នារសៀល
ថ្ងៃទី៧ ខែសីហា ឆ្នាំ២០១៤ មហាសន្និបាតកាកបាទក្រហមកម្ពុជា
បានបោះឆ្នោតជាឯកច្ឆន្ទជ្រើសតាំង សម្ដេចកិត្តិព្រឹទ្ធបណ្ឌិត ប៊ុន
រ៉ានី ហ៊ុន សែន ជាប្រធានកាកបាទក្រហមកម្ពុជាសម្រាប់អាណត្តិទី៦។
ការជ្រើសតាំង សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន
ជាប្រធានកាកបាទក្រហមកម្ពុជាសម្រាប់អាណត្តិទី៦នេះ
ទទួលបានការគាំទ្រយ៉ាងពេញទំហឹងពីសំណាក់ប្រធានប្រតិភូគណៈកម្មាធិការ
អន្តរជាតិ កាកបាទក្រហមប្រចាំភូមិភាគ
ប្រធានប្រតិភូសហព័ន្ធអន្តរជាតិប្រចាំភូមិភាគ កាកបាទក្រហមវៀតណាម
ចិន និងមីយ៉ាន់ម៉ា ដែលបានអញ្ជើញចូលរួម និងជាពិសេសរាជរដ្ឋាភិបាល។
នាឱកាស
អញ្ជើញជាអធិបតីក្នុងពិធីបិទមហាសន្និបាតកាកបាទក្រហមកម្ពុជា
នៅសាលសន្និសីទចតុម្មុខ នារៀសលថ្ងៃទី៧ ខែសីហា ឆ្នាំ២០១៤ដដែល
សម្តេចអគ្គមហាសេនាបតីតេជោ ហ៊ុន សែន
បានសម្តែងនូវការអបអរសាទរចំពោះសម្តេចកិត្តិព្រឹទ្ធ បណ្ឌិត ប៊ុន
រ៉ានី ហ៊ុន សែន ដែលត្រូវបានជាប់ឆ្នោតសាជាថ្មី
ជាប្រធានក្រហមកម្ពុជាក្នុងអាណត្តិទី៦នោះ។
“ខ្ញុំ
សូមសម្តែងនូវការអបអរសាទរផងដែរ ចំពោះសម្តេចកិត្តិព្រឹទ្ធបណ្ឌិត
ដែលត្រូវបានអង្គមហាសន្និបាតបានផ្តល់នូវជំនឿ
និងសេចក្តីសុខចិត្តជាថ្មីជ្រើសតាំងជាប្រធានកាកបាទក្រហមកម្ពុជា
ដើម្បីបន្តគ្រប់គ្រង
និងដឹកនាំកាកបាទកម្ពុជាក្នុងអាណត្តិទី៦នេះជាបន្តទៀត។
ខ្ញុំសូមសម្តែងនូវការគាំទ្រយ៉ាងពេញទំហឹងចំពោះ សមាជិក
សមាជិកាទាំងអស់ នៃគណៈកម្មាធិការកណ្តាល
ដែលបានជាប់ឆ្នោតក្នុងអាណត្តិថ្មីនេះ ក៏ដូចជា ឥស្សរជន អគ្គហិរញ្ញិក
អគ្គលេខាធិការ និងអគ្គលេខាធិការរង
ដែលត្រូវបានទទួលការឯកភាពចាត់តាំងនៅពេលនេះផងដែរ”។ សូមបញ្ជាក់ថា
សមាជិក សមាជិកាគណៈកម្មាធិការកណ្ដាលកាកបាទក្រហមកម្ពុជាអាណត្តិទី៦
មានចំនួន ២៥រូប និងមានសមាជិកបម្រុងចំនួន ៣រូប។
សម្តេចតេជោ
នាយករដ្ឋមន្ត្រីបានមានប្រសាសន៍ដោយសុទ្ធិដ្ឋិនិយមថា
ខ្ញុំមានជំនឿយ៉ាងមុតមាំថា សមាជិកគណៈកម្មាធិការកណ្តាល
ក៏ដូចជាឥស្សរជនអគ្គហិរញ្ញិក អគ្គលេខាធិការ និង អគ្គលេខាធិការរង
មន្ត្រី បុគ្គលិក អ្នកស្ម័គ្រចិត្ត
យុវជនកាកបាទក្រហមកម្ពុជាទាំងអស់នឹងបន្តនូវកិច្ចខិតខំប្រឹងប្រែង
