ក្នុងពិធីសម្ពោធអគារសិក្សានៅវិទ្យាល័យសម្តេចតេជោ ហ៊ុន សែន ស្ទឹងត្រង់ និងពិធីពុទ្ធាភិសេកព្រះពុទ្ធរូប ទ្រង់ផ្ចាញ់មារ ធ្វើពីថ្មភក់ នៅវត្តព្រះមហោសថសុវណ្ណគិរីបឹងដែង ក្នុងឃុំកក់ ស្រុកស្ទឹងត្រង់ ខេត្តកំពង់ចាម នៅព្រឹកថ្ងៃទី២៤ ខែឧសភា ឆ្នាំ២០១៣ សម្តេចអគ្គមហាសេនាបតីតេជោ ហ៊ុន សែន ដែលអមដំណើរជាមួយដោយសម្តេចកិត្តិព្រឹទ្ធបណ្ឌិត បានអត្ថាធិប្បាយពន្យល់ទៅលើលេខរៀងទី៤ នៅលើសន្លឹកឆ្នោត របស់គណបក្សប្រជាជនកម្ពុជាជាលេខរៀងដែលនាំមកនូវជោគជ័យក្នុងអាណត្តិទី៤។
សម្តេចតេជោមានប្រសាសន៍បញ្ជាក់ថា លេខរៀងទី៤ របស់គណបក្សប្រជាជនកម្ពុជា នៅលើសន្លឹកឆ្នោត សម្រាប់ការបោះឆ្នោតជាតិនៅខែកក្កដាខាងមុខ គឺដូចគ្នានឹងអាណត្តិទី៤ ក្នុងសម័យកាលបោះឆ្នោតឆ្នាំ២០០៨ ដែលគណបក្សប្រជាជនកម្ពុជា ទទួលបានជ័យជម្នះរហូតដល់ ៩០ កៅអី លើសពី ២ ភាគ ៣ ក្នុងចំណោមកៅអីរដ្ឋសភាសរុប ១២៣។ “គណបក្សប្រជាជនកម្ពុជានៅឆ្នាំនេះ គឺជាប់លេខរៀងទី៤ ដូចនឹងអាណត្តិមុនដែរ។ អាណត្តិមុន គណបក្សប្រជាជនកម្ពុជា ដែលស្ថិតនៅលេខរៀងទី៤ លើសនឹ្លកឆ្នោត គឺបានឈ្នះរហូតដល់ទៅ ៩០ កៅអី ដែលមានជាង ២ ភាគ ៣ នៅក្នុងរដ្ឋសភា” ។
សម្ដេចតេជោសែន បញ្ជាក់ថា ជាការងាយស្រួលមួយសម្រាប់ប្រជាពលរដ្ឋដែលគាំទ្រគណបក្សប្រជាជនព្រោះ រូបសញ្ញាដដែល ហើយលេខរៀងទី៤ដដែល ដូច្នេះប្រជាពលរដ្ឋងាយចំណាំក្នុងការគូស បោះឆ្នោតឱ្យគណបក្សប្រជាជន នៅក្នុងការបោះឆ្នោតថ្នាក់ជាតិ ថ្ងៃទី២៨ ខែកក្កដា ឆ្នាំ២០១៣ ខាងមុខ។
សម្តេចតេជោនាយករដ្ឋមន្ត្រីមានប្រសាសន៍ថា សម្តេចមិនចាំបាច់ទៅបកស្រាយលើលេខរៀងរបស់គណបក្សផ្សេងទៀត។ តែមានគណបក្សមួយនោះបានត្រៀមចង់បកស្រាយលើលេខរៀងទី៤ របស់គណបក្សប្រជាជនកម្ពុជា តែត្រូវបានគ្នាគេបានហាមថា មិនបាច់ទេ បកស្រាយតែលេខរៀងខ្លួនឯងទៅ។
