សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នាព្រឹកថ្ងៃទី២៩ ខែឧសភា ឆ្នាំ២០១៣ បានក្រើនរំលឹកសារជាថ្មីឲ្យក្រសួង មន្ទីរ ទាំងរដ្ឋ និងវិស័យឯកជននានា ទទួលយកជនពិការចូលបម្រើការងារឲ្យបានច្រើន ទៅតាមអ្វីដែលរាជរដ្ឋាភិបាលបានកំណត់ ក៏ដូចជាបានប្រកាសឲ្យដឹងផងដែរថា ប្រទេសកម្ពុជានឹងធ្វើជាម្ចាស់ផ្ទះសម្រាប់ការប្រកួតកីឡាប៉ារ៉ាស៊ី ហ្គេម(កីឡាជនពិការ)ប្រចាំតំបន់ផងដែរ បន្ទាប់ពីបញ្ចប់ការធ្វើជាម្ចាស់ផ្ទះការប្រកួតកីឡាស៊ីហ្គេមក្នុងឆ្នាំ២០២៣ ខាងមុខនេះ។
នៅក្នុងពិធីប្រកាស ជាផ្លូវការនូវការប្តេជ្ញាចិត្តអនុវត្តអនុសញ្ញាស្តីពីសិទ្ធិជន ពិការ របស់អង្គការសហប្រជាជាតិ ទសវត្សរ៍ជនពិការប្រចាំតំបន់អាស៊ី និងប៉ាស៊ីហ្វិក ឆ្នាំ២០១៣-២០២២ យុទ្ធសាស្ត្រអ៊ីនឈាន់ «ធ្វើឱ្យសិទ្ធិក្លាយជាការពិត» និងការបន្តផែនការយុទ្ធសាស្ត្រជាតិស្តីអំពីពិការភាពឆ្នាំ២០១៤-២០១៨ ដែលប្រព្រឹត្តទៅនៅវិមានសន្តិភាព សម្តេចតេជោនាយករដ្ឋមន្ត្រីមានប្រសាសន៍ថា នៅតាមស្ថានីយ៍ទូរទស្សន៍ទាំងអស់ សូមឲ្យយកចិត្តដាក់ប្រើប្រាស់ជនពិការតាមរយៈដូចជាភាសា គ ព្រោះអ្នកយកព័ត៌មាន ត្រូវមានអ្នកពិការធ្វើដៃជាសញ្ញា សម្រាប់អ្នកពិការ គ ថ្លង់ មើល។ ជនពិការនៅតាមបណ្តាខេត្ត ប្រសិនបើមិនមានក្រុមហ៊ុនផ្តល់ការងារឲ្យធ្វើទេ គួរតែបញ្ចូលទៅក្នុងក្របខ័ណ្ឌរដ្ឋនៅតាមឃុំ-សង្កាត់ ស្រុក។
សម្តេចតេជោបានមានប្រសាសន៍ថា ថ្វីត្បិតតែមានបណ្តាស្ថានីយ៍ទូរទស្សន៍មួយចំនួនបានទទួលយកជនពិការឲ្យចូលធ្វើការហើយ ប៉ុន្តែវាក៏នៅមានស្ថានីយ៍មួយចំនួនមិនទាន់ចាប់អារម្មណ៍នៅឡើយ ដូច្នេះខ្ញុំសូមអំពាវនាវចំពោះបណ្តាស្ថានីយ៍ទូរទស្សន៍នានា យកចិត្តដាក់ដល់ការផ្តល់ការងារដល់ជនពិការ ដោយខ្ញុំគិតថា ស្ថានីយ៍ទូរទស្សន៍មិនចំណាយប្រាក់ច្រើនទេ សម្រាប់បុគ្គលិកដែលយកទៅបំរើការនៅក្នុងការបកប្រែភាសា នៅក្នុងកម្មវិធីព័ត៌មានសម្រាប់ជាការផ្តល់ព័ត៌មានដល់ជនពិការនោះ ព្រោះពិតមែនតែជនពិការគ ថ្លង់ ក៏ប៉ុន្តែក៏មានតម្រូវការទាក់ទិនជាមួយនឹងបញ្ហាព័ត៌មានផងដែរ។
