នៅក្នុងពិធីប្រគល់ប័ណ្ណកម្មសិទ្ធិដីធ្លីជូនប្រជាពលរដ្ឋចំនួន ៦៨៥ គ្រួសារនៅ ឃុំព្រងិល និងឃុំលាច ស្រុកភ្នំក្រវាញ ខេត្តពោធិ៍សាត់ នាថ្ងៃទី ១ ខែតុលាឆ្នាំ២០១២ សម្តេចអគ្គមហាសេនាបតីតេជោ ហ៊ុន សែន បានអះអាងជាថ្មីអំពីការបន្តមិនយកពន្ធដីកសិកម្មពីប្រជាពលរដ្ឋដែលជាកសិករ។
សម្តេច តេជោបានមានប្រសាសន៍ពន្យល់ថា ដីសម្បទានសេដ្ឋកិច្ចចាប់ពីឆ្នាំទី ៦ ទៅរដ្ឋយកពន្ធ ៥ ដុល្លារសហរដ្ឋអាមេរិកក្នុងមួយហិកតា ហើយមួយឆ្នាំឡើង ១ភាគរយ ប៉ុន្តែសម្រាប់ដីកសិកម្មរបស់ប្រជាពលរដ្ឋ យើង មិនយកពន្ធទេ។
សម្តេចតេជោនាយក រដ្ឋមន្ត្រីមានប្រសាសន៍ថា គណបក្សប្រជាជនកម្ពុជាមានគោលនយោបាយមិន យកពន្ធលើដីកសិកម្ម ហើយបានអនុវត្តអស់រយៈពេល ៣៣ ឆ្នាំមកហើយៗ ប្រជាជនកម្ពុជាទាំង អស់គ្នាសុទ្ធតែបានដឹងបានឭ។ ចំណែកអ្នកដទៃតើប្រជាជនទុកចិត្តហើយឬនៅថា គេមិនយកពន្ធដី បើមួយថ្ងៃៗឃោសនាតែពីរឿងដំឡើងប្រាក់ខែ។ សម្តេចតេជោថ្លែងថា រាជរដ្ឋាភិបាលត្រូវការដំឡើង ប្រាក់ខែ ប៉ុន្តែត្រូវដំឡើងកំរិតណាដើម្បីកុំឲ្យកសិករលៀនអណ្ដាត បើយកពន្ធមួយហិកតា ៥ ម៉ឺនរៀលឬ ១០ ម៉ឺនរៀលនឹងស្លាប់ប្រជាពលរដ្ឋមិនខាន។
សម្តេចតេជោនាយក រដ្ឋមន្ត្រីក៏មានប្រសាសន៍ថា សម្តេចធ្លាប់បានប្រាប់ជំនាញការបរទេសថាកសិករ កម្ពុជាមិនតម្រូវឲ្យយកពន្ធពីគាត់ទេ ហើយមិនត្រឹមតែមិនយកពន្ធពីពួកគាត់ទេ ប៉ុន្តែត្រូវជួយគាត់ថែម ទៀត តាមរយៈការកសាងហេដ្ឋារចនាសម្ព័ន្ធសព្វបែបយ៉ាងដើម្បីជួយគាំទ្រពួក គាត់ ហើយដែលយើង បាន និងកំពុងតែអនុវត្តនោះហើយ។
ទាក់ទងនិងបញ្ហាចោទប្រកាន់របស់គណៈបក្សប្រឆាំងថារាជរដ្ឋាភិបាលធ្វើដើម្បីផលប្រយោជន៍នយោបាយ សម្តេចតេជោនាយករដ្ឋមន្ត្រីមានប្រសាសន៍បញ្ជាក់ថា «ខ្ញុំ ប្រាប់ឲ្យត្រង់សូមកុំល្ងង់ពេកគ្មានអ្នកណា ធ្វើសម្រាប់តែខាតទេ បើធ្វើសម្រាប់ខាតមិនបាច់ធ្វើទេ។ ខ្ញុំគ្មានក្បួនធ្វើដូចក្រុមប្រឆាំងទេ ។ ធ្វើដូចពួក លោកឯងមិនទទួលបានការគាំទ្រ ព្រោះចេះតែស្រែកពាសវាលពាសកាល ប៉ុន្តែបែរជាទៅបន្ទោស គណៈកម្មាធិការជាតិរៀបចំការបោះឆ្នោតទៅវិញ។
សម្តេចតេជោ នាយករដ្ឋមន្ត្រីមានប្រសាសន៍ថា រាជរដ្ឋាភិបាលបានធ្វើសកម្មភាពជាក់ស្តែង ដើម្បីប្រទេសជាតិ ដើម្បីប្រជាជន ហើយបានទួលការគាំទ្រ ប៉ុន្តែពួកប្រឆាំងបានចោទថា ជាសកម្មភាពដើម្បី យកចំណេញខាងនយោបាយ។ ខ្ញុំសូមប្រាប់ថាបើនិយាយសម្រាប់តែខាតសូមកុំ និយាយអី ហើយខ្ញុំសូម អរគុណចំពោះប្រជាពលរដ្ឋនៅខេត្តពោធិ៍សាត់ ដែលបានបោះឆ្នោតជូនគណបក្សប្រជាជនកម្ពុជា ឲ្យឈ្នះទាំង ៤ កៅអីនៅក្នុងខេត្តនេះ។
