កាលពីថ្ងៃទី ២៤ ខែឧសភា ឆ្នាំ២០១៣ នៅក្នុងវេទិកាជួបប្រជាពលរដ្ឋនៅស្រុកទ្រាំង ខេត្តតាកែវ លោក គង់ គាំ មេដឹកនាំមួយរូបរបស់គណបក្សប្រឆាំងបានលើកឡើងថា៖
“ឥឡូវ នរណាគេជឿថា លន់ នល់ ទម្លាក់សម្តេចឪ? ប៉ុន្តែមែនទែន ជាមនុស្សមានជំនឿ ខ្សែរកឋាអី អូមអាមអី គឺអត់មានក្បត់ស្តេចទេ។ លន់ នល់ គឺ អត់មានក្បត់ស្តេច ទេ ប៉ុន្តែស្តេចហ្នឹងប្រើ លន់ នល់ ថាឥឡូវហ្នឹង អាសន្នហើយ លោកឯងហ្នឹងធ្វើនាយករដ្ឋមន្ត្រីទៅ ហើយដឹកនាំរដ្ឋាភិបាល ហៅថារដ្ឋាភិបាលស្រោចស្រង់ជាតិ។ តើនៅចាំទេ? គឺគាត់ធ្វើនាយករដ្ឋមន្ត្រី និងធ្វើរដ្ឋាភិបាលស្រោចស្រង់ជាតិ ម៉េចបានធ្វើអញ្ចឹង ពីព្រោះយួនវាមកស្រោច ធ្វើឲ្យស្លន់ស្លោអស់រលីងទៅហើយ យួនវាមកធ្វើឲ្យឆេះភ្លើងសង្គ្រាម គឺឈ្លោះគ្នាអស់ទៅហើយ ដូច្នេះទើបឲ្យធ្វើរដ្ឋាភិបាលស្រោចស្រង់ជាតិ។ ប៉ុន្តែ ស្រោចស្រង់ជាតិហ្នឹង លោកថា លន់ នល់ ឯងនៅក្នុងទៅ អញទៅក្រៅ ។ ទៅក្រៅ ហ្នឹងគឺទៅកុំមុយនីស្តដែរ អាហ្នឹងមេក្លោងយួនដែរ មេខ្លោងនឹង គឺមានបីប្រទេស យួនក៏កុំម្មុយនីស្ត សូវៀតក៏កុំម្មុយនីស្ត ចិនក៏កុំម្មុយ នីស្ត។ ប៉ុន្តែសម្តេចឪ ថាយួននេះ ស្និទ្ធជាមួយសូវៀតជាងគេ ពីព្រោះទៅប្រាប់សូវៀតទៅ សូវៀតគេធ្វើ មិនលឺ។ គេថាមកប្រាប់អីខ្ញុំ បើខ្ញុំឲ្យវាទៅនៅហ្នឹងហើយ ឲ្យដេញយ៉ាងម៉េចបើខ្ញុំឲ្យវានៅ។ រួចហើយ លោកហួសទៅចិន លោកថាមើលទៅពឹងចិនបានហើយ ឲ្យយួនចេញទៅ ដើម្បីឲ្យឯករាជ្យរបស់ព្រះអង្គហ្នឹង រស់រានតទៅទៀត។ ប៉ុន្តែ ទៅដល់ចិន ចិនគេថា កុំព្រួយព្រះទ័យអី ចាំពួកកុំមុយនីស្តទាំង អស់ហ្នឹង ដណ្តើមអំណាចពី លន់ នល់ មកថ្វាយព្រះអង្គវិញ។ ដល់អញ្ចឹងលោកក៏គង្គនៅហ្នឹងទៅ....។”
សំដីដែលលោក គង់ គាំ បានរៀបរាប់នេះ គឺជាការបំភ្លៃប្រវត្តិសាស្ត្រ ជាពិសេស មួលបង្កាច់ព្រះកិត្តិនាម របស់អតីតព្រះមហាវីរក្សត្រ សម្តេចព្រះនរោត្តម សីហនុ ព្រះបរមរតនកោដ្ឋ ដើម្បីកេងចំណេញនយោបាយរបស់ខ្លួន ដែលអ្នកសិក្សាស្រាវជ្រាវ និងប្រជាជននៅលើពិភពលោក បានកត់ត្រាទុកក្នុងប្រវត្តិសាស្ត្រ និងដឹងច្បាស់ថាជារដ្ឋប្រហារ ដែល លន់ នល់ បានទម្លាក់សម្តេចព្រះនរោត្តមសីហនុ។
ដូចគ្នានេះដែរ ចំពោះអ្វីដែលលោក កឹម សុខា ប្រធានស្តីទីគណបក្សសង្គ្រោះជាតិ បានលើកឡើងនៅក្នុងវេទិកាសាធារណៈ នៅខេត្តព្រៃវែង កាលពីថ្ងៃទី១៨ ខែឧសភា ឆ្នាំ២០១៣ ថា៖ “គុកទួលស្លែង ជាគុកសិប្បនិមិត្ត” នៃរបបប្រល័យពូជសាសន៍ ប៉ុល ពត ខ្មែរក្រហមនៅកម្ពុជា ចន្លោះឆ្នាំ១៩៧៥ ដល់ឆ្នាំ១៩៧៩ គឺ “គ្រាន់តែជាឆាកល្ខោន ដែលរៀបចំឡើងដោយប្រទេសវៀតណាម និងរណសិរ្យសង្គ្រោះជាតិកម្ពុជា ក្រោមការដឹកនាំរបស់គណបក្សប្រជាជនកម្ពុជាប៉ុណ្ណោះ”។