សម្តេចតេជោនាយករដ្ឋមន្ត្រីក៏បានមានប្រសាសន៍ឲ្យដឹងផងដែរថា សម្តេចមានជំនួយការជាលេខាផ្ទាល់ដែលជាជនពិការភ្នែកចំនួន ៣នាក់ ដែលម្នាក់ធ្វើការនៅក្នុងអង្គភាពព័ត៌មាន និងប្រតិកម្មរហ័សនៃទីស្តីការគណៈរដ្ឋមន្ត្រី និង ២នាក់ ទៀតនៅខេត្តបាត់ដំបង ដែលបានបញ្ចប់ការសិក្សាថ្នាក់បរិញ្ញាបត្រ និងកំពុងបន្តទៅកាន់បរិញ្ញាបត្រជាន់ខ្ពស់។ សម្តេចតេជោមានប្រសាសន៍ថា ឥឡូវនេះ ខ្ញុំកំពុងតែចំណាយថវិកាសម្រាប់ការបណ្តុះបណ្តាលជនពិការចំនួនជាង ១០នាក់ នៅថ្នាក់ឧត្តមសិក្សា ដែលសង្ឃឹមថា នៅពេលបញ្ចប់ការសិក្សាពួកគេនឹង មានការងារធ្វើនៅក្នុងស្ថាប័នរបស់រដ្ឋ ឬក៏វិស័យឯកជននោះ។
នៅក្នុងពិធីដែលមានវត្តមានដៃគូអន្តរជាតិចូលរួម សម្តេចតេជោនាយករដ្ឋមន្ត្រីបានមានប្រសាសន៍ឲ្យដឹងថា នៅកម្ពុជាជនពិការមានកម្រិតរៀនចប់បរិញ្ញាបត្រ និងមានមួយចំនួនកំពុងឈានទៅរកបរិញ្ញាបត្រជាន់ខ្ពស់ដោយអក្សរស្ទាប ដែលនេះជាមោទនភាពមួយសម្រាប់ការប្រែភាសា.គ ថ្លង់ ប៉ុន្តែក៏មានអក្សរស្ទាបសម្រាប់ខាងផ្នែកជនពិការភ្នែក ដែលចំណុចនេះគេអាចមើលឃើញបានពីការយកចិត្តទុកដាក់របស់យើងរួម ជាមួយដៃគូអភិវឌ្ឍន៍នានា ដើម្បីបង្កើតឡើងនូវស្ថានភាពបែបនេះ។
ទាក់ទងនឹងតួនាទីជាម្ចាស់ផ្ទះក្នុងការរៀបចំកីឡាស៊ីហ្គេមនៅកម្ពុជា សម្តេចតេជោនាយករដ្ឋមន្ត្រីថ្លែងថា ព្រះរាជាណាចក្រកម្ពុជាមិនទាន់មានលទ្ធភាពធ្វើម្ចាស់ផ្ទះការប្រកួតកីឡានេះនៅមុនឆ្នាំ២០២៣ បានមកដល់ទេ ព្រោះកម្ពុជាត្រូវការរៀបចំច្រើនណាស់ យើងត្រូវការធនធានទាំងឡាយ ដើម្បីនឹងអភិវឌ្ឍន៍ប្រទេសជាតិសិន ដូចជា ផ្លូវថ្នល់ ប្រឡាយទឹក…ដូច្នេះយើងបានស្នើសុំឲ្យមានការយោគយល់ ពីសំណាក់ប្រមុខរដ្ឋ ប្រមុខរដ្ឋាភិបាល នៃបណ្តាប្រទេសអាស៊ានក្នុងឋានៈជាដៃគូរួចហើយ ដើម្បីឲ្យមានការយោគយល់ពីការលំបាករបស់កម្ពុជានោះ។ សម្តេចតេជោនាយករដ្ឋមន្ត្រីមានប្រសាសន៍ថា ខ្ញុំសូមបញ្ជាក់ជូនថា នៅឆ្នាំ២០២៣ ខាងមុខនេះ កម្ពុជានឹងធ្វើជាម្ចាស់ផ្ទះស៊ីហ្គេម បន្ទាប់ពីស៊ីហ្គេមរួចហើយ យើងក៏នឹងចាត់តាំងធ្វើជាម្ចាស់ផ្ទះអាស៊ានប៉ារ៉ាហ្គេមផងដែរ។ សម្តេចតេជោបានគូសបញ្ជាក់ថា យើងនឹងដំណើរការការប្រកួតកីឡានេះដូចប្រទេសនានាដែរ បានសេចក្តីថានៅឆ្នាំ២០២៣ យើងនឹងធ្វើជាម្ចាស់ផ្ទះនៃការប្រកួតកីឡាស៊ីហ្គេម ហើយបន្ទាប់ទៅកីឡារបស់ជនពិការ ក៏នឹងត្រូវប្រកួតនៅក្នុងព្រះរាជាណាចក្រកម្ពុជានៅឆ្នាំ២០២៣ នោះផងដែរ។
សូមបញ្ជាក់ថា ប្រទេសកម្ពុជាធ្លាប់បានធ្វើជាម្ចាស់ផ្ទះការប្រកួតកីឡាបាល់ទះជនពិការពិភពលោកចំនួន ២ដង រួចមកហើយ។
ក្នុងពិធីប្រកាសជាផ្លូវការនូវការប្តេជ្ញាចិត្តអនុវត្តអនុសញ្ញាស្តីពី សិទ្ធិជនពិការរបស់អង្គការសហប្រជាជាតិ ទសវត្សរ៍ជនពិការប្រចាំតំបន់អាស៊ី និងប៉ាស៊ីហ្វិក ឆ្នាំ២០១៣-២០២២ យុទ្ធសាស្ត្រ អ៊ីន ឈាន់ “ធ្វើឲ្យសិទ្ធិក្លាយជាការពិត” និងការបន្តផែនការយុទ្ធសាស្ត្រជាតិស្តីពីពិការភាពឆ្នាំ ២០១៤-២០១៨ សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីកម្ពុជា បានដាក់ចេញនូវអនុសាសន៍ចំនួន ១១ចំណុច ដែលរួមមាន៖
១-ត្រូវបន្ដពង្រឹងពង្រីកវិធានការទប់ស្កាត់ពិការភាព ឱ្យមានប្រសិទ្ធភាពថែមទៀត។ ត្រូវបន្តរក្សានូវសន្តិភាព ដែលយើងមានឲ្យបានស្ថិតស្ថេរ ជំរុញការអភិវឌ្ឍសេដ្ឋកិច្ច សង្គមកិច្ច កាត់បន្ថយភាពងាយរងគ្រោះនៅក្នុងសង្គម ទប់ស្កាត់អំពើហឹង្សា គ្រោះថ្នាក់ចរាចរ គ្រោះថ្នាក់ការងារ ការពង្រឹងប្រព័ន្ធសុខាភិបាល ការដោះមីន និងកាកសំណល់ជាតិផ្ទុះសល់ពីសង្គ្រាម ពង្រឹងនូវសេវាស្តារលទ្ធភាព ពលកម្ម អប់រំ ផ្សព្វផ្សាយការបង្ការពិការភាពឲ្យបានទូលំទូលាយ។
២-ត្រូវជំរុញការអនុវត្ដអនុសញ្ញាអន្តរជាតិនានា ដែលព្រះរាជាណាចក្រកម្ពុជាបានចូលជាភាគី ដូចជាអនុសញ្ញាស្តីពីសិទ្ធិជនពិការ ទសវត្សរ៍ថ្មីនៃជនពិការប្រចាំតំបន់អាស៊ី និងប៉ាស៊ីហ្វិក ផែនការយុទ្ធសាស្ត្រអ៊ីនឈាន់ដើម្បី “ធ្វើឲ្យសិទ្ធិក្លាយជាការពិត” ២០១៣-២០២២ អនុសញ្ញាអូតាវ៉ាស្តី ពីការហាមប្រាមការប្រើប្រាស់ ការរក្សាទុក ការផលិត ផ្ទេរគ្រាប់មីនប្រឆាំងមនុស្ស និងការបំផ្លាញគ្រាប់មីន និងអនុសញ្ញា