សម្តេចតេជោសែនលើកឡើងថា លេខ៤ តំណាងឲ្យវិស័យពុទ្ធចក្រ ដែលមាន ៥ ចំណុច។ ទី១-ពុទ្ធពរទាំង៤ប្រការ គឺអាយុ វណ្ណៈ សុខៈ និងពលៈ។ ទី២-ទិសទាំង៤ ដែលតំណាងឲ្យទិសខាងកើត ខាងលិច ខាងជើង និងទិសខាងត្បូង។ ទី៣-ជាធាតុទាំង ៤ ដែលមានធាតុទឹក ដី ភ្លើង និងធាតុខ្យល់។ ទី៤-ព្រហ្មវិហារធម៌ទាំង៤ រួមមាន ករុណា មេត្តា មុទិតា និងឧបេក្ខា។ ទី៥-តំណាងឲ្យព្រះព្រហ្ម ដែលមានមុខ៤។
សម្តេចតេជោនាយករដ្ឋមន្ត្រីមានប្រសាសន៍ឲ្យដឹងថា លេខ៤ ក៏តំណាងឲ្យផ្នែកអាណាចក្រ ដែលចំណុចទី៦-តំណាងឲ្យយុទ្ធសាស្ត្រចតុកោណ ដើម្បីកំណើន និងសមធម៌។ នៅអាណត្តិទី៥ បន្តទៀតនេះ រាជរដ្ឋាភិបាលនៅតែបន្តអនុវត្តន៍លើគោលនយោបាយយុទ្ធសាស្ត្រចតុកោណដំណាក់កាលទី៣ ដែលគេកំពុងព្រាងសរសេរហើយ។ មួយវិញទៀត ទី៧-នៅទីក្រុងភ្នំពេញ ជារដ្ឋបាល អាជ្ញាធរ និងស្ថាប័នកំពូល ប្រមូលផ្តុំនៅភ្នំពេញ ដែលស្ថិតនៅចំទន្លេចតុមុខ ជាកន្លែងប្រមូលផ្តុំអំណាច។ ចំណែកទី៨-កន្លែងធ្វើការរបស់មេដឹកនាំ និងក្នុងការិយាល័យទាំងអស់ តំណាងឲ្យតុ និងកៅអី ក៏សុទ្ធតែមានជើង ៤ ដែលទ្រតុ និងកៅអីឲ្យរឹងមាំ។
ទាក់ទងនឹងការឃោសនារបស់គណបក្សផ្សេងៗ សម្តេចតេជោបានមានប្រសាសន៍ឲ្យដឹងថា ក្នុងសម័យកាលឃោសនាបោះឆ្នោត កាលពីឆ្នាំ២០០៨ មានមេដឹកនាំគណបក្សមួយនោះ បានចុះពីលើឡានមក ជេរតែម្តងលើស្លាកសញ្ញាគណបក្សប្រជាជនកម្ពុជា ដែលមានរូបសម្តេចប្រមុខដឹកនាំទាំង៣ ដោយលើកឡើងថា ជាជនក្បត់ជាតិ ហើយអាកណ្តាល ខូចជាងគេ។ ប៉ុន្តែសម្តេច បានព្រមានថា បើលើកនេះហ៊ានតែជេរដូចមុនទៀត មុខជានឹងត្រូវប្តឹង ផាកពិន័យទៀតហើយ ដោយអាណត្តិមុន ត្រូវផាក ១០ លានរៀលរួចហើយ (លោកសមរង្ស៊ី ត្រូវគ.ជ.ប. ពិន័យ ១០ លានរៀល ក្នុងរឿងឃោសនា ប្រមាថថ្នាក់ដឹកនាំទាំងបីរបស់គណបក្សប្រជាជនកម្ពុជា)។
