ក្នុងឱកាសអញ្ជើញជាអធិបតីពិធីសម្ពោធមហាកុដិនៅវត្តលង្កា នាព្រឹកថ្ងៃទី២៧ ខែឧសភា ឆ្នាំ២០១៣ សម្តេចអគ្គមហាសេនាបតីតេជោ ហ៊ុន សែន បានប្រកាសស្នើដល់សមាជិកសភា របស់គណបក្សប្រជាជនកម្ពុជា និងគណបក្សហ្វ៊ុនស៊ិនប៉ិចឲ្យរៀបចំច្បាប់ថ្មីមួយ ដើម្បីដាក់ទោសចំពោះអ្នកណា ដែលនិយាយថា នៅកម្ពុជាមិនមានរបបប្រល័យពូជសាសន៍។
សម្តេចតេជោបានមានប្រសាសន៍ថា អ្នកដែលនិយាយថា នៅកម្ពុជាគ្មានរបបប្រល័យពូជសាសន៍ប៉ុលពត ត្រូវតែមានទោស ដោយនៅសហភាពអឺរ៉ុប ក៏មានច្បាប់ដូច្នេះដែរ ចំពោះអ្នកណាដែលហ៊ាននិយាយថា ហ៊ីត្លែ មិនសម្លាប់មនុស្ស។ “ខ្ញុំចង់ឲ្យសមាជិកសភា ប្រើពេលវេលាដែលនៅសល់ក្នុងអាណត្តិទី៤ តាក់តែងច្បាប់ថ្មីមួយនេះ ដើម្បីដាក់ទោសលើអ្នកណានិយាយថា នៅកម្ពុជាមិនមានរបបប្រល័យពូជសាសន៍”។
ប្រសាសន៍ប្រតិកម្មរបស់សម្តេចតេជោនាយករដ្ឋមន្ត្រី បានធ្វើឡើងនៅក្រោយពេលដែល លោក កឹម សុខា មេដឹកនាំគណបក្សប្រឆាំង បានលើកឡើងនៅក្នុងពិធីសំណេះសំណាលជាមួយប្រជាពលរដ្ឋនៅខេត្តព្រៃវែងថា គុកទួលស្លែង និងរណ្តៅកប់ខ្មោចទាំងប៉ុន្មាននោះ សុទ្ធតែជាសិប្បនិម្មិត្ត ហើយរៀបចំឡើងដោយវៀតណាម។
ដោយបានចាត់ទុកថា ការលើកឡើងរបស់លោក កឹម សុខា ជាការខុសឆ្គងមួយ និងជាការមាក់ងាយលើវិញ្ញាណក្ខន្ធរបស់អ្នកស្លាប់រាប់លាននាក់ ក្នុងរបបខ្មែរក្រហម សម្តេចតេជោបានមានប្រសាសន៍បញ្ជាក់ថា យើងត្រូវតែរៀបចំច្បាប់ថ្មីនោះ ព្រោះក្នុងដំណាក់កាលនេះ តុលាការខ្មែរក្រហម ក៏កំពុងកាត់ទោសមេដឹកនាំខ្មែរក្រហម។ ដូច្នេះយើងក៏មានសិទ្ធិដើម្បីដាក់ទោសចំពោះនរណាដែលលើកឡើងថា នៅកម្ពុជាមិនមានរបបប្រល័យពូជសាសន៍ប៉ុលពត។ បើយើងមិនអាចស្នើឲ្យមានច្បាប់នោះបាន ក៏បានសេចក្តីថា ការបង្កើតតុលាការកាត់ទោសមេខ្មែរក្រហមពេលនេះក៏មិនមានន័យដែរ។ ដូច្នេះគួរតែដោះលែងពួកមេដឹកនាំខ្មែរក្រហមឲ្យមានសេរីភាពទៅ បើសិនជាគេចាត់ទុកថា សេចក្តីស្នើច្បាប់ថ្មីរបស់យើងនោះ វាខុសច្បាប់។
ជាមួយនឹងប្រសាសន៍រំលឹកដល់ការតវ៉ារបស់លោក ជុំ ម៉ី និងលោក ប៊ូ ម៉េង អតីតអ្នកទោសគុកទួលស្លែង(ស២១) តំណាងឲ្យក្រុមជនរងគ្រោះ ដែលបានធ្វើសន្និសីទកាសែតកាលពីថ្ងៃទី២៥ ខែឧសភា ឆ្នាំ២០១៣ ប្រឆាំងនឹងការលើកឡើងរបស់លោក កឹម សុខា សម្តេចតេជោសែនបានចោទជាសំណួរថា "តើគុកទួលស្លែង និងរណ្តៅសាកសពទាំងនោះ ពិតជាសិប្បនិម្មិត្តមែនឬក៏អី? ហើយការលើកឡើងនេះ មិនត្រឹមតែប៉ះពាល់ដល់លោក ជុំ ម៉ី និងលោក ប៊ូ ម៉េង ទេ តែវាបានប៉ះពាល់ដល់ព្រលឹងជនរងគ្រោះកម្ពុជារាប់លាននាក់ ដែលបានស្លាប់ក្នុងរបបប៉ុលពត។ ការនិយាយនេះ ជាការទទួលខុសត្រូវថ្នាក់ជាតិ ដែលអ្នកនិយាយនេះ ត្រូវតែទទួលខុសត្រូវ"។
ក្រៅពីការប្រតិកម្មចំពោះលោក កឹម សុខា ដែលមាក់ងាយចំពោះជនរងគ្រោះក្នុងរបបប្រល័យពូជសាសន៍ប៉ុលពត សម្ដេចតេជោនាយករដ្ឋមន្ត្រីក៏បានថ្លែងឲ្យដឹងផងដែរ ពីកលល្បិចទុច្ចរិតរបស់មេដឹកនាំនៃក្រុមប្រឆាំង ដែលធ្វើសកម្មភាពបំផ្លាញកិត្តិយសរបស់ជាតិ ដោយទៅចូលរួមវេទិកាមួយក្រោមស្លាកសញ្ញាទង់ជាតិផ្សេងទៅវិញ ជាពិសេសគឺការនិយាយមួលបង្កាច់សម្ដេចឪអំពីការធ្វើរដ្ឋប្រហារកាលពីសម័យលន់នល់ កាលពីឆ្នាំ១៩៧០ ថាជាគំនិតរបស់សម្ដេចឪទៅវិញ។
សម្ដេចតេជោបានមានប្រសាសន៍ឲ្យដឹងថា សញ្ញាជាតិរបស់ក្រុមគេផ្សេង ទង់ជាតិរបស់ក្រុមគេផ្សេង ហេតុអ្វីបានជាអ្នកតំណាងរាស្ត្រ ដែលអង្គុយក្នុងសភា ស្បថស្មោះត្រង់នឹងជាតិសាសនា ព្រះមហាក្សត្រ បែរជាទៅចូលរួមក្នុងវេទិកាបែបនេះទៅវិញ។ សម្ដេចតេជោថ្លែងថា មិនគួរណាលាក់បាំងទង្វើរបស់តំណាងរាស្ត្របក្សប្រឆាំងរូបនោះទេ។ សម្ដេចបន្តថា ក្រុមអ្នកទាំងនោះនៅបង្កប់ក្នុងបក្សប្រឆាំង! នេះមិនមែនជាការគំរាមកំហែងផ្នែកនយោបាយទេ ប៉ុន្តែត្រូវឲ្យច្បាស់លាស់! ហ៊ុន សែន គ្មានបំណងបំបិទសិទ្ធិនរណាទេ ប៉ុន្តែហ៊ុន សែន គ្រាន់តែចង់ការពាររាជបល្ល័ង្កការពាររបបរាជានិយម អាស្រ័យធម្មនុញ្ញតែប៉ុណ្ណោះ។ រឿងរ៉ាវដែលមិនគួរឲ្យកើត វាបានកើតទៅជាយ៉ាងនេះ។