ដោយថ្លែងសំដៅទៅកាន់ក្រុមប្រឆាំងថា នៅពេលដែលសម្តេចនិយាយខ្លាំងៗ ក្រុមប្រឆាំងនិយាយថា សម្តេចនិយាយអសុរសសម្តេច តេជោបានមានប្រសាសន៍បញ្ជាក់ថានៅពេលគេ(ក្រុមប្រឆាំង)ជេរខ្ញុំថា អាក្បត់ជាតិ អត់អសុរសទេឬ?។ លោកឯង អីក៏ឈ្លើយម្ល៉េះ។
ពាក់ព័ន្ធ ទៅនឹងទំនាស់រវាងប្រជាជន ជាមួយប្រជាជនដែលធ្វើឱ្យមិនអាចវាស់វែងដីធ្លីនៅតាមតំបន់ទាំង ៣ ក្នុងស្រុកស្នួល ខេត្តក្រចេះ ស្រុកគាស់ក្រឡ ខេត្តបាត់ដំបង ស្រុកភ្នំក្រវាញ ខេត្តពោធិ៍សាត់កន្លែង ដែលសម្តេចតេជោ នាយករដ្ឋមន្ត្រីបានអញ្ជើញជាអធិបតីក្នុងពិធីប្រគល់ប័ណ្ណកម្មសិទ្ឋិ ដីធ្លីជូនប្រជាជន ហើយមិនអាច ផ្តល់កម្មសិទ្ធិបានដូចប្រជាជនដទៃទៀតនោះ សម្តេចតេជោមានប្រសាសន៍បញ្ជាក់ថា ចំណុចនេះបានធ្វើឲ្យ ខ្ញុំបានសិក្សា បានរៀនសូត្រអំពីអ្វីទៅដែលហៅថា ភាពមិនចុះសម្រុងគ្នានេះ។បទពិសោធន៍ អំពីភាពមិនចុះសំរុងគ្នា ដែលមិនអាចចេញប័ណ្ណកម្មសិទ្ធិដីធ្លីនេះមានដូច ជា ការកាន់កាប់ត្រួតគ្នា និងភាពមិនចុះសម្រុងគ្នារវាងកូនដើមដែលជំទាស់ជាមួយម្តាយដែលមានប្តី ចុង។
នេះ គឺជាលើកទី ៣ ហើយដែលសម្តេចតេជោនាយករដ្ឋមន្ត្រីបានអញ្ជើញចុះសណេះសំណាលសាក សួរសុខទុក្ខ និងចែកប័ណ្ណកម្មសិទ្ធិដីធ្លីជូនប្រជាពលរដ្ឋ ដែលលើកទី ១ សម្តេចតេជោ និងលោក ជំទាវកិត្តិព្រឹទ្ធបណ្ឌិតបានអញ្ជើញចែកជូនប័ណ្ណកម្មសិទ្ធិដីធ្លី ជូនប្រជាពលរដ្ឋចំនួន ៥៦០ គ្រួសារស្មើ នឹង ៨៩០ ប័ណ្ណនៅឃុំស្រែចារ និងឃុំ២ធ្នូ ខេត្តក្រចេះ កាលពីថ្ងៃទី ២១ កញ្ញា និងលើកទី ២ ចែកជូន ប្រជាពលរដ្ឋចំនួន ៥៩៤ គ្រួសារស្មើនឹងប័ណ្ណកម្មសិទ្ធិ ៩៧២ ប័ណ្ណរស់នៅឃុំឆ្នាល់មាន់ ស្រុកគាស់ ក្រឡ ខេត្តបាត់ដំបងថ្ងៃទី ៣០ កញ្ញាឆ្នាំ ២០១២។
ឯកឧត្តម ខូយ សុខា អភិបាលខេត្តពោធិ៍សាត់ឲ្យដឹងថា ក្នុងការអនុវត្ត គោលនយោបាយចាស់សកម្មភាពថ្មីលើកំណែទំរង់ដីធ្លី ជាពិសេសបទបញ្ជាលេខ ០១ របស់រាជ រដ្ឋាភិបាល និងអនុសាសន៍ដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន និងគោល ការណ៍ណែនាំរបស់ក្រសួងរៀបចំដែនដីនគរូបនីយកម្ម និងសំណង់ គិតត្រឹមថ្ងៃទី ២៧ ខែកញ្ញាឆ្នាំ២០១២ខេត្តពោធិ៍សាត់សំរេចបានលទ្ធផលប្រកាសតំបន់ វិនិច្ឆ័យចំនួន ១២ ទីតាំង បំពេញសាលាបត្រ បានចំនួន ១២៩៤៣ ក្បាលដីបញ្ចូលឈ្មោះក្នុងសម្រង់ បញ្ជីឈ្មោះ ៨ ១២១ គ្រួសារ ចំនួនគ្រួសារផ្ទៀងផ្ទាត់រួច ៨ ២៨៩ គ្រួសារវាស់វែងបាន ១១៣០៩ ក្បាលដីគួសក្បាលដីបាន ៩ ៩០២ក្បាលដីស្មើនិង១៥៤៦២ហិកតា និងបំពេញទំរង់បែបបទទិន្នន័យ បាន ១០៥១៨ ក្បាលដី៕