កតិកាសញ្ញាអន្តរជាតិនានា ដែលទាក់ទងនឹងពិការភាព និងសិទ្ធិជនពិការ ឲ្យទទួលបានលទ្ធផលល្អប្រសើរ ដើម្បីទប់ស្កាត់ពិការភាពលើកកម្ពស់សិទ្ធិជនពិការ និងដាក់បញ្ចូលពិការភាពទៅក្នុងការអភិវឌ្ឍគ្រប់វិស័យ។ ក្រុមប្រឹក្សាសកម្មភាពជនពិការ ដែលមានរដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា ជាប្រធាន ត្រូវដឹកនាំចាត់ចែងអនុវត្តអនុសញ្ញា ស្តីពីសិទ្ធិជនពិការ និងអនុសញ្ញាពាក់ព័ន្ធ ជាមួយក្រសួង ស្ថាប័ន ដៃគូអភិវឌ្ឍន៍សង្គមស៊ីវិល ឲ្យបានល្អ។
៣-ត្រូវបន្តជំរុញការអនុវត្ដច្បាប់ស្ដីពីកិច្ចការពារ និងលើកកម្ពស់សិទ្ធិជនពិការ និងលិខិតបទដ្ឋានគតិយុត្តិមច្បាប់នានាឱ្យមានប្រសិទ្ធភាព។ ច្បាប់និងបទដ្ឋានគតិយុត្តទាំងនេះ គឺជាឧបករណ៍គតិយុត្ដ ដែលមានខ្លឹមសារល្អបំផុតឆ្លើយតបទៅនឹងតម្រូវការចំពោះមុខ ក៏ដូចជារយៈពេលយូរអង្វែងរបស់ជនពិការ។ ច្បាប់និងបទដ្ឋានគតិយុត្តទាំងនេះ នឹងប្រែក្លាយសេវាកម្មជនពិការ ដែលមានចរិតមនុស្សធម៌ភាគច្រើន ទៅជាសេវាដែលមានចរិត ជាប្រព័ន្ធធានារ៉ាប់រងសង្គមសម្រាប់ជនពិការ។ សេវាកម្មតាមបែបថ្មីនេះ វានឹងធានានិរន្ដរភាពជាងសេវាបែបមនុស្សធម៌ ព្រមទាំងអាចជួយពង្រឹងស្មារតីម្ចាស់ការ និងសមត្ថភាពរបស់ជនពិការ ដែលអាចជំរុញល្បឿននៃការធ្វើសមាហរណកម្មជនពិការទៅក្នុងសង្គម ដោយគ្មានឧបសគ្គរារាំង។
៤-ត្រូវបន្ដពង្រឹងពង្រីកសេវាស្ដារ លទ្ធភាពពលកម្មកាយសម្បទាជូនជនពិការ ឱ្យមាននិរន្ដរភាព តាមរយៈការពង្រឹងកិច្ចសហប្រតិបត្ដិការជាមួយអង្គការជាតិ អន្ដរជាតិ និងដៃគូអភិវឌ្ឍន៍ ដើម្បីកៀរគរប្រភពធនធានក្នុងការដំណើរការកម្មវិធី និងការផ្តល់សេវា តាមមជ្ឈមណ្ឌលស្ដារលទ្ធភាពពលកម្ម កាយសម្បទាទូទាំងប្រទេស។ នៅចំណុចនេះ សម្តេចតេជោក៏បានថ្លែងនូវអំណរគុណចំពោះអង្គការអតីតយុទ្ធជនអន្ដរជាតិ អង្គការជនពិការអន្ដរជាតិ អង្គការកម្ពុជាត្រាស្ដ គណៈកម្មាធិការកាកបាទក្រហមអន្ដរជាតិ ទីភ្នាក់ងារអូស្ត្រាលីដើម្បីការអភិវឌ្ឍអន្តរជាតិ អង្គការយូនីសេហ្វ អង្គការកម្មវិធីអភិវឌ្ឍអង្គការសហប្រជាជាតិ អង្គការកាកបាទក្រហមអូស្ត្រាលី អង្គការសុខភាពពិភពលោក ដែលបាននិងកំពុងជួយឧបត្ថម្ភដល់ដំណើរការមជ្ឈមណ្ឌលស្ដារលទ្ធភាពពលកម្ម កាយសម្បទាជូនជនពិការ និងកំពុងសិក្សាលើគម្រោងអភិវឌ្ឍន៍វិស័យពិការភាព។ កាកបាទក្រហមកម្ពុជា ដែលមានកម្មវិធីជាច្រើនជួយដល់ជនពិការ រួមទាំងជនពិការដោយសារមីន និងបានថ្លែងអំណរគុណគ្រប់អង្គការមិនមែនរដ្ឋាភិបាលដែលបានជួយឧបត្ថម្ភ គាំទ្រដល់ដំណើរការមជ្ឈមណ្ឌលស្ដារលទ្ធភាពពលកម្មកាយសម្បទាជូនជនពិការ។
៥-ត្រូវពង្រឹងពង្រីកស្មារតីម្ចាស់ការរបស់ជនពិការផ្ទាល់ ជាកត្ដាគន្លឹះនៃការងារជនពិការ។ បងប្អូនជនពិការទាំងអស់ សូមបន្ដពង្រឹងសេចក្ដីក្លាហាន មានសេចក្ដីសង្ឃឹម និងជំនឿជឿជាក់លើខ្លួនឯង ប្រើប្រាស់សម្បទាដែល នៅមានពុះពារជំនះរាល់ការលំបាក ដើម្បីកសាងជីវភាពរស់នៅដោយឯករាជ្យម្ចាស់ការ រួមចំណែកក្នុងការអភិវឌ្ឍប្រទេសជាតិ។
៦-បន្ដការកៀរគរ ប្រភពធនធាន ដើម្បីអភិវឌ្ឍវិស័យសុខុមាលភាពជនពិការ។ ខ្ញុំសូមដៃគូអភិវឌ្ឍន៍ បន្តជួយដល់វិស័យពិការភាព និងពិចារណាដាក់ចេញនូវគោលនយោបាយសម្រាប់វិស័យពិការភាព ដោយផ្ដោតជាសំខាន់លើការផ្ដល់សេវាគ្រប់ផ្នែកជូនជនពិការ។ អង្គការជាតិ អន្ដរជាតិ សូមបន្ដពង្រឹងការអនុវត្ដនូវកម្មវិធីដែលមានស្រាប់ និងពង្រីកកម្មវិធីថ្មីបន្ថែមទៀតទៅកាន់តំបន់ដាច់ស្រយាល ឬតំបន់ណាដែលពុំទាន់មានសេវាកម្ម ដើម្បីឆ្លើយតបនឹងសេចក្ដីត្រូវការរបស់ជនពិការ។
៧-ត្រូវលើកទឹកចិត្ដឱ្យមានការចូលរួមពីផ្នែកឯកជន រោងចក្រ សហគ្រាស និងគ្រឹះស្ថានទាំងអស់ ក្នុងការងារជនពិការ ការអនុវត្ដដោយស្ម័គ្រចិត្ដ ភ្ញាក់រលឹកនូវកាតព្វកិច្ចដែលមានចែងក្នុងច្បាប់ស្ដីពីកិច្ចការពារ និងលើកកម្ពស់សិទ្ធិជនពិការ និងគាំទ្រដល់ការធ្វើសមាហរណកម្មជនពិការ ដោយដាក់បញ្ចូលបញ្ហាពិការភាពទៅក្នុងសកម្មភាពរបស់ខ្លួន ហើយបង្កលក្ខណៈឱ្យជនពិការទទួលបាននូវការធ្វើសមាហរណកម្មក្មុងកម្រិត អតិបរមា។