គួរបញ្ជាក់ថា យោងតាមរូបភាពដែលផ្សព្វផ្សាយដោយអង្គភាពព័ត៌មាន និងប្រតិកម្មរហ័ស គេបានរកឃើញថា លោក សុន ឆ័យ តំណាងរាស្ត្របក្សប្រឆាំងសមរង្ស៊ី បានធ្វើសកម្មភាពក្នុងវេទិកាសាធារណៈមួយនៅឯបរទេស រៀបចំឡើងដោយក្រុមចលនាអំណាចពលរដ្ឋខ្មែរដឹកនាំដោយ សួន សេរីរដ្ឋា ដោយមានដាក់ស្លាកទង់ជាតិដែលគេធ្លាប់ដឹងថា ជាទង់ជាតិនៃរបបសាធារដ្ឋខ្មែរជាតំណាងទៅវិញ។ ដោយឡែក លោក គង់ គាំ ប្រធានចាំផ្ទះរបស់គណបក្សសមរង្ស៊ី និងជាមន្ត្រីជាន់ខ្ពស់របស់គណបក្សសង្គ្រោះជាតិ បានលើកឡើងក្នុងវេទិកាជាមួយប្រជាពលរដ្ឋនៅស្រុកទ្រាំង ខេត្តតាកែវ កាលពីថ្ងៃទី២៤ ខែឧសភា ឆ្នាំ២០១៣ ដោយនិយាយមួលបង្កាច់ព្រះករុណាព្រះបាទ សម្ដេចព្រះនរោត្តមសីហនុ ព្រះបរមរតនកោដ្ឋថា «ឥឡូវ នរណាគេជឿថា លន់ នល់ ទម្លាក់សម្តេចឪ? ប៉ុន្តែមែនទែន ជាមនុស្សមានជំនឿ ខ្សែកថាអី អូមអាមអី គឺអត់មានក្បត់ស្តេចទេ។ លន់ នល់ គឺអត់មានក្បត់ស្តេចទេ ប៉ុន្តែស្តេចហ្នឹងប្រើ ស្តេចហ្នឹងប្រើ លន់ នល់ ថាឥឡូវហ្នឹង អាសន្នហើយ លោកឯងហ្នឹងធ្វើនាយករដ្ឋមន្ត្រីទៅ ហើយដឹកនាំរដ្ឋាភិបាលហៅថារដ្ឋាភិបាលស្រោចស្រង់ជាតិ។ តើនៅចាំទេ? គឺគាត់ធ្វើនាយករដ្ឋមន្ត្រី និងធ្វើរដ្ឋាភិបាលស្រោចស្រង់ជាតិ ម៉េចបានធ្វើអញ្ចឹង ពីព្រោះយួនវាមកស្រោច ធ្វើឲ្យស្លន់ស្លោអស់រលីងទៅហើយយួនវាមកធ្វើឲ្យឆេះភ្លើងសង្គ្រាម គឺឈ្លោះគ្នាអស់ទៅហើយ ដូច្នេះទើបឲ្យធ្វើរដ្ឋាភិបាលស្រោចស្រង់ជាតិ។ ប៉ុន្តែស្រោចស្រង់ជាតិហ្នឹង លោកថា លន់ នល់ ឯងនៅក្នុងទៅ អញទៅក្រៅ ។ ទៅក្រៅហ្នឹងគឺទៅកុម្មុយនីស្តដែរ អាហ្នឹងមេខ្លោងយួនដែរ។ គេថាមកប្រាប់អីខ្ញុំ បើខ្ញុំឲ្យវាទៅនៅហ្នឹងហើយ ឲ្យដេញយ៉ាងម៉េចបើខ្ញុំឲ្យវានៅ។ រួចហើយ លោកហួសទៅចិន លោកថាមើលទៅពឹងចិនបានហើយ ឲ្យយួនចេញទៅ ដើម្បីឲ្យឯករាជ្យរបស់ព្រះអង្គហ្នឹង រស់រានតទៅទៀត។ ប៉ុន្តែទៅដល់ចិន ចិនគេថា កុំព្រួយព្រះទ័យអី ចាំពួកកុម្មុយនីស្តទាំងអស់ហ្នឹង ដណ្តើមអំណាចពី លន់ នល់ មកថ្វាយព្រះអង្គវិញ។ ដល់អញ្ចឹង លោក ក៏គង់នៅហ្នឹងទៅ»។