ផ្ទុយពីការលើកឡើងខាងលើនេះ មជ្ឈមណ្ឌលស្រាវជ្រាវឯកសារកម្ពុជា អង្គការសហប្រជាជាតិ និង ប្រទេសម្ចាស់ជំនួយ បានចំណាយថវិកាអស់ជាង ១៨០ លានដុល្លា នៅក្នុងដំណើរការរបស់អង្គជំនុំជម្រះវិសាមញ្ញ ក្នុងតុលាការកម្ពុជា និងការស្រាវជ្រាវឯកសារប្រវត្តិសាស្ត្រប្រល័យពូជសាសន៍ ហើយថែមទាំងបានកាត់ទោស កាំង ហ្កេចអ៊ាវ ហៅឌុច អតីតមេគុកទួលស្លែង ឬមន្ទីរឃុំឃាំងស២១ ឲ្យជាប់ពន្ធនាគារ អស់មួយជីវិតទៀតផង។
ជាងនេះទៅទៀត រាជរដ្ឋាភិបាល ក្រោមការដឹកនាំរបស់គណបក្សប្រជាជនកម្ពុជា បានផ្តល់យុត្តិធម៌ថ្វាយព្រះករុណា សម្តេចព្រះនរោត្តម សីហនុ ឡើងវិញតាមរយៈការនាំមក ការបង្កើត និង ការការពារយ៉ាងដាច់ខាតនូវរបបរាជានិយមទីពីរ ដូចដែល សម្តេចអគ្គមហាសេនាបតីតេជោ ហ៊ុន សែនបានស្បថចំពោះព្រះបរមរតនកោដ្ឋ ថា “ដរាបណាសម្តេចនៅមានជីវិត សម្តេចប្តេជ្ញាការពាររាជបល្ល័ង្គ ការពារព្រះមហាក្សត្រ ការពារសម្តេចព្រះវររាជមាតាជាតិខ្មែរ ការពាររាជវង្សានុវង្ស និងការពាររបប រាជានិយម ជារៀងរហូត”។
ម្យ៉ាងវិញទៀត ការលើកឡើងរបស់មេបក្សប្រឆាំងទាំង២ រូបនេះ គង់ គាំ និង កឹម សុខា គឺជាចេតនាយ៉ាងច្បាស់លាស់ ក្នុងការបំភ្លៃប្រវត្តិសាស្ត្រ ហើយក៏ជាការបង្ហាញឲ្យឃើញនូវនយោបាយរបស់បក្សខ្លួន ក្នុងការគាំទ្ររបប លន់ នល់ និង របបប្រល័យពូជសាសន៍ ប៉ុល ពត ដែលបានធ្វើឲ្យប្រទេស ជាតិ ធ្លាក់ទៅក្នុងភ្លើងសង្គ្រាមស៊ីវិល និង វិនាសកម្មជាង ២ ទសវត្សរ៍ ដែលមិនធ្លាប់មានក្នុងប្រវត្តិសាស្ត្រ និងក៏ជាការមាក់ងាយចំពោះវិញ្ញាណក្ខ័ន្ធរបស់ជនរងគ្រោះរាប់ម៉ឺននាក់ ដែលបានស្លាប់នៅក្នុងគុកទួលស្លែង និងសាច់ញាតិជនរងគ្រោះជាច្រើននាក់ទៀតដែលបាន និងកំពុងទទួលរងការឈឺចាប់មិនអាចបំភ្លេចបាន។
អ្នកនាំពាក្យអង្គភាពព័ត៌មាន និងប្រតិកម្មរហ័ស សូមអំពាវនាវដល់សាធារណៈមតិជាតិ និង អន្តរជាតិ ជាពិសេសប្រជាជនកម្ពុជាទាំងអស់ ចូលរួមថ្កោលទោសទៅលើមេបក្សប្រឆាំងដែលជាជនអគតិ ទាំង២ រូបនេះ ហើយមេត្តាពិចារណា និងវិនិច្ឆ័យទៅលើសំដីដែលគ្មានការទទួលខុសត្រូវ និងប្រាសចាក ពីការពិតនេះ ដែលយកការភូតកុហក និងការបំភ្លៃប្រវត្តិសាស្ត្រធ្វើជាមូលដ្ឋាន។
រាជធានីភ្នំពេញ ថ្ងៃទី ២៧ ខែ ឧសភា ឆ្នាំ២០១៣
អ្នកនាំពាក្យអង្គភាពព័ត៌មាន និងប្រតិកម្មរហ័ស
នៃទីស្តីការគណៈរដ្ឋមន្ត្រី