នៅទីស្តីការគណៈរដ្ឋមន្រ្តីនាព្រឹកថ្ងៃទី ២៦ ខែកញ្ញា ឆ្នាំ២០១២ មានបើកកិច្ចប្រជុំលើកទី១២ របស់ក្រុមប្រឹក្សាភិបាលរាជបណ្ឌិតសភាវិជ្ជាជីវៈតុលាការ ក្រោមអធិបតីភាពរបស់ឯកឧត្តម បណ្ឌិត សភាចារ្យ សុខ អាន ឧបនាយករដ្ឋមន្រ្តី រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី។
ក្នុងកិច្ចប្រជុំលើកទី១២ របស់ក្រុមប្រឹក្សាភិបាលរាជបណ្ឌិតសភាវិជ្ជាជីវៈតុលាការធ្វើឡើងដើម្បី ពិនិត្យអនុម័តសេចក្តីព្រាងក្រមសីលធម៌វិជ្ជាជីវៈនៃរាជបណ្ឌិតសភាវិជ្ជាជីវៈតុលាការក៏ដូចជាបទបញ្ជាផ្ទៃក្នុងសម្រាប់ សិស្សចៅក្រម សិស្សព្រះរាជអាជ្ញា សិស្សក្រលាបញ្ជី អាជ្ញាសាលា និងសាការីក្នុងគោលបំណង ធ្វើយ៉ាងណាធានា ឱ្យមានការលើកម្ពស់នូវកិត្យានុភាព របស់សាលាក៏ដូចជាការគោរព ស្រលាញ់នូវមនសិកាវិជ្ជាជីវៈរបស់សិស្សព្រមទាំង ជួយរួមចំណែកលើកកម្ពស់សីលធម៌ របស់សង្គមកម្ពុជាឡើងវិញដើម្បីចូលរួមចំណែកអភិវឌ្ឍន៍នីតិរដ្ឋ ក៏ដូចជាកេរិ៍្តឈ្មោះរបស់វីជ្ជាជីវៈតុលាការ។
មានប្រសាសន៍ក្នុងកិច្ចប្រជុំនោះឯកឧត្តមបណ្ឌិតសភាចារ្យ សុខ អាន ដែលជាប្រធានក្រុប្រឹក្សានៃរាជបណ្ឌិតសភាវីជ្ជាជីវៈតុលាការផងដែរ បានស្នើរសំឱ្យមានការកែលម្អរបន្ថែមទៅលើយន្តការមួយចំនួន ដែលមានស្រាប់ដូចជា ការធ្វើការពិចារណា ទី១ ធ្វើយ៉ាងណាបញ្ចូលនូវបញ្ញាតិមួយចំនួនក្នុងគោលដៅលើកទឹកចិត្តឱ្យមាន ចៅក្រមមេធាវី ឬក៏អ្នកច្បាប់ផ្សេងទៀតដែលមានបំណងក្នុងការស្រាវជ្រាវហើយចាប់អារម្មណ៍ចូលរួមក្នុងកិច្ចការបណ្តុះបណ្តាល នៅរាជបណ្ឌិតសភាវិជ្ជាជីវៈតុលាការនេះដើម្បីមានលទ្ធភាពភ្ជាប់ឧបនិស្ស័យរបស់ខ្លួនទៅនិងការបណ្តុះបណ្តាល វិជ្ជាជីវៈ ដើម្បីធ្វើឱ្យការបណ្តុះបណ្តាលមាននិរន្តរភាព ។ព្រោះបច្ចុប្បន្នឃើញថា រាជបណ្ឌិតសភាវិជ្ជាជីវៈតុលាការពុំទាន់មានគ្រូបណ្តុះបណ្តាល ប្រចាំការនូវនឹងសាលាទេ ។ដូច្នេះការបញ្ចូលយន្តការនេះអាចនឹងជួយឱ្យសាលាបណ្តុះបណ្តាល វិជ្ជាជីវៈតុលាការកាន់តែមានប្រិយភាព។
ឯកឧត្តម បណ្ឌិត សុខ អាន ក៏បានមានប្រសាសន៍បន្ថែមថា ឧត្តមក្រុមប្រឹក្សានៃអង្គចៅក្រម ក៏ដូចជាគណៈមេធាវីនៃព្រះរាជាណាចក្រកម្ពុជា គប្បីធ្វើការកែសម្រួលច្បាប់ស្តីពីលក្ខន្តិកៈរបស់ខ្លួនដើម្បីធ្វើយ៉ាងណាបង្កើតឱ្យមាន នូវកាព្វកិច្ចដល់ចៅក្រម ព្រះរាអាជ្ញា និងមេធាវី ដើម្បីធ្វើការចូលរួមក្នុងការ បណ្តុះបណ្តាល និងធ្វើការស្រាវជ្រាវ នៅមជ្ឈមណ្ឌលបណ្តុះបណ្តាលវិជ្ជាជីវៈតុលាការ ដើម្បីធានានូវនិរន្តរភាព និងកិត្យានុភាពរបស់វិជ្ជាជីវៈតុលាការ។