ទាក់ទងនឹងករណីលោក គង់ គាំ វាយប្រហារអតីតព្រះមហាវីរក្សត្រ សម្ដេចតេជោសែនបានមានប្រសាសន៍ថា រឿងនេះមិនតូចទេ ធំណាស់! បើយើងមិនគ្រប់គ្រងសភាពការណ៍បានបែបនេះគឺសភាពការណ៍ទៅថ្ងៃមុខវាយ៉ាងណា? កិត្តិនាមរបស់ព្រះមហាវីរក្សត្រ ដែលយើងទាំងអស់គ្នាសំដែងការគោរពដល់នាទីចុងក្រោយ រហូតដល់មានមនុស្សរាប់លាននាក់ទូទាំងប្រទេសធ្វើបុណ្យ សឹងតែ ៩៩ភាគរយ បានចូលរួមពិធីបុណ្យព្រះបរមរនតកោដ្ឋ ដោយសំដែងការអាឡោះអាល័យ។ ប៉ុន្តែហេតុអ្វីបានជាមានមនុស្សបែបនេះ បាននិយាយសំដីយ៉ាងនេះទៅវិញ។ ការលើកឡើងនេះគ្រាន់តែជាការកេងចំណេញ វាយប្រហារទៅលើកុម្មុយនីស្តចិន កុម្មុយនីស្តសូវៀត កុម្មុយនីស្តវៀតណាម បែរជាហ៊ានចោទព្រះករុណាព្រះមហាវីរក្សត្រ ដែលជាជនរងគ្រោះក្នុងរដ្ឋប្រហារថ្ងៃទី១៨ ខែមីនា ឆ្នាំ១៩៧០ របស់លន់នល់ទៅវិញ។ ក្រុមប្រឆាំងបានលើកឡើងថាសម្ដេចឪបានឲ្យលន់នល់ធ្វើរដ្ឋប្រហារតាមរយៈ ឲ្យបង្កើតរដ្ឋាភិបាលស្រោចស្រង់ជាតិហើយព្រះអង្គចេញទៅក្រៅទុក លន់នល់ឲ្យនៅខាងក្នុង។
ដោយចាត់ទុកថាករណីលោក គង់ គាំ មូលបង្កាច់អតីតព្រះមហាវីរក្សត្រជារឿងមិនធម្មតា សម្ដេចតេជោ បានអំពាវនាវចំពោះប្រជាពលរដ្ឋឲ្យមើលពីទង្វើរបស់បក្សប្រឆាំង ដែលបក្សមួយនេះកំពុងចូលរួមប្រកួតប្រជែងនយោបាយ ហើយមេដឹកនាំបក្សរបស់គេនិយាយបែបនេះទៅវិញ។ សម្តេចតេជោបានមានប្រសាសន៍បញ្ជាក់ថា មួយថាប៉ុលពតទួលស្លែងជាកន្លែងសិប្បនិម្មិត មួយទៀតថារដ្ឋប្រហារថ្ងៃទី១៨ មីនា ឆ្នាំ១៩៧០ថាជាសិប្បនិម្មិត ដែលព្រះករុណាព្រះមហាវីរក្សត្រ ព្រះបរមរតនកោដ្ឋ អនុញ្ញាតឲ្យធ្វើបែបនេះ។ “មិនគួរណាទៅជាបែបនេះទេ” ។
សម្ដេចតេជោសែនបានទូលថ្វាយព្រះមហាក្សត្រ និងសម្ដេចម៉ែ ជាទីសក្ការៈ សូមទុកឲ្យកូនចៅការពាររាជបល្ល័ង្ក ដោយមិនចាំបាច់ឲ្យព្រះអង្គទាំងទ្វេចេញមកបកស្រាយនោះទេ គឺទុកឲ្យកូនចៅជាអ្នកបកស្រាយ រួមទាំងគណបក្សហ៊្វុនស៊ិនប៉ិច គួរណាស់តែមានប្រតិកម្មចំពោះសំដីរបស់លោកគង់គាំមន្ត្រីជាន់ខ្ពស់ គណបក្សប្រឆាំងបែបនេះផង៕