ដោយ៖ ឯក ថា
ភ្នំពេញថ្ងៃទី ២ ខែតុលា ឆ្នាំ ២០១២: មូលនិធិរូបិយវត្ថុអន្តរជាតិ (IMF) បានព្យាករណ៍ទុកកាលពីថ្ងៃអង្គារថា កំណើនសេដ្ឋកិច្ចកម្ពុជានឹងអាចឡើងរហូតដល់ ៧ ភាគរយដោយសារកំណើននៅក្នុងវិស័យកសិកម្ម ទេសចរណ៍ និងសំណង់។
លោក Olaf Unteroberdoerster នៃនាយកដ្ឋានអាស៊ីបាស៊ីហ្វិចរបស់ស្ថានប័នមូលនិធិរូបិយវត្ថុអន្តរជាតិ (IMF) បានចូលជួបពិភាក្សាជាមួយ ឯកឧត្តមឧបនាយករដ្ឋមន្ត្រីបណ្ឌិតសភាចារ្យ សុខ អាន ហើយបានមានប្រសាសន៍ថា «កំណើនសេដ្ឋកិច្ចមានអន់ថយចាប់ពីប្រទេសចិនរហូតដល់ឥណ្ឌា ក៏ប៉ុន្តែសកម្មភាពសេដ្ឋកិច្ចនៅកម្ពុជាវិញនៅតែមានសភាពរឹងមាំនៅឆ្នាំនេះ។ ដូចេ្នះជាការយល់ឃើញទូទៅកាលព្យាករណ៍ទុករបស់យើងគឺមានចន្លោះពី ៦.៥ ទៅ ៧ ភាគរយ»។
ឯកឧត្តមឧបនាយករដ្ឋមន្ត្រី បានមានប្រសាសន៍ថា ប្រាក់ចំណូលម្នាក់ៗប្រចាំឆ្នាំមាន ៩៣០ ដុល្លារអាមេរិក។ ខ្សែបន្ទាត់នៃភាពក្រីក្រត្រូវបានគេប៉ាន់ស្មានមាន ២៥ ភាគរយ នៃប្រជាជនកម្ពុជាសរុប ១៤ លាននាក់។
កម្ពុជាមានសក្តានុពលខ្ពស់សម្រាប់ការផលិតស្រូវដែលមានបរិមាណប្រហែល ៨ លានតោនសម្រាប់ឆ្នាំ ២០១១-២០១២ ហើយបាននាំចេញនូវបរិមាណស្រូវលើសរបស់ខ្លួនទៅប្រទេសវៀតណាម និងថៃជារៀងរាល់ឆ្នាំ។
ឯកឧត្តមឧបនាយករដ្ឋមន្ត្រី បានមានប្រសាសន៍ថា ព្រះរាជាណាចក្រនេះបាននាំអង្ករចេញ ១៨០ ០០០ តោនកាលពីឆ្នាំទៅហើយដាក់ផែនការនាំអង្ករចេញ ១ លានតោននៅឆ្នាំ ២០១៥ ។
ការដាំកៅស៊ូរបស់ប្រទេសនេះ ក៏មានការកើនឡើងផងដែរពីមួយឆ្នាំទៅមួយឆ្នាំ ហើយរំពឹងទុកថា នឹងមានការប្រមូលផលនិងផលិតផលបន្ថែមទៀត។ ឯកឧត្តមឧបនាយករដ្ឋមន្ត្រី បានមានប្រសាសន៍ថា «ការដំាដុះកៅស៊ូនៅលើដីប្រហម និងខ្មៅបានកើនឡើងយ៉ាងលឿនហើយសង្ឃឹមថានឹងទទួលបានផលបន្ថែមទៀត»។
ព្រះរាជាអច្ឆរិយនេះក៏រំពឹងទុកទទួលបានភ្ញៀវទេសចរប្រមាណ ២ លាន ៨ សែននាក់នៅឆ្នាំ២០១២ ហើយចំនួនតួលេខនោះ កើនឡើងប្រហែល ២០ ភាគរយ ក្នុងមួយឆ្នាំដោយសារប្រទេសនេះ មានសន្តិសុខ សន្តិភាពបន្ថែមទៅលើទេសចរបែបធម្មជាតិ និងវប្បធម៌។
ឯកឧត្តមឧបនាយករដ្ឋមន្ត្រី បានមានប្រសាសន៍ថា យោងទៅតាមអង្គការទេសចរណ៍ពិភពលោក (WTO) បានព្យាករណ៍ទុកថា កម្ពុជានឹងអាចទទួលបានភ្ញៀវទេសចរ ៤ លាននាក់នៅឆ្នាំ ២០១៥ និងប្រហែល ៨ លាននាក់នៅឆ្នាំ ២០២០។
ភ្ញៀវទេសចរចូលមកទស្សនានៅកម្ពុជាតាមនាវាទេសចរ ជើងយន្តហោះ និងផ្លូវគោក។
ឯកឧត្តមបណ្ឌិតសភាចារ្យ សុខ អាន បានមានប្រសាសន៍ថា កាលហោះហើរត្រង់ក៏រួមចំណែកដ៏សំខាន់ផងដែរ នៅក្នុងឧស្សាហកម្មទេសចរណ៍។ ឯកឧត្តមបណ្ឌិតសភាចារ្យតែងតែមានប្រសាសន៍ថា នៅពេលអ្នកទេសចរចូលមកទស្សនាវិស័យដទៃទៀត នឹងចូលមកតាមក្រោយ។