៨-ក្រសួងសង្គមកិច្ច អតីតយុទ្ធជន និងយុវនីតិសម្បទា ក្រុមប្រឹក្សាសកម្មភាពជនពិការ ក្រសួង និងស្ថាប័នពាក់ព័ន្ធ ត្រូវបន្ដពង្រឹងការងារពិការភាព និងស្ដារលទ្ធភាពពលកម្មនៅគ្រប់លំដាប់ថ្នាក់ ប្រកបដោយប្រសិទ្ធភាព និងនិរន្ដរភាព និងធ្វើជាស្នូលក្នុងការអនុវត្ដគោលនយោបាយជាតិចំពោះជនពិការ និងជំរុញការអនុវត្ដច្បាប់ស្ដីពីកិច្ចការពារ និងលើកកម្ពស់សិទ្ធិជនពិការអនុសញ្ញាស្តីពីសិទ្ធិជនពិការឱ្យមានប្រសិទ្ធភាព។ អង្គភាពជំនាញ និងរដ្ឋបាលថ្នាក់ក្រោមជាតិគ្រប់លំដាប់ថ្នាក់ ជាពិសេសថ្នាក់ឃុំ សង្កាត់ ត្រូវយកចិត្ដទុកដាក់លើការងារជនពិការ ដោយ បញ្ចូលការងារជនពិការក្នុងផែនការសកម្មភាពនៃអង្គភាពរបស់ខ្លួន និងជំរុញការអនុវត្ដឱ្យមានប្រសិទ្ធភាព។
៩-ត្រូវបន្តរៀបចំយុទ្ធសាស្ត្រជាតិស្តីពីពិការភាពរយៈពេល៥ឆ្នាំ ២០១៤ ដល់ ២០១៨ និងរៀបចំគោលនយោបាយយុទ្ធសាស្ត្រជាតិស្តីពីពិការភាព ដើម្បីដាក់បញ្ចូលទៅក្នុងកម្មវិធីនយោបាយរបស់រាជរដ្ឋាភិបាលអាណត្តិទី ៥ ដោយត្រូវចាត់ទុកវិស័យពិការភាព ជាអាទិភាពមួយនៃរបៀបវារៈ ក្នុងគោលនយោបាយអាណត្តិខាងមុខ។ ត្រូវបន្តផ្តល់អាទិភាពក្នុងការបែងចែកថវិកាជាតិដល់វិស័យសង្គមកិច្ច អប់រំ សុខាភិបាល អភិវឌ្ឍជនបទ កសិកម្ម សំដៅធ្វើឲ្យសេវាសាធារណៈនៃវិស័យទាំងនេះ កាន់តែប្រសើរឡើង ដែលជះឥទ្ធិពលផ្ទាល់ដល់ការអភិវឌ្ឍជនពិការ។ ត្រូវធ្វើការវិភាគថវិកាសង្គមសម្រាប់ជនពិការសំដៅវាយតម្លៃអត្រាធនធាន សង្គម ដែលប្រើប្រាស់បម្រើឲ្យវិស័យដែលពាក់ព័ន្ធនឹងការងារពិការភាព ដើម្បីបម្រើឲ្យការរៀបចំគោលនយោបាយ និងយុទ្ធសាស្ត្រជាតិ ឲ្យកាន់តែមានភាពសុក្រឹត្យថែមទៀត ស្របតាមគោលការណ៍ប្រើប្រាស់ផ្លែផ្កានៃការអភិវឌ្ឍប្រកបដោយសមធម៌។
១០-ខ្ញុំសូមអំពាវនាវបងប្អូនជនពិការ ចូលរួមក្នុងការបោះឆ្នោតជ្រើសតាំងតំណាងរាស្ត្រ នាថ្ងៃទី២៨ ខែកក្កដា ឆ្នាំ២០១៣ ខាងមុខនេះ ដើម្បីបំពេញកាតព្វកិច្ចជាប្រជាពលរដ្ឋ និងជ្រើសរើសអ្នកដឹកនាំដែលបងប្អូនពេញចិត្ត អាចបន្តការអភិវឌ្ឍប្រទេសជាតិ ជាពិសេសអភិវឌ្ឍវិស័យសុខុមាលភាព ជនពិការឲ្យកាន់តែប្រសើរថែមទៀត។ សិទ្ធិនយោបាយរបស់ជនពិការក្នុងការចូលរួមបោះឆ្នោត ការឈរឈ្មោះជាបេក្ខជន បានអនុវត្ត និងកំណត់យ៉ាងច្បាស់នៅក្នុងច្បាប់ និងបទបញ្ជា នីតិវិធីនៃការបោះឆ្នោត។ ការប្រមាថ ការរើសអើងចំពោះពិការភាពរបស់បេក្ខជន ត្រូវបានហាមឃាត់ដោយច្បាប់។
