កំពង់ចាម ៖ ព្រឹកថ្ងៃទី០៦ ខែសីហា ឆ្នាំ២០១២ នៅវិទ្យាល័យព្រះសីហនុ បានប្រារព្ធពិធីបើក កញ្ចប់វិញ្ញាសាប្រឡងសញ្ញាប័ត្រមធ្យមសិក្សាទុតិយភូមិ ក្រោមអធិបតីភាពឯកឧត្តម ហ៊ុន ណេង ទីប្រឹក្សាផ្ទាល់សម្តេចតេជោ ហ៊ុន សែន និងជាគណៈអភិបាលរងខេត្តកំពង់ចាម និងមានការអញ្ជើញចូលរួមពីថ្នាក់ដឹកនាំមន្ទីរអប់រំខេត្តគណៈកម្មាធិការប្រឡង និងសិស្សានុសិស្ស ជាច្រើនរូបផងដែរ ។
កម្ម វិធីប្រលងមានរយៈពេល២ថ្ងៃកន្លះក្នុងនោះ ថ្ងៃទី១ គីមីវិទ្យា ជីវវិទ្យា ភូមិវិទ្យា ប្រវត្តិវិទ្យា ថ្ងៃទី២ អក្សរសាស្ត្រខ្មែរ រូបវិទ្យា សីលធម៌-ពលរដ្ឋវិទ្យា ផែនដីវិទ្យា ថ្ងៃទី៣ គណិវិទ្យា និងភាសាបរទេស។
គ្រប់ឆ្នាំសិក្សា បេក្ខជនប្រឡង តែងប្រជុំគ្នាតាមមណ្ឌលរបស់ខ្លួនតាមកាលបរិច្ឆេទកំណត់ ជាក់លាក់មួយដែលរៀបចំឡើងដោយស្ថាប័នអប់រំ។ ជាមួយគ្នានេះឆ្នាំសិក្សា២០១១-២០១២ការប្រ ព្រឹត្តទៅនៃការប្រឡងសញ្ញាប័ត្រមធ្យមសិក្សាទុតិយភូមិ ត្រូវបានបើកសម័យប្រឡង របស់ខ្លួននៅថ្ងៃទី០៦ ខែសីហា រហូតដល់ថ្ងៃទី៨ ខែសីហា ឆ្នាំ២០១២នេះ។
ឯកឧត្តម ហ៊ុន ណេង មានប្រសាសន៍ក្នុងពិធីបើកស្រោមសំបុត្រវិញ្ញាសា និងបើកការប្រឡងដោយ បានសម្តែងនូវទឹកចិត្តសប្បាយរីករាយ និងផ្តាំផ្ញើរទៅ គណៈកម្មការព្រមទាំងមេប្រយោគ និងបេក្ខជនទាំងអស់ ឱ្យខិតខំបំពេញតួនាទីរបស់ខ្លួន ប្រកបដោយឥរិយាបថ និងសេចក្តីថ្លៃថ្នូរដោយប្រកាន់ឱ្យខ្ជាប់នូវតួនាទីភារកិច្ចរបស់ ខ្លួន។
ឯកឧត្តមបានជំរុញដល់សិស្សានុសិស្សទាំងអស់ខិតខំប្រឹងប្រែងបញ្ចេញឱ្យអស់ពីសមត្ថភាព រំលេចឱ្យបាននូវខ្លឹមសារដែលប្អូនបានសិក្សាកន្លងមក សរសេរឱ្យបានច្រើនហើយ ប្រកបដោយ ភាពសុក្រិត និងត្រឹមត្រូវជាមួយ៕
អ៊ឹម វិសិទ្ធ