ភ្នំពេញ: គណៈកម្មាធិការជាតិរៀបចំការបោះឆ្នោត គ.ជ.ប. បានជួបប្រជុំជាមួយមន្ត្រី និងតំណាងស្ថានទូតបរទេស ចំនួន ១៣ ប្រចាំនៅកម្ពុជា ក្នុងគោលបំណង ពន្យល់ពីនីតិវីបោះឆ្នោត និងលទ្ធផលនៃការបោះឆ្នោតកន្លងមក ព្រមទាំងការចុះបញ្ជីឈ្មោះប្រជាពលរដ្ឋកម្ពុជា នៅពេលបច្ចុប្បន្ន។
កិច្ចប្រជុំនោះ បានធ្វើឡើង កាលពីព្រឹកថ្ងៃទី២៦ ខែកញ្ញា ឆ្នាំ២០១២ នៅទីស្នាក់ការ គ.ជ.ប. ដែលដឹកនាំកិច្ចប្រជុំ ដោយលោកស្រី ស៊ីន ជុំបូ អនុប្រធានគ.ជ.ប។
តំណាងស្ថានទូត ប្រចាំកម្ពុជា ចំនួន ១៣ ប្រទេស ដែលចូលរួមកិច្ចប្រជុំជាមួយ គ.ជ.ប. រួមមាន៖ ស៊ុយអែត ឥណ្ឌូនេស៊ី សាធារណរដ្ឋប្រជាមានិតឡាវ ម៉ាឡេស៊ី សហព័ន្ធសាធារណរដ្ឋ អាល្លឺម៉ង់ បារាំង ចក្រភពអង់គ្លេស សហរដ្ឋអាមេរិក សាធារណរដ្ឋសង្គមនិយមវៀតណាម សាធារណរដ្ឋសហភាពមីយ៉ាន់ម៉ារ ជប៉ុន សាធារណរដ្ឋ សឹង្ហបុរី និងសាធារណរដ្ឋ កូរ៉េ។ រីឯអង្គការមិនមែនរដ្ឋាភិបាលជាតិ និងអន្តរជាតិ រួមមាន៖ NDI, COMFREL, IFES, USAID, UNDP និង UNOHCHR។
នៅក្នុងជុំនួបនោះ លោកស្រី ស៊ីនជុំបូ អនុប្រធាន គ.ជ.ប. បានជំរាបមន្ត្រីស្ថានទូតបរទេស និងអង្គការជាតិ-អន្តរជាតិ អំពីដំណើរការបោះឆ្នោតនៅកម្ពុជា កន្លងមក និងការកសាងបញ្ជីឈ្មោះអ្នកបោះឆ្នោត ពីព្រោះទូតបរទេសខ្លះ ទើបមកបំពេញការងារ និងអ្នកខ្លះ នៅកម្ពុជាយូរឆ្នាំមកហើយ តែចង់ដឹងពីដំណើរការរៀបចំការបោះឆ្នោតនៅកម្ពុជា។
លោកស្រី ស៊ីន ជុំបូ បានមានប្រសាសន៍ថា "នៅឆ្នាំនេះ គ.ជ.ប. សុំធ្វើការអំពាវនាវដល់ប្រជាពលរដ្ឋទាំងអស់ តាមរយៈគណៈអភិបាលខេត្តរាជធានីក្រុង និងស្ថាប័នរដ្ឋ ក្រសួង មន្ទីរក្រុមហ៊ុនឯកជនទាំងអស់ មេត្តាជួយណែនាំបុគ្គលិកមន្ត្រី នៅក្នុងស្ថាប័នរដ្ឋ ក៏ដូចជាឯកជនឲ្យទៅពិនិត្យ និងចុះឈ្មោះបោះឆ្នោតឲ្យបានគ្រប់គ្នា។ បើអ្នកមានឈ្មោះច្រើនកន្លែង សុំមេត្តាលុបឈ្មោះទាំងនោះចេញ ទុកតែមួយកន្លែងបានហើយ។ ជាមួយនោះដែរ គ.ជ.ប. បានធ្វើការណែនាំដល់ក្រុមប្រឹក្សាឃុំសង្កាត់ និងស្មៀនឃុំសង្កាត់ ព្រមទាំងជំនួយការស្មៀនទាំងអស់ ត្រូវតែចូលរួមអនុវត្តបទបញ្ជាណែនាំ របស់គ.ជ.ប. ឲ្យបានត្រឹមត្រូវ សម្រាប់បំរើការចុះឈ្មោះ និងពិនិត្យបញ្ជីឈ្មោះរបស់ប្រជាពលរដ្ឋ ឲ្យមានប្រសិទ្ធិភាពល្អ"។