១១-ត្រូវពង្រឹងសកម្មភាពក្រុមប្រឹក្សាសកម្មភាពជនពិការ ឲ្យក្លាយទៅជាយន្តការសម្របសម្រួលរវាងក្រសួង ស្ថាប័នពាក់ព័ន្ធ ដៃគូអភិវឌ្ឍ អង្គការមិនមែនរដ្ឋាភិបាល សង្គមស៊ីវិល វិស័យឯកជន ក្នុងការអនុវត្តភារកិច្ចដែលបានកំណត់ក្នុងអនុក្រឹត្យលេខ ២១៦ អនក្រ.បក ចុះថ្ងៃទី២ ខែឧសភា ឆ្នាំ២០១៣ ស្តីពីការរៀបចំ និងការប្រព្រឹត្តទៅនៃក្រុមប្រឹក្សាសកម្មភាពជនពិការ។ ក្រសួង ស្ថាប័ននិមួយៗ ត្រូវបង្កើតក្រុមការងារសកម្មភាពជនពិការរាជធានី ខេត្តនីមួយៗ ត្រូវបង្កើតក្រុមប្រឹក្សាសកម្មភាពជនពិការ ដើម្បីជាសេនាធិការជួយដល់ក្រសួង ស្ថាប័នរាជធានី ខេត្ត ក្នុងវិស័យពិការភាព។
ឯកឧត្តម អ៊ិត សំហេង រដ្ឋមន្ត្រីក្រសួអសង្គមកិច្ច អតីតយុទ្ធជន និងយុវនីតិសម្បទាបានឱ្យដឹងថា គោលបំណងនៃព្រឹត្តិការណ៍នេះ ដើម្បីបង្ហាញអំពីឆន្ទៈ និងការប្តេជ្ញាចិត្តរបស់រាជរដ្ឋាភិបាលកម្ពុជា ក្នុងការបន្តកិច្ចការពារ និងលើកកំពស់សិទ្ធិជនពិការតាមអនុសញ្ញាស្តីអំពីសិទ្ធិជនពិការដែលបានផ្តល់សច្ចាប័ន កាលពីថ្ងៃទី២០ ខែធ្នូ ឆ្នាំ២០១២ និងចូលជាធរមានសម្រាប់ព្រះរាជាណាចក្រកម្ពុជា នៅថ្ងៃទី១៩ ខែមករា ឆ្នាំ២០១៣ និងការប្រកាសឱ្យអនុវត្តទសវត្សរ៍ជនពិការប្រចាំតំបន់អាស៊ី និងប៉ាស៊ីហ្វិក ឆ្នាំ ២០១៣-២០២២ យុទ្ធសាស្ត្រអ៊ីនឈាន់ ធ្វើឱ្យសិទ្ធិក្លាយជាការពិត ដែលរាជរដ្ឋាភិបាលកម្ពុជាបានដើរតួនាទីយ៉ាងសំខាន់ក្នុងការចូលរួម អនុម័តយុទ្ធសាស្ត្រអ៊ីនឈាន់ក្នុងនាមជាសមាជិកគណៈកម្មាធិការ អង្គការសហប្រជាជាតិប្រចាំតំបន់អាស៊ីប៉ាស៊ីហ្វិក កាលពី ថ្ងៃទី ២ វិច្ឆិកា ឆ្នាំ ២០១២ នៅទីក្រុងអ៊ីនឈាន់ នៃសាធារណរដ្ឋកូរ៉េ។
