ភ្នំពេញ ៖ នាព្រឹកថ្ងៃទី២៥ ខែកញ្ញាឆ្នាំ២០១២ នៅមជ្ឈមណ្ឌលសន្និបាតកោះពេជ្រ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី… នៃព្រះរាជាណាចក្រកម្ពុជាបាន អញ្ជើញជាអធិបតីដ៏ខ្ពង់ខ្ពស់ ក្នុងពិធីប្រគល់សញ្ញាបត្រ ជូន ដល់និស្សិតជ័យលាភីថ្នាក់បរិញ្ញាបត្រ និងថ្នាក់បរិញ្ញាបត្រជាន់ខ្ពស់ សរុបចំនួន ៥ពាន់៤៧៣នាក់ ដែលបានបញ្ចប់ ការសិក្សា នៅសាកលវិទ្យាល័យជាតិគ្រប់គ្រង។
ថ្លែងក្នុងពិធីនោះសម្តេចអគ្គមហាសេនាបតីតេជោ ហ៊ុន សែន បាន កោតសរសើរ និងវាយតំលៃខ្ពស់ចំពោះសកម្មភាព បង្រៀន និងការសិក្សារៀនសូត្ររបស់សាស្រ្តាចារ្យ និងនិស្សិតទាំងអស់ ក្នុងសាកលវិទ្យាល័យជាតិគ្រប់គ្រង ដែលបានសំរេចនូវស្នាដៃធំៗជាច្រើន ក្នុងការកសាងធនធានមនុស្សប្រកបដោយសមត្ថភាពប្រជែងឈ្នះ នៅគ្រប់ កាលៈទេសៈ និងគ្រប់សមរភូមិ ដើម្បីបំរើឲ្យតំរូវការនៃការអភិវឌ្ឍសេដ្ឋកិច្ច និងសង្គមកម្ពុជា។
សម្តេចតេជោមាន ប្រសាសន៍បន្តថា រាជរដ្ឋាភិបាលពិតជាមានមោទនភាព ក្នុងការដែលបានឃើញវិស័យឯកជនជាច្រើន បាន បណ្តាក់ទុនវិនិយោគលើវិស័យអប់រំនៅកម្ពុជា ដែលកំពុងមានការរីកចំរើនយ៉ាងឆាប់រហ័ស ក្នុងរយៈពេលប៉ុន្មាន ឆ្នាំចុងក្រោយនេះ។សម្តេចតេជោបន្តថាប្រសិនបើរាជរដ្ឋាភិបាលមិនបើកឱកាសឲ្យ សាកលវិទ្យាល័យជាតិគ្រប់ គ្រង សិក្សាតាមរយៈការបង់ថ្លៃទេនោះ តើនិស្សិតសរុបទាំងផ្នែកបរិញ្ញា និងថ្នាក់បរិញ្ញាបត្រជាន់ទាំង៤ពាន់នាក់ ទៀតទៅណា បើអាហារូបករណ៍របស់រដ្ឋមានកំរិតត្រឹមតែជាង៤០០នាក់នោះ។ ចំណោទតើកូនសិស្សជាង៤ពាន់ នាក់ទៅទីណា បន្ទាប់ពីកូនសិស្សដែលបានបញ្ចប់មធ្យមសិក្សាតុតិយភូមិហើយនោះទៅណា ចម្លើយគ្មានអ្វីក្រៅពី ជំរើស ដែលរដ្ឋទទួលយកឯកជនធ្វើជាដៃគូរ ក្នុងការកសាងនិងពង្រីកបន្ថែម នូវគ្រឹៈស្ថានអប់រំរបស់យើងផង និងការសិក្សារបស់និស្សិតតាមរយៈការបង់ថ្លៃផង សំដៅធ្វើយ៉ាងណាឲ្យវិស័យអប់រំរបស់យើង កាន់តែមានការប្រកួតប្រជែង ទាំងលើផ្នែកគុណភាព និងសមត្ថភាព។
សម្តេចតេជោមានប្រសាសន៍បន្តថា ឥឡូវនេះតាមរយៈ នៃ ការចូលរួមខិតខំប្រឹងប្រែងទាំងអស់គ្នា ទាំងរដ្ឋនិងផ្នែកឯកជន និងបុគ្គលម្នាក់ៗ រួមទាំងគ្រួសារនិមួយៗ ដែលមាន ការពាក់ពន្ធ័ បានធ្វើឲ្យធនធានមនុស្សរបស់យើង ពីមួយថ្ងៃទៅមួយថ្ងៃកាន់តែមានការកើនឡើង ចំនួនអ្នកចេះដឹង របស់យើងកាន់តែមានច្រើន ។ចំណុចនេះគឺជាចំណុចអាទិភាពមួយ ក្នុងចំណោមចំណុចអាទិភាពទាំងបូន ដែលរាជ រដ្ឋាភិបាលបានដាក់ចេញកាលពី២៥ឆ្នាំមុន គឺទឹក ផ្លូវ ភ្លើង និងមនុស្ស ក្នុងការអភិវឌ្ឍប្រទេសកម្ពុជាឡើងវិញ។ចំណុចជាអាទិភាពទាំងបួននោះ វាមិនមែនត្រូវក្នុងរយៈពេល២៥ឆ្នាំកន្លងមកនេះនោះទេប៉ុន្តែវាអាចត្រឹមត្រូវសំរាប់រយៈពេល៣០ឆ្នាំទៅមុខទៀតផងដែរ។
សម្តេចតេជោបញ្ជាក់ថា កន្សោមអាទិភាពទាំងបួននោះ ត្រូវតែស្ថិតនៅជាគោលនយោបាយ នៃអាទិភាពវិនិយោគរបស់រាជរដ្ឋាភិបាលកម្ពុជាជាបន្តទៅទៀត មិនថានៅក្នុង រាជរដ្ឋាភិបាលអាណត្តិឆ្នាំ២០០៨-២០១៣ ឬអាណត្តិក្រោយៗទៀតនោះទេ ពោលគឺយើងត្រូវការរយៈពេល៣០ឆ្នាំ ទៀត ក៏មិនទាន់មានភាពយ៉ឺតយ៉ាវនោះដែរ ពិសេសលើការបណ្តុះបណ្តាលធនធានមនុស្ស ត្រូវមានការថែទាំឲ្យ បានជាប់ជាប្រចាំ។
សម្តេចតេជោ នាយករដ្ឋមន្ត្រីមានប្រសាសន៍ថា ក្នុងដំណាក់កាលនៃសេដ្ឋកិច្ចចំណេះដឹងគឺតម្រូវឲ្យយើងខិតខំបណ្តុះ បណ្តាលធនធានមនុស្សរបស់យើងឲ្យកាន់តែមានជំនាញ មានចំណេះដឹង និងចំណេះធ្វើគ្រប់គ្រាន់ ហើយជាងនេះទៅទៀតឆ្នាំ២០១៥ខាងមុខនេះ គឺជាឆ្នាំដែលសហគមន៍សេដ្ឋកិច្ចអាស៊ាននឹងកើតចេញជារូបរាង ដែលពេលនោះលំហូរទុន លំហូរមនុស្ស លំហូរទំនិញ សេវាសព្វបែបយ៉ាងទាំងអស់ ទៅមកគ្មានលំបាកទេ។ សម្តេចតេជោថ្លែងបញ្ជាក់ថា ប្រសិនបើធនធានមនុស្សរបស់យើងមិនដល់កម្រិតទេនោះ ច្បាស់ជាយើងនឹងបាត់បង់នូវប្រៀបនៃការប្រកួតប្រជែងនោះហើយ។
សម្តេច នាយករដ្ឋមន្ត្រីមានប្រសាសន៍ថា ការប្រឹងប្រែងទាំងអស់របស់យើងក្នុងរយៈពេលជា ច្រើនឆ្នាំកន្លងមកនេះបានធ្វើឲ្យធនធានមនុស្សរបស់យើងមានការកើន ឡើងពីមួយថ្ងៃ ទៅមួយថ្ងៃ ដែលចំណុចនេះគឺជាចំណុចដែលយើងត្រូវតែមើលឃើញថា ថ្ងៃនេះទុនរបស់សង្គមត្រូវបានបន្ថែម តាមរយៈនៃការបញ្ចប់ការសិក្សារបស់និស្សិតថ្នាក់បរិញ្ញាបត្រ និងបរិញ្ញាបត្រជាន់ខ្ពស់ ដែលផ្តល់ឲ្យ សង្គមជាតិរបស់យើងនូវទុនបន្ថែមទៀតសម្រាប់ការអភិវឌ្ឍន៍ប្រទេសជាតិ របស់យើង ដែលជាការចាំ បាច់យើងត្រូវតែបណ្តុះបណ្តាលធនធានមនុស្សឲ្យបានជាប់ជានិច្ច។