សម្តេចតេជោបានអំពាវនាវដល់ថ្នាក់ដឹកនាំគណបក្សនយោបាយ ពិសេសសមាជិកគណបក្សប្រជាជនកម្ពុជាទាំងអស់ ឲ្យរក្សាភាពស្ងប់ស្ងាត់ ដោយមិនត្រូវប្រើអំពើហិង្សាក្នុងពេលបោះឆ្នោតទេ ដោយត្រឹមតែប្រើប្រាស់នូវការរិះគន់ទិតៀន ដោយពាក្យសំដីបានហើយ។
សម្តេចតេជោនាយករដ្ឋមន្រ្តីបានមានប្រសាសន៍បដិសេធន៍ថា សម្តេចមិនធ្វើជាអាយ៉ងរបស់អ្នកណាឡើយ។ សម្តេចធ្លាប់បានដឹកនាំកិច្ចប្រជុំកំពូលអាស៊ានចំនួន ២ដង ដោយមានការចូលរួមពីសំណាក់មេដឹកនាំនៅលើពិភពលោកផងដែរ ដែលបង្ហាញពីសមត្ថភាពដឹកនាំក្នុងនាមជានាយករដ្ឋមន្ត្រី។
សម្តេចអគ្គមហាសេនាបតីតេជោ ហ៊ុន សែន មានប្រសាសន៍ថា នៅពេលដែលខ្ញុំនិយាយភាសាវៀតណាម គេថាខ្ញុំអាយ៉ងវៀតណាម ប៉ុន្តែនៅពេលដែល ខ្ញុំនិយាយភាសាអង់គ្លេស ម៉េចក៏គេមិនថាខ្ញុំជាអាយ៉ងអាមេរិកផងទៅ?។ សម្តេចបានមានប្រសាសន៍ថា «គេដណ្តើមអាមេរិកធ្វើជាចៅហ្វាយគេម្នាក់ឯង។ អ្នកណាក៏ខ្ញុំមិនធ្វើអាយ៉ងដែរ»។ អត់ទេ! ស្មើភាពស្មើសិទ្ធិ។ សម្តេចតេជោមានប្រសាសន៍ឲ្យដឹងថា ខ្ញុំធ្លាប់ធ្វើប្រធានអាស៊ានចំនួន ២ដង ហើយនៅពេលមកប្រជុំនៅភ្នំពេញ ប្រធានាធិបតីអាមេរិក នាយករដ្ឋមន្រ្តីចិន ឥណ្ឌា អូស្រ្តាលី ជប៉ុនក្តីស្តាប់ខ្ញុំ ដែលជាប្រធានអង្គប្រជុំ ខ្ញុំឲ្យអ្នកណានិយាយមុន និយាយក្រោយ ត្រូវស្តាប់ប្រធាន ហើយនៅកន្លែងណាក៏ដូចគ្នាដែរ កុំថាអ្នកឯងជាមហាអំណាចអីក៏ដោយ។ ខ្ញុំក៏ធ្លាប់ធ្វើប្រធានអង្គប្រជុំអន្តរជាតិជាច្រើន ហើយក៏ធ្លាប់ធ្វើអ្នកសម្របសម្រួលដៃគូអាស៊ាន-អឺរ៉ុបផងដែរ។
នៅក្នុងពិធីសម្ពោធសមិទ្ធផលពុទ្ធចក្រ និងអាណាចក្រ ដែលមានតម្លៃជាច្រើនម៉ឺនដុល្លារអាមេរិកនៅក្នុងស្រុកស្ទឹងត្រង់ ខេត្តកំពង់ចាមនោះដែរ សម្តេចតេជោនាយករដ្ឋមន្ត្រី បានប្រកាសឲ្យដឹងអំពីបំណងចង់ឱ្យមានអគារសិក្សាបន្ថែមដោយមិនកំណត់ថា «ឃុំមួយ មានអនុវិទ្យាល័យមួយ»ទេ គឺត្រូវបង្កើតឱ្យមានអនុវិទ្យាល័យតាមភូមិសាស្ត្រសិក្សាតែម្ដង គឺអាចមានពីរ មានបី ឬមាន៤ កន្លែង ទៅតាមកំណើនរបស់សិស្ស។