កាលពីយប់មិញ ឧបនាយករដ្ឋមន្ត្រីរូបនេះ បានសម្ពោធបើកការហោះហើរត្រង់របស់ក្រុមហ៊ុនអាកាសចរ Tiger Airways ពីសឹង្ហបុរីមកភ្នំពេញ។ កាលពីសប្តាហ៍មុនឯកអគ្គរដ្ឋទូតប្រទេសកិនយ៉ាបានជម្រាបប្រាប់ ឯកឧត្តមបណ្ឌិតសភាចារ្យ សុខ អាន ថា ក្រុង Nairobi ចង់ឱ្យមានការហោះហើរត្រង់ជាមួយក្រុងភ្នំពេញ។
ការសាងសង់ផ្ទះសំណាក់ និងសណ្ឋាគារកំពុងរីកលូតលាស់ដូចផ្សិតជាសញ្ញាបង្ហាញឱ្យឃើញថាចំនួនទេសចរមកដល់មានការកើនឡើង។
កម្ពុជានឹងធ្វើជាម្ចាស់ផ្ទះនៃសម័យប្រជុំលើកទី ៣៧ របស់កម្មាធិការបេតិកភណ្ឌពិភពលោក
(WHC) នៅឆ្នាំក្រោយហើយកិច្ចការនេះនឹងបញ្ចូនសារមួយដ៏សំខាន់ថែមទៀត ទៅកាន់ពិភពលោកខាងក្រៅថា កម្ពុជាក៏ជាគោលដៅទេសចរមួយដ៏សំខាន់ផងដែរនៅអាស៊ី។
ទេសចរណ៍ វប្បធម៌នៃព្រះរាជាណាចក្រនេះកំពុងតែទាក់ទាញអ្នកទេសចរណ៍បន្ថែមទៀតមកកាន់ប្រទេសនេះ។ អង្គការសហប្រជាជាតិបានចុះបញ្ជីប្រាង្គប្រាសាទអង្គរវត្តជាបេតិកភណ្ឌពិភពលោកនៅឆ្នាំ ១៩៩២ និងប្រាសាទព្រះវិហារនៅឆ្នាំ ២០០៨ ។
ឯកឧត្តមបណ្ឌិតសភាចារ្យ សុខ អាន បានមានប្រសាសន៍ថា កាលពីឆ្នាំទៅមិញការនាំផលិតផលសំលៀកបំពាក់កាត់ដេរមានតំលៃប្រហែលជា ៤ ពាន់លានដុល្លារ។
ឯកឧត្តមបណ្ឌិតសភាចារ្យ សុខ អាន បានមានប្រសាសន៍ថា កម្ពុជាឥឡូវនេះរៀបនឹងចេញច្បាប់សម្រាប់ការផលិតប្រេងទៅឱ្យក្រុមហ៊ុនដ៏ធំរបស់អាមេរិក Chevron ដែលបានរកឃើញធនធានប្រេងនៅក្នុងសមុទ្រកម្ពុជាស្ថិតក្នុងប្លុក A ។ ខណៈដែលក្រុមហ៊ុន ជប៉ុន JOGMEC បន្តការរុករកដើម្បីសម្រាប់ការធ្វើវិភាគទៅលើសក្តានុពលរ៉ែ និងឧស្ម័ននៅខេត្តសៀមរាប។
កម្ពុជារំពឹងទុកថានឹងបង្កើតក្រុមការងាររួមគ្នារវាងរដ្ឋាភិបាល និងក្រុមហ៊ុន Chevron ដើម្បីឱ្យភាគីទាំងពីរនឹងនិយាយភាសាការងារតែមួយទាក់ទងទៅនឹងបញ្ហាកាលផលិតឧស្ម័ន និងប្រេង ការបង់ពន្ធដារ និងប្រាក់ចំណូលនិងបញ្ហាដទៃដែលទាក់ទង់ទៅនឹងការវិនិយោគរ៉ែ និងឧស្ម័ននៅក្នុងប្លុក A នេះ។
ឯកឧត្តមឧបនាយករដ្ឋមន្ត្រី ក៏មានប្រសាសន៍ផងដែរ កម្ពុជារំពឹងថានឹងទទួលបានផលិត
ផលឧស្ម័ន និងប្រេងច្រើនចេញពីតំបន់ត្រួតស៊ីគ្នា (OCA) ជាមួយថៃនៅពេលណាដែលភាគីទាំងសង្ខាងនឹងឈានទៅដល់កិច្ចព្រមព្រៀងមួយ។
រាជរដ្ឋាភិបាលក៏កំពុងខិតខំផងដែរទៅលើកំណែទម្រង់ស៊ីវិល ដើម្បីធ្វើឱ្យប្រសើរឡើងនូវសេវាកម្មសាធារណៈ ហើយកិច្ចការនោះវាតម្រូវឱ្យមានការបណ្តុះបណ្តាលសមត្ថភាពកាន់តែប្រសើរឡើងសម្រាប់មន្ត្រីរាជការស៊ីវិល ដូច្នេះពួកគេអាចបំរើប្រជាជនខ្លួនកាន់តែល្អជាងមុន៕