លោកស្រី ស៊ីន ជុំបូ បានបន្តថា គ.ជ.ប. មានគោលបំណងឲ្យប្រជាពលរដ្ឋ ដែលគ្រប់អាយុបោះឆ្នោត គឺអាយុ ១៨ ឆ្នាំ គិតដល់ថ្ងៃបោះឆ្នោត ថ្ងៃទី២៨ ខែកក្កដា ឆ្នាំ២០១៣ ចូលរួមយ៉ាងសកម្ម ក្នុងការទៅពិនិត្យបញ្ជីឈ្មោះ និងចុះឈ្មោះបោះឆ្នោតឲ្យបានគ្រប់ៗគ្នា។
លោកស្រី ស៊ីន ជុំបូ បានបន្តថា នៅក្នុងកិច្ចពិភាក្សានោះ លោកស្រីឲ្យស្ថានទូតបរទេសទាំងនោះ ចូលរួមផ្លាស់ប្តូរបទពិសោធន៍ការងារបោះឆ្នោត នៃប្រទេសនីមួយៗ ដែលជាដៃគូ និងស្នើឲ្យអង្គការសង្គមស៊ីវិល ចូលរួមនផ្តល់អនុសាសន៍ និងកែលំអរនីតិវិធី និងមានបញ្ហាអ្វី រួមគ្នាដោះស្រាយ។
លោកស្រីអនុប្រធាន គ.ជ.ប. បានមានប្រសាសន៍ឲ្យដឹងដែរថា មកដល់ពេលនេះ មានប្រជាពលរដ្ឋចុះឈ្មោះ សម្រាប់ចូលរួមបោះឆ្នោត នៅឆ្នាំ២០១៣ បានចំនួនជាង ៤០ ម៉ឺននាក់បន្ថែមទៀត។
ជាការកត់សម្គាល់ កិច្ចប្រជុំរវាង គ.ជ.ប. និងមន្ត្រីទូតនានា ប្រចាំកម្ពុជា ព្រមទាំងអង្គការជាតិ និងអន្តរជាតិ កាលពីព្រឹកមិញ បានធ្វើឡើង ក្រោយពីការទទូចស្នើសុំពីគណបក្សប្រឆាំងសមរង្ស៊ី និងសិទ្ធិមនុស្ស ឲ្យមានការផ្លាស់ប្តូរសមាសភាព គ.ជ.ប. និងថា នីតិវិធីនៃដំណើរការពិនិត្យ និងចុះឈ្មោះឆ្នោត មានបញ្ហាស្មុគស្មាញ នាំឲ្យប្រជាពលរដ្ឋ មិនអាចចុះឈ្មោះបោះឆ្នោតបានដោយងាយស្រួលទេ។
រីឯអង្គការឃ្លាំមើលការបោះឆ្នោត ខុមហ្វ្រែល វិញ ក៏បានសរសេរក្នុងរបាយការណ៍បឋមរបស់ខ្លួន គិតត្រឹមថ្ងៃទី២១ ខែកញ្ញា ឆ្នាំ២០១២ ខុមហ្វ្រែល សង្កេតទៅលើប្រតិបត្តិការ នៃការពិនិត្យបញ្ជីឈ្មោះ និងចុះឈ្មោះបោះឆ្នោត ឃើញថា មានភាពមិនប្រក្រតី នៅឃុំ/សង្កាត់ មួយចំនួន ទាក់ទងនឹងការមិនគោរពនីតិវិធី នៃការចុះឈ្មោះបោះឆ្នោត ជាពិសេសនៅដំណាក់កាលចាប់ផ្តើម ដូចជា ការមិនគោរពម៉ោងធ្វើការ ការមិនបិទបញ្ជីបោះឆ្នោតចុងក្រោយ ( បញ្ជីឆ្នាំ២០១១ ) ការចុះឈ្មោះបោះឆ្នោត ដោយមិនមានវត្តមានសាមីខ្លួន...។ល៕