ទាក់ទងទៅនិងធនធានមនុស្សដែលជាមន្រ្តីរាជការ សម្តេចតេជោនាយករដ្ឋមន្ត្រីបានថ្លែងថា រដ្ឋាភិបាលមានការសោកស្តាយនៅ ពេលដែលធ្វើច្បាប់សហលក្ខន្តិកៈមន្ត្រីរាជការស៊ីវិល ដែលដាក់អាយុចូលវិវត្តន៍ត្រឹមតែ ៦០ ឆ្នាំនោះ។ សម្តេចតេជោថ្លែងថា យើងមិនអាចកែច្បាប់ទេ ប៉ុន្តែយើងមានការស្តាយដែរ ប្រសិនបើកាលពីពេលនោះយើងដាក់ឲ្យចូលនិវត្តន៍ត្រឹមអាយុ ៦២ ឬ ៦៥ ឆ្នាំប្រហែលជាល្អ ព្រោះ អាយុ ៦០ ឆ្នាំកំពុងតែពេញបទពិសោធន៍ ប៉ុន្តែបែរជាត្រូវ ចូលនិវត្តន៍ទៅវិញ។ យ៉ាងណាក៏ដោយ ក៏សម្តេចតេជោនាយករដ្ឋមន្ត្រីបានគូសបញ្ជាក់ថា មន្ត្រីរាជការជាបុរសៗដែលត្រូវចូលនិវត្តន៍អាយុ ៥៥ ឆ្នាំឬ ៥៨ ឆ្នាំយើងនឹងពិនិត្យពិចារណាជាបន្តទៅទៀត អំពីបញ្ហាទាក់ទិននឹងការចូលនិវត្តន៍នេះ។
ពាក់ព័ន្ធ នឹងគម្រោងរៀបចំបណ្ណាល័យនៅតាមពន្ធធនាគារវិញ សម្តេចតេជោថ្លែងថា ជាការប្រសើរប្រសិនបើយើងអាចធ្វើទៅបាន ដើម្បីយើងរៀបចំឲ្យមានកន្លែងអានសៀវភៅ ព្រោះបើទោះបីជាអ្នកទោសក្តី ក៏ប៉ុន្តែពួកគេបានយល់ បានដឹង បានសិក្សានៅពេលពួកគេចេញត្រឡប់មកវិញ គេក៏ធ្វើសមាហរណកម្មចំណេះដឹងទៅក្នុងសង្គម។សម្តេចតេជោបានបញ្ជាក់ថា បើទោះបីជាគេជាប់ទោស ក៏ប៉ុន្តែគេជាពលរដ្ឋ គេជាមនុស្សនៅពេលដែលគេ រួចទោសគេក៏ទទួលបានចំណេះដឹងក្នុងពេលដែលគេនៅក្នុងពន្ធនាគារ។
សម្តេចតេជោ នាយករដ្ឋមន្ត្រីមានប្រសាសន៍ឱ្យដឹងថា កាលពីជំនាន់សង្គ្រាមនៅកម្ពុជាឈ្លើយសឹកជាច្រើន ត្រូវបានរដ្ឋាភិបាលរដ្ឋកម្ពុជាចាប់បាន។ នៅពេលដែលពួកគេត្រូវបានចាប់ខ្លួន ពួកគេមិនត្រូវបានសម្លាប់ មិនត្រូវបានធ្វើបាបទេ យើងបានយកពួកគេទៅរក្សាទុក ហើយតាមរយៈនោះ ពេលដែលពួកគេ ត្រូវបានចាប់ខ្លួននៅក្នុងសមរភូមិពួកគេអត់ចេះអក្សរទេ ប៉ុន្តែនៅពេលដែលត្រូវបានដោះលែងចេញពីឈ្លើយសឹក ពួកគេបានអ្នកចេះអក្សរ ខ្លះជាជាងឈើ ជាងចម្លាក់ ដែលយើងបានបណ្តុះបណ្តាលវិជ្ជាជីវៈ នៅក្នុងពន្ធធនាគារ។
ឯកឧត្តម អ៊ឹម សិទ្ធី រដ្ឋមន្រ្តីក្រសួងអប់រំ យុវជន និងកីឡា មានប្រសាសន៍ឲ្យដឹងថា ដោយអនុវត្តន៍តាម គោលនយោបាយនិងយុទ្ធសាស្រ្តរបស់រាជរដ្ឋាភិបាលកម្ពុជា ក្រោមការដឹកនាំប្រកបដោយកិត្តិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន ជាប្រមុខ វិស័យអប់រំកម្ពុជា មានការរីកចំរើនគួរជាទីមោទនៈ ជា ពិសេសផ្នែកឧត្តមសិក្សា។ ឯកឧត្តមរដ្ឋមន្រ្តីមានប្រសាសន៍បន្តថា មកដល់បច្ចុប្បន្ននេះយើងមានគ្រឹៈស្ថានឧត្តម សិក្សាសរុបចំនួន ៩៧ ក្នុងនោះគ្រឹៈស្ថានឧត្តមសិក្សារបស់រដ្ឋមាន៣៨ និងឯកជន៥៩ និងមាននិស្សិតចាប់ពីថ្នាក់ បរិញ្ញាបត្ររង ដល់ថ្នាក់បណ្ឌិត មានចំនួនជាង ២២២ពាន់នាក់ ក្នុងនោះនិស្សិតនារីមាន ៨៣ពាន់៧១៩នាក់ ស្មើ និង៣៧,៦៩%៕