ព្រះអង្គម្ចាស់ក្សត្រី លូណាបិន ខាលីដ អាល ហ្គាស៊ីមី(Lubnabint Khalid al qasimi )រដ្ឋមន្ត្រី ពាណិជ្ជកម្មក្រៅប្រទេសនៃសហភាពអារ៉ាប់អេមីរ៉េតមានប្រសាសន៍ ជម្រាបជូនសម្តេចអគ្គមហាសេនាបតីតេជោ ហ៊ុន សែន នៅវិមានសន្តិភាព កាលថ្ងៃទី ២ តុលានេះថា ព្រះអង្គម្ចាស់ក្សត្រីផ្ទាល់បានធ្វើការពិភាក្សាយ៉ាងយកចិត្តទុកដាក់ បំផុតជាមួយឯកឧត្តមទេសរដ្ឋមន្ត្រី ចម ប្រសិទ្ធ រដ្ឋមន្ត្រីក្រសួងពាណិជ្ជកម្មពាក់ព័ន្ធនឹងបញ្ហាពង្រីក និងពង្រឹងពាណិជ្ជកម្មនៃប្រទេសទាំងពីរ ពិសេសការធ្វើទំនាក់ទំនងលើវិស័យកសិកម្មដែលផ្តោតលើការនាំចេញ ផលិតផលកសិកម្មស្រូវអង្ករ និងម្ហូបឥស្លាមផងដែរ។
ឯកឧត្តម អ៊ាង សុផល្លែត ជំនួយការសម្តេចតេជោនាយករដ្ឋមន្ត្រីឲ្យដឹងថា នៅក្នុងជំនួបពិភាក្សាគ្នានោះ សម្តេច តេជោនាយករដ្ឋមន្ត្រីបានសំដែងនូវការស្វាគមន៍ចំពោះកិច្ចពិភាក្សា របស់ថ្នាក់ដឹកនាំក្រសួងពាណិជ្ជកម្ម នៃប្រទេសទាំងពីរ ពិសេសការពិភាក្សាលើការនាំចេញអង្ករនិងម្ហូបឥស្លាមពីប្រទេសកម្ពុជា ទៅកាន់សហភាពអារ៉ាប់អេមីរ៉េត។ ជាមួយគ្នានេះ សម្តេចតេជោបានលើកទឹកចិត្តឲ្យមានការពិភាក្សាលើបញ្ហានៃការផលិត ម្ហូបឥស្លាមនៅកម្ពុជាដើម្បីធ្វើការ នាំចេញព្រោះថា កម្ពុជាមានសក្តានុពលនិងវត្ថុធាតុដើមក្នុងការផលិតម្ហូបឥស្លាមសំរាប់ នាំចេញ។សម្តេចតេជោមានប្រ សាសន៍បន្តថា ការផលិតម្ហូបឥស្លាមនៅកម្ពុជាសំរាប់ការនាំចេញនោះនឹងផ្តល់នូវ ទីផ្សារការងារដល់ជនជាតិឥស្លាមកម្ពុជា ដែលកន្លងមកក្នុងរបបខ្មែរក្រហមបានទទួលរងគ្រោះយ៉ាងខ្លាំងនោះ។
ជាមួយនិងការរម្លឹកអំពី ផលិតផលស្រូវនៅកម្ពុជានាពេលបច្ចុប្បន្ននេះមានកំណើនកើនឡើង ជាងការរំពឹងទុក និងការខ្វះខាតគឺម៉ាស៊ីនកិនស្រូវ និងការប្រមូលទិញ នោះ សម្តេចតេជោបានស្នើ ដល់ប្រតិភូក្រសួងពាណិជ្ជកម្មក្រៅប្រទេសសហភាពអារ៉ាប់អេមីរ៉េតឱ្យធ្វើការសិក្សាលើសក្តានុពលស្រូវ អង្ករ ដែលកម្ពុជាមាន ដើម្បីឈានទៅដល់ការវិនិយោគ បង្កើតម៉ាស៊ីនកិនស្រូវរួមទាំងការប្រមូលទិញស្រូវកិនជាអង្ករ សំរាប់ការនាំចេញនោះ។
ទន្ទឹមនិងប្រសាសន៍វាយតំលៃខ្ពស់ចំពោះទំនាក់ទំនង លើវិស័យពាណិជ្ជកម្ម នៃប្រទេសទាំងពីរ(កម្ពុជា-អារ៉ាប់អេមីរ៉េត)ដែលកំពុងមានការរីកចំរើន និងបោះជំហានទៅមុខសម្តេចតេជោមានប្រសាសន៍ ថា បើទោះបីពេលនេះទំហំ ពាណិជ្ជកម្ម នៃប្រទេសទាំងពីរនៅមានទំហំតូចក៏ពិតមែន ប៉ុន្តែវានឹងអាចមានការរីកចំរើនខ្ពស់នៅពេលអនាគតខាងមុខ។
ឯកឧត្តម ជំនួយការឲ្យដឹងបន្តថា នៅក្នុងកិច្ចសន្ទនាគ្នានោះព្រះអង្គម្ចាស់ក្សត្រី លូណាបិន ខាលីដ អាល ហ្គាស៊ីមី(Lubnabint Khalid al qasimi )រដ្ឋមន្ត្រី ពាណិជ្ជកម្មក្រៅប្រទេសនៃសហភាពអារ៉ាប់អេមីរ៉េត បាន ទទួល យកនូវអនុសាសន៍ដ៏ខ្ពង់ខ្ពស់របស់សម្តេចតេជោនាយករដ្ឋមន្ត្រី និងបានសន្យាថា នៅខែឧសភាឆ្នាំ ២០១៣ ប្រតិភូរបស់ព្រះ អង្គម្ចាស់ក្សត្រីនឹងវិលត្រឡប់មកកាន់ប្រទេសកម្ពុជាជាថ្មីម្តងទៀត ដើម្បីផ្តល់នូវគំរោងជាក់លាក់ពីការបណ្តាក់ទុនវិនិយោគ នៅក្នុងប្រទេសកម្ពុជានេះ៕