ឯកឧត្តម បណ្ឌិត សុខ អាន បានផ្តល់ជាអនុសាសន៍បន្ថែម អំពីការស្នើរសុំឱ្យមានការបញ្ចូលនូវយន្តការមួយចំនួនដែលចាំបាច់ដើម្បីធានាឱ្យមាននូវ ការអនុគ្រោះក៏ដូចជាការធានា នូវការគោរពសិទ្ធិជាមូលដ្ឋានរបស់សិស្សនៃរាជបណ្ឌិតសភាវិជ្ជាជីវៈតុលាការ ក្នុងការតវ៉ាការពារខ្លួនចំពោះវិធានការវិន័យផ្សេងៗដែលរាជបណ្ឌិតសភាវិជ្ជាជីវៈតុលាការបានបង្កើតឡើង ។
បញ្ញត្តិនេះបានផ្តល់សិទ្ធឱ្យសិស្សនៃវិជ្ជាជីវៈតុលាការធ្វើសារណាការពារខ្លួនទៅក្រុមប្រឹក្សាភិបាលនៃរាជបណ្ឌិតសភាវិជ្ជាជីវៈតុលាការបើទោះជាមិនបានឆ្លងក្រុមប្រឹក្សាវិន័យប្រចាំសាលាភូមិន្ទវិជ្ជាជីវៈតុលាការនីមួយៗក៏ដោយ ។
ពាក់ព័ន្ធនិងក្រមសីលធម៌ ឯកឧត្តម បណ្ឌិត សុខ អាន ក្នុងនាមជាប្រធានក្រុមប្រឹក្សាភិបាលរាជបណ្ឌិតសភាវីជ្ជាជីវៈតុលាការ បានផ្តល់អនុសាសន៍ឱ្យការរៀបចំក្រមសីលធម៌និងបទបញ្ជាផ្ទៃក្នុងនៃរាជបណ្ឌិតសភាវីជ្ជាជីវៈតុលាការបង្កើតនូវកាព្វកិច្ចមួយ ឱ្យសិស្សដែលទទួលការបណ្តុះបណ្តាលនៅរាជបណ្ឌិតសភាវីជ្ជាជីវៈតុលាការ ត្រូវតែគោរព និង អនុវត្តន៍ ដើម្បីជាប្រយោជន៍ជួយលើកកម្ពស់កិត្យានុភាពវិជ្ជាជីវៈនៃតុលាការ។
ជាលទ្ធផលក្រុមប្រឹក្សាភិបាលនៃរាជបណ្ឌិតសភាវិជ្ជាជីវៈតុលាការ បានអនុម័តទៅលើសេចក្តីព្រាងនៃបទបញ្ជាផ្ទៃក្នុងនិងក្រមសីលធម៌នេះជាស្ថាពរដោយគ្រាន់ស្នើសុំឱ្យមានការកែលម្អរពាក្យពេជ្ជន៍ និងយន្តការបន្តិចបន្តូចបន្ថែមដើម្បីធានាបាននូវតុល្យភាពក្នុងការការពារផលប្រយោជន៍ស្របច្បាប់របស់សិស្សក្នុងការធ្វើការតវ៉ា ចំពោះយន្តការដាក់ទណ្ឌកម្មមួយចំនួន ។
ទីបញ្ចប់ក្រុមប្រឹក្សាក៏បានអនុម័ត សម្រេចជាផ្លូវការឱ្យរាជបណ្ឌិតសភាវិជ្ជាជីវៈតុលាការធ្វើការរៀបចំប្រឡងប្រជែងជ្រើសរើសសិស្សចៅក្រម សិស្សសាការី ក្រឡាបញ្ជីនិងសិស្សអាជ្ញាសាលា ដើម្បីទទួលបានណុវការបណ្តុះបណ្តាល នៅររាជបណ្ឌិតសភាវិជ្ជាជីវៈតុលាការ ក្នុងគោលដៅបំពេញសេចក្តីត្រូវការរបស់ តុលា និងសាលាជម្រុះក្តីគ្រប់ជាន់ថ្នាក់ ក៏ដូចជាចូលរួមចំណែក ធានានូវប្រសិទ្ធិភាពក្នុងការអនុវត្តន៍ ច្បាប់និងក្រមថ្មីៗនៃព្រះរាជាណាចក្រកម្ពុជា ដែលទើបតែបានអនុម័ត នាពេលកន្លងមក៕