លោកជំទាវបណ្ឌិត ស៊ី លីង ទីប្រឹក្សារដ្ឋាភិបាលចិន និងជាអគ្គនាយិកាវិទ្យាស្ថានខុងជឺទីស្នាក់ការកណ្តាល នាថ្ងៃទី២៩ ខែឧសភា ឆ្នាំ២០១៣ បានកោតសរសើរសមត្ថភាពសម្តេចតេជោនាយករដ្ឋមន្ត្រីក្នុងការដឹកនាំអភិវឌ្ឍន៍ប្រទេសកម្ពុជា ទទួលបានជោគជ័យ។
ឯកឧត្តម អ៊ាង សុផល្លែត ជំនួយការសម្ដេចតេជោនាយករដ្ឋមន្ត្រីបានឱ្យដឹងថា ក្នុងឱកាសចូលជួបសម្តែងការគួរសមនៅវិមានសន្តិភាព នៅមុនពេលនៃការប្រារព្ធពិធីបើកសន្និសីទប្រចាំឆ្នាំ២០១៣ របស់វិទ្យាស្ថានខុងជឺនៃបណ្តាប្រទេសក្នុងទ្វីបអាស៊ីនៅរសៀលថ្ងៃទី២៩ ខែឧសភា ឆ្នាំ២០១៣ លោកជំទាវ ស៊ី លីង បានជម្រាបសម្ដេចតេជោថា សម្តេចជាមនុស្សល្បីឈ្មោះនៅប្រទេសចិន ហើយប៉ុន្មានខែមុន លោកជំទាវ បានស្តាប់បទសម្ភាសន៍សម្តេចជាមួយនឹងទូរទស្សន៍ចិន ដែលបានឆ្លុះបញ្ចាំងឲ្យឃើញថា សម្តេចបានឆ្លងកាត់ការលំបាកយ៉ាងច្រើន។ ក្នុងន័យនេះលោកជំទាវ បានថ្លែងនូវការកោតសរសើរនូវអ្វីដែលសម្តេចតេជោនាយករដ្ឋមន្ត្រី បានឆ្លងកាត់ក្នុងការកសាងប្រទេសកម្ពុជាឲ្យមានការរីកចម្រើនថ្កុំថ្កើងឡើង។
លោកជំទាវ ស៊ី លីង មានប្រសាសន៍ជម្រាបសម្តេចតេជោថា វិទ្យាស្ថានខុងជឺ មាននៅក្នុងប្រទេសចំនួន៩០ ហើយប្រទេសចំនួន៣០ មានវត្តមាននៅក្នុងសន្និសីទដែលរៀបចំនៅក្នុងប្រទេសកម្ពុជា ដោយលោកជំទាវ ស៊ី លីង ចាត់ទុកវិទ្យាស្ថានខុងជឺនៅរាជបណ្ឌិត្យសភាកម្ពុជា គឺជាគំរូដ៏ល្អមួយផងដែរ។
សម្តេចតេជោនាយករដ្ឋមន្ត្រីបានមានប្រសាសន៍ជម្រាបលោកជំទាវ ស៊ី លីង ថា សម្តេចមានការចាប់អារម្មណ៍យ៉ាងខ្លាំងចំពោះវិទ្យាស្ថានខុងជឺ ហើយសម្តេចមានការគាំទ្រដើម្បីជំរុញឲ្យវិទ្យាស្ថានខុងជឺនៅកម្ពុជាមានការរីកចម្រើនឈានឡើង។ សម្តេចតេជោបានមានប្រសាសន៍ចាត់ទុកការរៀបចំសន្និសីទនៅពេលនេះជាផ្នែកមួយ នៃការចូលរួមអបអរសាទរខួបលើកទី៥៥ នៃទំនាក់ទំនងមិត្តភាពរវាងកម្ពុជា-ចិន។
សម្តេចអគ្គមហាសេនាបតីតេជោបណ្ឌិតសភាចារ្យ ហ៊ុន សែន បានផ្តល់កិត្តិយសដ៏ខ្ពង់ខ្ពស់ បំពាក់មេដាយសហមេត្រី ថ្នាក់មហាសេនាជូនលោកជំទាវបណ្ឌិត ស៊ី លីង និងបានបើកសម្ពោធសាខាវិទ្យាស្ថានខុងជឺ នៃរាជបណ្ឌិតសភាកម្ពុជាប្រចាំបណ្ឌិតសភានគរបាលកម្ពុជា ប្រចាំបញ្ជាការដ្ឋានកងពលតូចលេខ៧០ និងប្រចាំវិទ្យាល័យអង្គរផងដែរ៕