ឯកឧត្តមរដ្ឋមន្ត្រីបញ្ជាក់ថា យុទ្ធសាស្ត្រនេះមានគោលដៅធំៗចំនួន១០ ជាពិសេសបានសង្កត់ធ្ងន់ទៅលើការកាត់បន្ថយភាពក្រីក្រ និងបង្កើនឱកាសការងារ ការលើកកំពស់ឱ្យមានការចូលរួមនៅក្នុងការរៀបចំគោលនយោបាយ និងការសម្រេចចិត្ត ការពង្រឹងកិច្ចការពារសង្គម ការពង្រីកកិច្ចអន្តរាគមន៍បឋម និងការអប់រំកុមារ ពិការ ធានានូវសមភាពយែនឌ័រ និងការផ្តល់សិទ្ធិអំណាចដល់ស្ត្រីធានានូវការដាក់បញ្ចូលពិការភាព ទៅក្នុងការកាត់បន្ថយគ្រោះមហន្តរាយ និងការគ្រប់គ្រង ជំរុញការផ្តល់សច្ចាប័ន និងការអនុវត្តអនុសញ្ញាស្តីពីសិទ្ធិជនពិការ និងការធ្វើសុខុដុមនីយកម្ម នៃច្បាប់ជាតិដោយផ្សារភ្ជាប់នឹងអនុសញ្ញា និងបង្កើនកិច្ចសហប្រតិបត្តិការរវាងអនុតំបន់ តំបន់និងអន្តរតំបន់។
ឆ្នាំ២០១៣ នេះជាឆ្នាំចុងក្រោយនៃការអនុវត្តផែនការសកម្មភាពជាតិស្តីអំពីពិការភាព រួមបញ្ចូលទាំងជនរងគ្រោះដោយសារមីន និងកាកសំណល់ជាតិផ្ទុះដែលសល់ពីសង្គ្រាម និងត្រូវបន្តរៀបចំផែនការយុទ្ធសាស្ត្រជាតិស្តីពីពិការភាពឆ្នាំ ២០១៤-២០១៨ ស្របតាមអាណត្តិរបស់រាជរដ្ឋាភិបាល។
លោកស្រី ណាន់ដា ក្រៃរីស្ក តំណាងគណៈកម្មាធិការ អ.ស.ប ផ្នែកសេដ្ឋកិច្ច និងសង្គមប្រចាំតំបន់អាស៊ី និងប៉ាស៊ីហ្វិក និងជានាយិកាផ្នែកអភិវឌ្ឍន៍សង្គមនៃគណៈកម្មធិការ អ ស ប ផ្នែកសេដ្ឋកិច្ចប្រចាំតំបន់អាស៊ីប៉ាស៊ីហ្វិក ក្នុងនាម អ ស ប បានសំដែងនូវការអបអរសាទរយ៉ាងស្មោះស្ម័គ្រអស់ពីដួងចិត្តចំពោះ រាជរដ្ឋាភិបាលកម្ពុជា ក្នុងការផ្តល់សច្ចាប័នលើអនុសញ្ញាស្តីពីសិទ្ធិជនពិការកាលពីខែធ្នូកន្លងទៅ។ លោកស្រី ណាន់ដា ក្រៃ រីស្ក មានប្រសាសន៍ថា កម្ពុជាជាប្រទេសទី១ ក្នុងចំណោមរដ្ឋជាសមាជិករបស់គណៈកម្មាធិការ អ ស ប ផ្នែកសេដ្ឋកិច្ច និងសង្គមប្រចាំតំបន់អាស៊ី និងប៉ាស៊ីហ្វិក ដែលបានអនុម័តលើទសវត្សរ៍ជនពិការប្រចាំតំបន់អាស៊ីប៉ាស៊ីហ្វិកឆ្នាំ២០១៣-២០២២ យុទ្ធសាស្ត្រអ៊ីនឈាន់ «ធ្វើឲ្យសិទ្ធិក្លាយជាការពិត» នៅសាធារណរដ្ឋកូរ៉េ កាលពីខែវិច្ឆិកាកន្លងទៅ។
លោកស្រី ណាន់ដា ក្រៃរីស្ក អ ស ប បានកោតសរសើរដល់កម្ពុជា ដែលជារដ្ឋដំបូងគេ បង្អស់ក្នុងចំណោមរដ្ឋជាសមាជិកអាស៊ាន ក្នុងការប្រកាសអនុវត្តន៍យុទ្ធសាស្ត្រអ៊ីនឈាន់នេះ៕