ដោយ ៖ ស្ឥាងជ័យ
ខេត្តកណ្តាល៖ នៅព្រឹកថ្ងៃទី២៥ ខែកញ្ញា ឆ្នាំ២០១២ លោក ឈុន ស៊ីរុន អភិបាលខេត្តកណ្តាល និងលោកឧត្តមសេនីយ៍ត្រី អ៊ាវ ចំរើន ស្នងការនគរបាលខេត្តកណ្តាល អមដំណើរដោយលោក ឯម រដ្ឋា ស្នងការរងទទួលបន្ទុក និងលោកនាយការិយាល័យស្ថិតិ និង អត្តសញ្ញាណប័ណ្ណ បានអញ្ជើញចែកអត្តសញ្ញាណប័ណ្ណសញ្ជាតិខ្មែរគំរូថ្មី ជូនប្រជាពលរដ្ឋនៅក្នុងស្រុកកោះធំ ខេត្តកណ្តាល ចំនួន១៥៨១សន្លឹក។
លោកវរសេនីយ៍ត្រី យ៉ង់ សុខេម នាយការិយាល័យស្ថិតិនិងអត្តសញ្ញាណប័ណ្ណ នៃស្នងការនគរបាលខេត្តកណ្តាលបានឲ្យដឹងថា ដោយមានការយកចិត្តទុក្ខដាក់ពីរាជរដ្ឋាភិបាល លោកឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងក្រោមការចង្អុលដឹកនាំដ៏ខ្ពង់ខ្ពស់របស់លោក នាយឧត្តមសេនីយ៍ អគ្គស្នងការនគបាលជាតិ និងមានការដឹកនាំដោយផ្ទាល់ពីឯកឧត្តមអភិបាលខេត្តកណ្តាលនិងលោកឧត្តមសេនីយ៍ត្រី អ៊ាវ ចំរើន ស្នងការនគរបាលខេត្ត បានដាក់ឲ្យដំណើរការផ្តល់អត្តសញ្ញាណប័ណ្ណសញ្ជាតិខ្មែរគំរូថ្មី ជូនប្រជាពលរដ្ឋតាមបណ្តាស្រុក ក្រុងទាំង១១ ទូទាំងខេត្តកណ្តាល ចាប់ពីថ្ងៃទី៩ ខែកក្កដា ឆ្នាំ២០១២រហូតដល់ថ្ងៃទី១៩ ខែកញ្ញា ឆ្នាំ២០១២ ខាងកម្លាំងជំនាញរបស់លោកដែលមានការណែនាំពីលោកវរសេនីយ៍ឯក ឯម រដ្ឋា ស្នងការរងទទួលបន្ទុកបានចុះធ្វើអត្តសញ្ញាណប័ណ្ណគំរូថ្មីបានចំនួនសរុប៤០៦០៦០នាក់(ប្រុស២០៧៩៥នាក់) ។
លោក យ៉ង់ សុខេម បានបន្តថា បន្ទាប់ពីកម្លាំងជំនាញចុះធ្វើរួចមកលោកបានបញ្ជូនទិន្នន័យចំនួន១៨៥៩២នាក់ (ប្រុស៩៨៨០នាក់) ទៅនាយកដ្ឋាននៅក្រសួងមហាផ្ទៃរួចរាល់ហើយ។ ដោយឡែកនៅក្នុងស្រុកកោះធំកម្លាំងជំនាញបាន ចាប់ផ្តើមដំណើរការធ្វើអត្តសញ្ញាណប័ណ្ណគំរូថ្មីមកដល់ពេលនេះបានចំនួន៧៩៨៧នាក់(ប្រុស៣៩៣៧នាក់) ហើយជំនាញបានបញ្ជូនទិន្នន័យទៅនាយកដ្ឋានក្រសួងមហាផ្ទៃបានចំនួន៤១៩៨នាក់ (ប្រុស២៧០៩នាក់)។
លោកនាយការិយាល័យបានបញ្ជាក់ថា អត្តសញ្ញាណប័ណ្ណគំរូថ្មីដែលលោកអភិបាលខេត្តកណ្តាលនិងលោកឧត្តមសេនីយ៍ត្រី អ៊ាវ ចំរើន ស្នងការនគរបាលខេត្តកណ្តាលចុះទៅចែកជូនប្រជាពលរដ្ឋនៅក្នុងស្រុកកោះធំនាព្រឹកថ្ងៃទី២៥ ខែកញ្ញា ឆ្នាំ២០១២ នេះមានចំនួន១៥៨១សន្លឹក (ប្រុស៨២៤សន្លឹក)។ពិធីប្រគល់អត្តសញ្ញាណប័ណ្ណគំរូថ្មីនេះ ធ្វើឡើងបន្ទាប់ពីខាងជំនាញនាយកដ្ឋានក្រសួងមហាផ្ទៃ បោះពុម្ពរួចបានប្រគល់ឲ្យមកស្នងការនគរបាលខេត្តកណ្តាល។
ឧត្តមសេនីយ៍ត្រី អ៊ាវ ចំរើន ស្នងការនគរបាលខេត្តកណ្តាលបានក្រើនរំលឹកដល់ប្រជាពលរដ្ឋថា ប្រជាពលរដ្ឋទាំងអស់ត្រូវធ្វើអត្តសញ្ញាណប័ណ្ណឲ្យបានគ្រប់គ្នា នៅពេលកូនកើតមកត្រូវទៅធ្វើសំបុត្រកំណើត ពេលគ្រប់អាយុបោះឆ្នោត ត្រូវទៅធ្វើអត្តសញ្ញាណប័ណ្ណ ដើម្បីបានបោះឆ្នោត និងសម្រាប់ដាក់តាមខ្លួន ដែលបញ្ជាក់បានពីទីកន្លែងភូមិឃុំកំណើត ដែលខ្លួនបានរស់នៅសព្វថ្ងៃ និងងាយស្រួលពេលដែលមានបញ្ហាអ្វីមួយកើតឡើង ដូចជាគ្រោះថ្នាក់ចរាចរណ៍ជាដើម ។ លោកស្នងការបានបញ្ជាក់ថា ការធ្វើអត្តសញ្ញាណប័ណ្ណគំរូថ្មីនេះ មិនតម្រូវឲ្យបងប្អូនប្រជាពលរដ្ឋបង់ប្រាក់នោះទេ។
លោក ឈុន ស៊ីរុន អភិបាលខេត្តកណ្តាល បានធ្វើការផ្តាំផ្ញើដល់យុវជន យុវនារីត្រូវធ្វើការផ្ទៀងផ្ទាត់ ពិនិត្យឈ្មោះបោះឆ្នោត និងចុះឈ្មោះបោះឆ្នោត ចំពោះអ្នកដែលមិនទាន់បានបោះឆ្នោត ៕
.jpg)
.jpg)