ឯកឧត្តម បណ្ឌិត សភាចារ្យ សុខ អាន ឧបនាយករដ្ឋមន្រ្តី រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តីបានសម្តែងការស្វាគមន៍ចំពោះជើងហោះហើរថ្មី របស់ក្រុម ហ៊ុន អាកាសចរ ថៃហ្គឺរ ដោយបានចាត់ទុកថា ជើងហោះហើររវាងសិង្ហបុរី-រាជធានីភ្នំពេញនឹងធ្វើឱ្យមានការផ្លាស់ប្តូរវប្បធម៌ ជម្រុញវិស័យទេចរណ៍និងការវិនិយោគ នៅកម្ពុជា។
ក្នុងពិធីសម្ពោធជើងហោះហើររបស់ក្រុមហ៊ុន អាកាសចរថៃហ្គឺរនារសៀលថ្ងៃទី ១ ខែតុលា ឆ្នាំ២០១២ នៅសណ្ឋាគារ អាំងទែកុងទីណង់តាល់ រាជធានីភ្នំពេញ ដោយមានវត្តមាន ឯកឧត្តម ថោង ខុន រដ្ឋមន្រ្តី ក្រសួងទេចរណ៍ ឯកឧត្តម ព្រីមជិត សាដាស៊ីវ៉ាន់ (Premjith Sadasivan) ឯកអគ្គរដ្ឋទូតសិង្ហបុរីប្រចាំនៅព្រះរាជាណាចក្រកម្ពុជា ឧកញ៉ា គិត ម៉េង ប្រធានសភាពាណិជ្ជកម្ម កម្ពុជា និង ជាប្រធានក្រុមហ៊ុន អាកាសចរណ៍កម្ពុជា លោក គួយ ផេងយិន (Koay Peng Yen)នាយកប្រតិបត្តិក្រុមហ៊ុន អាកាសចរណ៍ថៃហ្គឺរ ចូលរួម ឯកឧត្តម បណ្ឌិត សុខ អាន បានមានប្រសាសន៍ឱ្យដឹងថា រាជរដ្ឋាភិបាលកម្ពុជាក្រោមការដឹកនាំប្រកបដោយគតិបណ្ឌិត របស់សម្តេចអគ្គមហាសេនាបតីតេជោ ហ៊ុន សែន បានដាក់ចេញនូវនយោបាយបើកចំហរជើងមេឃក្នុងគោលបំណងសម្រួលការចូលមកព្រះរាជាណាចក្រ កម្ពុជា និង ជម្រុញលើវិស័យទេសចរណ៍ ដែលជាផ្នែកមួយដ៏ចំបងក្នុងការជួយអភិវឌ្ឍន៍សេដ្ឋកិច្ច ។ ការបើកនូវជើងហោះហើរសិង្ហបុរី ភ្នំពេញ នឹងរួមវិភាគទានបន្ថែមទៀតនូវកំណើនវិស័យទេចរណ៍ និងសេដ្ឋកិច្ចនៅប្រទេសកម្ពុជា ។
ដោយបានចាត់ទុកថាការបើកជើងហោះហើរថ្មីរបស់ក្រុមហ៊ុនអាកាសចរណ៍ថៃហ្គឺរថាបានធ្វើឡើងចំពេលវេលា ពិសេសគឺសម្រាប់ការបង្កើតសហគមអាស៊ាននៅឆ្នាំ២០១៥ខាងមុខនេះឯកឧត្តម បណ្ឌិត សុខ អាន បានផ្តល់ជាអនុសាសន៍ថាដើម្បីរក្សាភាពប្រកួតប្រជែងក្នុងពិភពលោកបច្ចុប្បន្ន ក្រុមហ៊ុន អាកាសចរណ៍ថៃហ្គឺរត្រូវតែប្តេជ្ញាក្នុងការរក្សាសុវត្ថភាព សន្តិសុខ ការជឿទុកចិត្ត និង ពេលវេលា សម្រាប់អតិថិជនរបស់ខ្លួន។
លោក គួយ ផេងយិន (Koay Peng Yen) នាយកប្រតិបត្តិក្រុមហ៊ុន អាកាសចរណ៍ថៃហ្គឺរ បានឱ្យដឹងថា ក្រុមហ៊ុន អាកាសចរណ៍ថៃហ្គឺរ នឹង ហោះហើរវាងសិង្ហបុរី ភ្នំពេញ ៧ដងក្នុងមួយសប្តាហ៍។
សូមបញ្ជាក់ថា យន្តហោះជើងទី ១ របស់ក្រុមហ៊ុន អាកាសចរណ៍ថៃហ្គឺរ បានចុះចតនៅព្រលានយន្តហោះអន្តរជាតិភ្នំពេញវេលា ម៉ោង ៨ និង ៣០ នាទីព្រឹក ថ្ងៃទី១ ខែតុលា ឆ្នាំ២០១២។ វត្តមានរបស់ក្រុមហ៊ុន អាកាសចរណ៍ថៃហ្គឺរ ដែលមានកិច្ចសហការជាមួយក្រុមហ៊ុន អាកាសចរណ៍កម្ពុជា បានធ្វើឱ្យព្រះរាជាណាចក្រ កម្ពុជា មានក្រុមហ៊ុន អាកាសចរណ៍ចំនួន ២៥ ក្រុមហ៊ុន។ ក្នុងនោះមាន ៣ក្រុមហ៊ុន មកពីប្រទេសសិង្ហបុរី ដែលរួមមានក្រុមហ៊ុន Silk Airហោះហើរសិង្ហបុរី ភ្នំពេញ ១៤ ក្នុងមួយសប្តាហ៍ ។ សិង្ហបុរី សៀមរាប ១ ថ្ងៃមួយលើក។ ក្រុមហ៊ុន Jetstar ហោះហើ សិង្ហបុរី ភ្នំពេញ ១ថ្ងៃម្តង និង សិង្ហបុរី សៀមរាប ៤ ដងក្នុងមួយសប្តាហ៍ ៕