខ្ពង់ខ្ពស់ប្រគល់សញ្ញាបត្រឱ្យនិស្សិតជ័យលាភីមកពីសាកលវិទ្យាល័យជាតិគ្រប់គ្រង នៅមជ្ឈមណ្ឌលពិព័រណ៍ កោះពេជ្រ ។
សម្ដេចតេជោបានលើកឡើងថា ទោះបីយើងព្យាយាមបកស្រាយប៉ុន្មានដងទៀត ក៏គេមិនយល់ដែរ ពីព្រោះគេជាកូន ចារកម្ម ។ សម្ដេចបន្ដថា បើសិនជាអ្នករិះគន់ទាំងនោះជាមនុស្ស ហើយគិតពីប្រទេសកម្ពុជា គួរតែនាំគ្នាស្ដាប់ការបក ស្រាយបញ្ហាព្រំដែនរបស់សម្ដេចឡើងវិញ ខណៈបញ្ហាព្រំដែនសមុទ្ររវាងប្រទេសកម្ពុជាជាមួយប្រទេសជិតខាង (វៀតណាម, ថៃ) កំពុងតែធ្វើការសិក្សា ។
សម្ដេចតេជោបានលើកឡើងថា ព្រំដែនប្រទេសកម្ពុជា-វៀតណាម-ឡាវ គឺយកតាមផែនទីខ្នាត១/១០០.០០០ បោះពុម្ព ដោយកម្ពុជា-ឥណ្ឌូចិន នៅចន្លោះឆ្នាំ១៩៣៣-១៩៥៣ ចំណែកព្រំដែនកម្ពុជា-ថៃ គឺយកតាមផែនទីខ្នាត ១/២០០.០០០ បោះពុម្ពចន្លោះឆ្នាំ១៩០៧-១៩០៩ ផ្អែកលើអនុសញ្ញាបារាំង-សៀម ១៩០៤-១៩០៧ ។
ជាមួយនឹងការរិះគន់ខ្លាំងៗទៅលើក្រុមមនុស្សដែលបន្ដរិះគន់បញ្ហាព្រំដែនខាងលើ សម្ដេចតេជោក៏បានលើកឡើងដែរ ថា មានគណបក្សនយោបាយមួយចំនួនបានប្រកាសធ្វើពហិការមិនចូលរួមការបោះឆ្នោតជ្រើសរើសតំណាងរាស្ដ្រឆ្នាំ ២០១៣ខាងមុខ ប៉ុន្ដែការប្រកាសនេះ ត្រូវបានសម្ដេចអះអាងថា គ្មានបញ្ហានោះទេ ពីព្រោះច្បាប់ជាច្បាប់ កុំយកឆន្ទៈ នយោបាយមកឡូកឡំគ្នា ។ ការថ្លែងបែបនេះរបស់សម្ដេចតេជោ គឺសំដៅទៅលើគណបក្សសម រង្ស៊ី និងគណបក្សសិទ្ធិ មនុស្ស ដែលបានប្រកាសកាលពីពេលថ្មីៗនេះថា ខ្លួននឹងធ្វើពហិកាមិនចូលរួមការបោះឆ្នោត បើសិនជាក្រសួងមហាផ្ទៃ មិនព្រមកែប្រែនិងផ្លាស់ប្ដូរសមាសភាពដឹកនាំគណៈកម្មាធិការជាតិរៀបចំការបោះឆ្នោត ក៏ដូចជាគណៈកម្មការរៀបចំ ការបោះឆ្នោតគ្រប់លំដាប់ថ្នាក់តាមការទាមទាររបស់ខ្លួនទេនោះ ៕