យោងតាមប្រភពព័ត៌មានដែលគួរឱ្យជឿទុកចិត្ត
ពីផ្ទៃក្នុងគណបក្សសង្គ្រោះជាតិបានឱ្យដឹងថា លោក កឹម សុខា ធានាថា
ខ្លួនពិតជាបានទទួលដំណែងជាអនុប្រធានទី១រដ្ឋសភា ក្នុងពេលឆាប់ៗខាងមុខ
សមដូចអ្វីដែលលោកធ្លាប់បានគិតថា ដំណែងថ្មីនេះនឹងផ្តល់ជូនលោកនូវមានអំណាចដ៏រឹងមាំក្នុងរដ្ឋសភា។
ដើម្បីបានសម្រេចនូវគោលបំណងនេះ
លោក កឹម សុខា មានគំនិតថា នឹងស្នើសុំឱ្យមានការបោះឆ្នោតជ្រើសតាំងក្បាលម៉ាស៊ីនរដ្ឋសភា
ប្រធាន អនុប្រធាន និងគណៈកម្មការនានានៃរដ្ឋសភា
ក្នុងពេលជាមួយគ្នាជាកញ្ចប់តែម្តង។
ប៉ុន្តែ
បើយោងតាមអ្នកឯកទេសនីតិរដ្ឋធម្មនុញ្ញបានពន្យល់ថា ការបោះឆ្នោតជាកញ្ចប់មិនអាចធ្វើទៅបានទេក្នុងដំណាក់កាលនេះ។
អ្នកច្បាប់បានបន្តទៀតថា បើយោងតាមច្បាប់ធម្មនុញ្ញបន្ថែម ដែលរដ្ឋសភាបានអនុម័ត
កាលពីថ្ងៃទី៨ ខែកក្កដា ឆ្នាំ២០០៤ ហើយដែលព្រឹទ្ធសភាបានឱ្យយោបល់យល់ព្រមកាលពីថ្ងៃទី១២
ខែកក្កដា ឆ្នាំ២០០៤ នាសម័យប្រជុំពេញអង្គលើកទី៩ នីតិកាលទី១ ត្រង់មាត្រា២ និងមាត្រា៣ បានកំណត់យ៉ាងច្បាស់ថា « តាមសំណើររបស់គណបក្សដែលមានអាសនៈច្រើនជាងគេ
រដ្ឋសភាពអាចដំណើរការបោះឆ្នោតជាកញ្ចប់បាន ដើម្បីជ្រើសតាំងប្រធាន
អនុប្រធានរដ្ឋសភា ក៏ដូចជាប្រធាន និងអនុប្រធានគណៈកម្មការ
ក្នុងពេលជាមួយគ្នា និងការផ្តល់សេចក្តីទុកចិត្តចំពោះរាជរដ្ឋាភិបាល
គឺសម្រាប់តែនៅដើមនីតិកាលនីមួយៗ ក្នុងដំណើរការរៀបចំរដ្ឋសភា និងរាជរដ្ឋាភិបាលថ្មីតែប៉ុណ្ណោះ។
ដូចនេះ គំនិតរបស់លោក កឹម សុខា ដែលចង់ឱ្យមានការបោះឆ្នោតជាកញ្ចប់ដើម្បីធានាថា ខ្លួនពិតជាបានអំណាចជាអនុប្រធានទី១រដ្ឋសភានោះ
អាចថា ជាការបំពានលើបញ្ហាផ្លូវច្បាប់៕