អាគារសិក្សាថ្មី រួមជាមួយសមិទ្ធផលនានាជាអំណោយរបស់សមាគមសម្របសម្រួលសង្គមនៃរដ្ឋគុយវ៉ែតប្រចាំកម្ពុជាតាមរយៈសមាគមសប្បុរសធម៌ដើម្បីអភិវឌ្ឍកម្ពុជាជូនដល់សហគមន៍ខ្មែរឥស្លាម ភូមិត្រពាំងលើក ឃុំស្មោង ស្រុកទ្រាំង ខេត្តតាកែវ ត្រូវប្រារព្ធពិធីសម្ពោធដាក់ឲ្យប្រើប្រាស់ក្រោមអធិបតីភាព ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្រ្តី រដ្ឋមន្រ្ដីទទួលបន្ទុកទីស្ដីការគណៈរដ្ឋមន្រ្ដី កាលពីព្រឹកថ្ងៃទី២៦ ខែឧសភាឆ្នាំ២០១៣។
តាមការបញ្ជាក់ពីតំណាងសមាគមសម្របសម្រួលសង្គមនៃរដ្ឋគុយវ៉ែតប្រចាំកម្ពុជា បានឲ្យដឹងថា៖ សមិទ្ធិផលនានាដែលសមាគមបានអនុវត្ដគំរោងនៅក្នុងខេត្តតាកែវ រួមមាន កសាងវិហារ សាលារៀន សង់ផ្ទះជូនជនក្រីក្រ ជីកអណ្ដូងទឹកស្អាត គំរោងចែកឧបករណ៍អាជីព គំរោងផ្ដល់ថវិកាប្រចាំខែដល់កុមាកំព្រារ ការផ្ដល់អាហារូបករណ៏ដល់និស្សិត គំរោងលើកកម្ពស់សេវាសុខភាព និងជំនួយសង្រ្គោះបន្ទាន់ ដោយចំណាយថវិកាសរុបប្រមាណជា២០០ពាន់ដុល្លារអាមេរិក។
បើតាមរបាយការណ៍របស់សមាគមដដែលបានឲ្យដឹងទៀតថា៖ ការអនុវត្ដន៍គំរោងមនុស្សធម៌នេះបានខិតខំប្រឹងប្រែងអស់រយៈពេល៧ឆ្នាំកន្លងមក បានគ្របដណ្ដប់នៅតាមបណ្ដាខេត្តនានា ក្នុងព្រះរាជាណាចក្រកម្ពុជាដោយបានចំណាយថវិកាអស់ចំនួន៨លានដុល្លារអាមេរិក ក្នុងទិសដៅដើម្បីរួមចំណែកការកាត់បន្ថយភាពក្រីក្រជូនប្រជាពលរដ្ឋ ឲ្យមានការរីកចំរើន និងមានការអភិវឌ្ឍន៍ជឿនលឿន។
មានប្រសាសន៍សំណេះសំណាលក្នុងពិធីនោះ ឯកឧត្តមបណ្ឌិតសភាចារ្យ សុខ អាន បានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាល និងប្រជាជនគុយវ៉ែត ក៍ដូចជាសមាគមសម្របសម្រួលសង្គមនៃរដ្ឋគុយវ៉ែត ដែលបានអនុវត្តន៍គម្រោងសំរាប់ជួយដល់ប្រជាពលរដ្ឋខ្មែរឥស្លាមនៅកម្ពុជាឲ្យមានជីវភាពកាន់តែប្រសើរឡើងប៉ុណ្ណោះទេ តាមរយៈនៃគម្រោងនេះដែរក៏ជាផ្នែកមួយដ៏សំខាន់ក្នុងការរឹតចំណងមិត្តភាព សាមគ្គីភាព និងសហប្រតិបត្តិការ រវាងប្រជាជន និងប្រទេសទាំង២កម្ពុជា គុយវ៉ែត ឲ្យកាន់តែរឹងមាំថែមទៀត។
ឯកឧត្តមបណ្ឌិតសភាចារ្យ បានមានប្រសាសន៍ទៀតថា៖ ក្រោមការដឹកនាំ ប្រក្របដោយគតិបណ្ឌិតរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្ដីនៃព្រះរាជាណាចក្រកម្ពុជា ប្រជាពលរដ្ឋខ្មែរមានមោទនៈចំពោះនយោបាយ ឈ្នះ ឈ្នះ របស់សម្ដេច បានធ្វើឲ្យប្រទេសជាតិទទួលបានសន្ដិភាពពេញបរិបូរណ៍ ដែលជាមូលដ្ឋានគ្រឹះសំរាប់ការអភិវឌ្ឍន៍សេដ្ឋកិច្ចសង្គមប្រជាពលរដ្ឋរស់ប្រកបដោយភាពសុខសាន្ដ គ្មានជម្លោះ ឬអំពើហឹង្សា ពាក់ព័ន្ធសាសនា ហើយបានប្រកាន់ខ្ជាប់នូវវប្បធម៌ សន្ដិភាព មិត្តភាព និងភាតរៈភាព។ ជាក់ស្ដែងបងប្អូនខ្មែរឥស្លាមទាំងអស់នៅកម្ពុជា មានសិទ្ធសេរីភាពពេញលេញ ក្នុងការគោរពប្រតិបត្តិជំនឿសាសនារបស់ខ្លួនដូចជា ការគ្របក្បាលតាមប្រពៃណីនៅតាមទីសាធារណៈ សិទ្ធិថ្វាយបង្គំគ្រប់ទីកន្លែង សិទ្ធិសូត្រគម្ពីរគូរអានតាមលក្ខណៈជាតិ និងអន្ដរជាតិ ព្រមទាំងសិទ្ធិប្រារព្ធពិធីបុណ្យទានផ្សេងទៅតាមប្រពៃណីសាសនាផងដែរ៕