ទាក់ទងនឹងគោលបំណងនៃការបង្កើនបរិមាណនៃការអប់រំនេះ សម្ដេចតេជោបានមានប្រសាសន៍បញ្ជាក់ថា ដោយសារឃុំខ្លះធំពេកមានចម្ងាយឆ្ងាយពេក ដូច្នេះមិនគួរត្រូវកំណត់ត្រឹមតែមួយឃុំមានអនុវិទ្យាល័យមួយទេ គឺមួយឃុំ អាចមានអនុវិទ្យាល័យច្រើន។ ក្នុងចំណុចនេះ សម្ដេចបានលើកយក ឃុំពាម កោះស្នា នៅស្រុកស្ទឹងត្រង់មក ធ្វើជាគំរូ ដោយឃុំនេះមិនមានប្រជាពលរដ្ឋច្រើនពេកទេ ប៉ុន្តែឃុំនេះ លាតសន្ធឹងតាមបណ្ដោយដងទន្លេ ស្ទើរតែ៦ទៅ៧គីឡូម៉ែត្រ ដែលចាំបាច់ត្រូវឱ្យបង្កើតអនុវិទ្យាល័យចំនួនពីរ។ សម្ដេចតេជោ មានប្រសាសន៍ថា បើពិនិត្យនៅក្នុង ក្របខ័ណ្ឌទូទាំងប្រទេសបន្ទាប់ពីការដាក់ចេញនូវសេចក្ដីថ្លែងការណ៍ សន្ទុក ក្នុងការរៀបចំ «ឱ្យឃុំមួយមានអនុវិទ្យាល័យមួយ» នៅគ្រប់ឃុំទូទាំងប្រទេស ដែលត្រូវបានត្រួតពិនិត្យឡើងវិញនៅឆ្នាំ២០០៨ ហើយត្រូវបានជំរុញឱ្យសម្រេចនៅក្នុងឆ្នាំ២០១២ នោះ ជាទូទៅការឱ្យមួយឃុំមានអនុវិទ្យល័យមួយ ឥឡូវនេះសម្រេចបានជាមូលដ្ឋាន ហើយគឺនៅសេសសល់តែតំបន់ ភូមិភាគឦសាន ដែលពីភូមិមួយ ឬពីកន្លែងមួយទៅកន្លែងមួយ មានការលំបាកមិនអាចកសាងវិទ្យាល័យមួយ ឃុំឱ្យបានមួយនោះទេព្រោះមិនមានកូនសិស្សរៀន។
សូមបញ្ជាក់ថាមុននេះ វិទ្យាល័យសម្ដេចតេជោហ៊ុនសែនស្ទឹងត្រង់ គឺជាអនុវិទ្យាល័យ ប៉ុន្តែដោយមានសប្បុរសជនវៀតណាម ចង់សាងសង់អគារសិក្សាធំមួយ នៅក្នុងទឹកដីប្រវត្តិសាស្ត្រ ជាស្រុកកំណើតរបស់សម្ដេចតេជោហ៊ុនសែននោះទើបមានការជ្រើសរើសទីតាំង ក្នុងអនុវិទ្យាល័យហ៊ុនសែនស្ទឹងត្រង់ ដើម្បីសាងសង់អគារបីជាន់ដែលមាន៣០បន្ទប់ ព្រមទាំងបំពាក់សម្ភារសិក្សា និងមានកុំព្យូទ័រ ព្រីនធ័រ ម៉ាស៊ីនកូពី ដោយចំណាយថវិកាជាង ៥សែន ៦ម៉ឺនដុល្លារអាម៉េរិក ហើយបានបង្កើនកម្រិតសិក្សាពីអនុវិទ្យាល័យទៅជាវិទ្យាល័យ៕