ភ្នំពេញ៖ រាជរដ្ឋាភិបាលកម្ពុជាតាមរយៈក្រសួងបរិស្ថាន នៅថ្ងៃទី២៩ ខែកញ្ញា ឆ្នាំ ២០១៤នេះ បានបង្ហាញអំពីផែនការគ្រប់គ្រងដីសម្បទានសេដ្ឋកិច្ច និងបានដកហូតដីពីក្រុមហ៊ុនមួយចំនួនដែលរដ្ឋបានផ្តល់សម្បទានកន្លងមក ក៏ដូចជាធ្វើការត្រួតពិនិត្យឡើងវិញ លើក្រុមហ៊ុនទាំងអស់ឡើងវិញ នេះបើតាមការបញ្ជាក់របស់ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន។
ឯកឧត្តមរដ្ឋមន្ត្រី សាយ សំអាល់ បានមានប្រសាសន៍ដូច្នេះនៅទីស្តីការក្រសួងបរិស្ថានក្នុងសន្និសីទសារព័ត៌មាន កាលពីរសៀលថ្ងៃទី២៩ ខែកញ្ញា ឆ្នាំ២០១៤នេះ ស្តីពី គោលនយោបាយរបស់រាជរដ្ឋាភិបាលកម្ពុជា ក្នុងការគ្រប់គ្រងដីសម្បទានសេដ្ឋកិច្ច និងការបន្តពង្រឹងប្រសិទ្ធិភាពលើការងារគ្រប់គ្រងដីសម្បទានសេដ្ឋកិច្ច។
ឯកឧត្តម សាយ សំអាល់ បានបន្តថា ការលុបចោលនូវការវិនិយោគនេះ ក៏ជាការប្តេជ្ញាចិត្តនិងផ្នែកនយោបាយខ្ពស់ របស់រាជរដ្ឋាភិបាលនៅក្នុងអាណត្តិទី៥នេះ ។
តាមរយៈគោលនយោបាយរបស់រាជរដ្ឋាភិបាល ក្នុងនីតិកាលទី៥នេះ ឯកឧត្តមរដ្ឋមន្ត្រីក្រសួងបរិស្ថាន បានបញ្ជាក់ថា « រាជរដ្ឋាភិបាលនឹងមិនផ្តល់ដីសម្បទានថ្មីទៀតទេ ប៉ុន្តែដីសម្បទានដែលបានផ្តល់ទៅហើយក្នុងវិស័យកសិឧស្សាហកម្ម ឬវិស័យទេសចរណ៍ រាជរដ្ឋាភិបាល នឹងធ្វើការត្រួតពិនិត្យឡើងវិញទាំងអស់ ដើម្បីមើលថា តើក្រុមហ៊ុនដែលបានទទួលដីសម្បទានពីរដ្ឋាភិបាលអាចធ្វើការអភិវឌ្ឍន៍ទៅរួចតាមកិច្ចសន្យារបស់ខ្លួនដែររឺទេ? ហើយបើមិនអាចទៅរួចទេ រាជរដ្ឋាភិបាលនឹងដកហូតមកវិញ» ។
ក្នុងវិធានការក្តៅរបស់រដ្ឋមន្ត្រីថ្មីក្រសួងបរិស្ថាន យ៉ាងហោចណាស់មានក្រុមហ៊ុនចំនួន៨ដំបូង ដែលក្រសួងបានធ្វើការដកហូត។ ឯកឧត្តម សាយ សំអាល់ បានអះអាងថា ការពិតមាន ក្រុមហ៊ុន ៣ដំបូង ដែលក្នុងនោះ២បានផ្ទេរមកឲ្យរដ្ឋវិញនូវផ្ទៃដីចំនួន២ម៉ឺនហិចតា និងមួយទៀត ដោយស្នើសុំដើម្បីសិក្សាអំពីរ៉ែ ប៉ុន្តែបានស្នើសុំប្រគល់មករដ្ឋាភិបាលវិញហើយ។
ឯកឧត្តម បានបន្តថា ដីនៅតំបន់នោះ គឺយកទៅមានបញ្ហា ហើយថាគេឲ្យមកវិញនោះ គឺមិនមែនអញ្ចឹងទេ គឺគេធ្វើការសិក្សាជំហានដំបូងទៅដូចជាមិនអំណោយផលសំរាប់ ការអភិវឌ្ឍន៍ទើបខាងក្រុមហ៊ុនផ្ទេរដីនោះមកឲ្យរដ្ឋវិញ។
ឯកឧត្តមរដ្ឋមន្ត្រី សាយ សំអាល់ បានបញ្ជាក់ជូនថា មុននឹងធ្វើការដកហូតនោះ យើងបានធ្វើការសិក្សាស្រាវជ្រាវយ៉ាងហ្មត់ចត់ និងយកចិត្តទុកដាក់ជាទីបំផុត និងបានពិនិត្យយ៉ាងល្អិតល្អន់ មុនយើងធ្វើការសម្រេចចិត្តដកហូត ហើយនិងបន្តពិនិត្យក្រុមហ៊ុនដ៏ទៀត ថាមានលទ្ធភាពធ្វើការអភិវឌ្ឍន៍ ឬទេ ដើម្បីយើងធ្វើការសម្រេចចិត្តបន្តទៀត។
ឯកឧត្តម បានបន្ថែមទៀតថា សព្វថ្ងៃនេះ រាជរដ្ឋាភិបាលបានរៀបចំនូវយន្តការមួយ ដែលមានក្រសួងដែនដី នគររូបនីយកម្ម ក្រសួងកសិកម្ម ក្រសួងមហាផ្ទៃ ក្រសួងសេដ្ឋកិច្ចហិរញ្ញវត្ថុ ព្រមទាំងនាយកដ្ឋាន ក្រសួងបរិស្ថាន។ ឯកឧត្តម មានប្រសាសន៍បន្ថែមថា យន្តការថ្មីនេះ គឺប្តេជ្ញាក្នុងការរៀបចំផែនទីឯកភាពដើម្បីកំណត់ឲ្យច្បាស់ថា តើតំបន់ណាជាតំបន់ភូមិដ្ឋានរបស់ប្រជាជន និងតំបន់ណាជាតំបន់អភិរក្ស តែឥឡូវនេះកំពុងដកហូត និងវាយតំលៃចំនួនដីដែលយើងដកមកវិញ និងចំនួនដីដែលនៅសេសសល់។
ប៉ុន្តែ ឯកឧត្តម សាយ សំអាល់ បានបញ្ជាក់ថា ចំពោះក្រុមហ៊ុនដែលបានចុះកិច្ចសន្យាទៅហើយ គឺយើងរក្សានៅដដែល តែចំពោះក្រុមហ៊ុនដែលបានអនុវត្តគោលការណ៍ត្រឹមត្រូវ ហើយដែលនឹងត្រូវចុះកិច្ចសន្យាថ្មីជាមួយរាជរដ្ឋាភិបាល យើងកំណត់យកតែ៥០ឆ្នាំទេ តែករណីក្រុមហ៊ុននោះធ្វើបានល្អ នៅឆ្នាំទី៤៥ គាត់អាចចរចារជាមួយរាជរដ្ឋាភិបាល ដើម្បីបន្តដំឡើងការរបស់ខ្លួនបាន៕
អត្ថបទដោយ៖ សុភាព