ឲ្យកាន់តែសកម្មខ្លាំងក្លា
ក្នុងបុព្វហេតុដើម្បីបន្តកសាងសមត្ថភាពថ្មីបន្ថែមទៀត
លើការងារមនុស្សធម៌ឲ្យឆ្លើយតបបានទៅនឹងគ្រោះមហន្តរាយនានា
ជាពិសេសការជួយរំលែកនូវទុក្ខលំបាករបស់ប្រជាជនរងគ្រោះនៅ
ទូទាំងប្រទេស។ ដោយអំពាវនាវសមាជិក សមាជិកា គណៈកម្មាធិការកណ្តាលដ៏ដូចជា
ឥស្សរជនអគ្គហិរញ្ញិក អគ្គលេខាធិការ និងអគ្គលេខាធិការរង មន្ត្រី
បុគ្គលិក អ្នកស្ម័គ្រចិត្ត យុវជនកាកបាទក្រហមកម្ពុជាទាំងអស់បន្តពង្រឹង
និងពង្រីកការទទួលខុសត្រូវលើគ្រប់ផ្នែកនោះ
សម្តេចតេជោនាយករដ្ឋមន្ត្រីបានមានប្រសាសន៍បញ្ជាក់ថា
រាជរដ្ឋាភិបាលកម្ពុជា នឹងបន្តជួយគាំទ្រទាំងផ្នែកគោលនយោបាយ ច្បាប់
យន្តការគាំទ្រនានា ព្រមទាំងសម្ភារ និងថវិកាក្នុងការជំរុញ
និងលើកទឹកចិត្តដល់កាកបាទក្រហមកម្ពុជា
ក្នុងការអនុវត្តនូវយុទ្ធសាស្ត្រ ២០១១-២០១០ របស់ខ្លួន
ដើម្បីសម្រេចបានជោគជ័យថ្មីៗថែមទៀតនៅអាណត្តិថ្មីនេះ។
សម្តេច
តេជោនាយករដ្ឋមន្ត្រីបានមានប្រសាសន៍ថា ខ្ញុំសង្ឃឹម និងជឿជាក់ថា
ថ្នាក់ដឹកនាំគ្រប់លំដាប់ថ្នាក់របស់កាកបាទក្រហមកម្ពុជា
នឹងប្តេជ្ញាចិត្តបន្តពង្រឹងការដឹកនាំកាកបាទក្រហមកម្ពុជា
ប្រកបដោយស្មារតីទទួលខុសត្រូវ មានអភិបាលកិច្ចល្អ និងពង្រឹងសាមគ្គីភាព
ឯកភាព មានកិច្ចសហប្រតិបត្តិការ ជួយឧបត្ថម្ភគាំទ្រគ្នាទៅវិញទៅមក
ដើម្បីឆ្លើយតបដល់ការងារជួយសង្គ្រោះជីវិតមនុស្ស
ការងារដោះស្រាយបញ្ហាប្រឈមមុខនានា ការលើកតម្លៃ
និងសេចក្តីថ្លៃថ្នូររបស់មនុស្សជាតិ
ឲ្យសក្ដិសមជាសមាគមជាតិនាំមុខគេ ក្នុងវិស័យមនុស្សធម៌នោះ។
នៅ
ក្នុងតួនាទីជាប្រធានកាកបាទក្រហមកម្ពុជាសម្រាប់អាណត្តិទី៦
សម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុន សែន បានមានប្រសាសន៍សន្យាថា
ខ្ញុំសូមធ្វើការប្តេជ្ញាចិត្តបន្តពង្រឹងការដឹកនាំកាកបាទក្រហម
កម្ពុជា ប្រកបដោយស្មារតីទទួលខុសត្រូវ មានអភិបាលកិច្ចល្អ
និងពង្រឹងសាមគ្គីភាព ឯកភាព កិច្ចសហប្រតិបត្តិ
ការជួយឧបត្ថម្ភគាំទ្រគ្នាទៅវិញទៅមក ព្រោះថា ការឆ្លើយតប
ការងារជួយសង្គ្រោះ ការងារដោះស្រាយបញ្ហាប្រឈម ពុំមានតួអង្គណាម្នាក់
ស្ថាប័នណាមួយឬប្រទេសណាមួយអាចធ្វើបានដោយម្នាក់ឯងទេ។
