សៀមរាប ៖ នៅរសៀលថ្ងៃទី២៨ខែសីហាឆ្នាំ២០១២លោកស៊ូភិរិន្ទអភិបាលខេត្តសៀមរាបអមដំណើរជាមួយក្រុមការងារបច្ចេកទេសនៃមន្ទីររៀបចំដែនដីនគរោបនីយកម្មសុរិយោដីនិងសំណង់ខេត្តរួមជាមួយក្រុមយុវជនស្ម័គ្រចិត្តសម្តេចតេជោក្រុមទី១៣៦ផងនោះបានចុះពិនិត្យការបោះបង្គោលព្រំដីរវាងប្រជាជនក្នុងភូមិសាស្ត្រស្រុកជីក្រែងនិងស្រុកស្វាយលើជាមួយក្រុមហ៊ុនខេនលីមិតធីត។
ប្រជាពលរដ្ឋជាង១០០គ្រួសារក្នុងភូមិគោកធ្លកលើភូមិពង្រលើនិងភូមិខ្វាវស្រុកជីក្រែងនិងភូមិបេងមាលាស្ថិតក្នុងស្រុកស្វាយលើបានស្ថិតក្នុងភាពមិនច្បាស់លាស់រវាងព្រំដីជាមួយនឹងក្រុមហ៊ុនខេនលីមិតធីត។ ក្រោយពីទទួលបានសេចក្តីណែនាំចុះថ្ងៃទី២៩ខែឧសភាឆ្នាំ២០១២ពីប្រមុខរាជរដ្ឋាភិបាលមកក្រុមជំនាញបច្ចេកទេសវាស់វែងដីធ្លីដោយបានការចូលរួមសហការយ៉ាងសកម្មពីក្រុមយុវជនស្ម័គ្រចិត្តសម្តេចតេជោក្រោមការដឹកនាំបញ្ជាពីលោកស៊ូភិរិន្ទអភិបាលនៃគណៈអភិបាលខេត្តសៀមរាបក្រុមការងារបានចុះអនុវត្តជាប្រចាំដោយចាប់ផ្តើមពីការកំណត់ព្រំនិងបោះបង្គោលតាមភូមិសាស្ត្រដែលជួបផលប៉ះពាល់ជាមួយដីក្រុមហ៊ុននិងដីប្រជាពលរដ្ឋ។ នៅថ្ងទី២៨ខែសីហាឆ្នាំ២០១២ក្រុមការងារចុះបោះបង្គោលនិងកំណត់ព្រំបាន៣១ចំណុច។យោងតាមកំណត់ហេតុកិច្ចប្រជុំកាលពីថ្ងៃទី២៧ខែសីហាឆ្នាំ២០១២របស់ក្រុមការងារចុះវាស់វែងបែងចែកដីជួបផលប៉ះពាល់ជូនប្រជាពលរដ្ឋដែលមានលោក ម៉ៅវុឌ្ឍីជាប្រធានក្រុមការងារបានឲ្យដឹងថា៖ក្រុមហ៊ុនខេនលីមិតធីតទទួលបានសិទ្ធិវិនិយោគលើទំហំដី៤៥៣៥ហិកតាពីរាជរដ្ឋាភិបាលក្រោយពីកាត់ចេញផ្ទៃដី៥១៥ហិកតាក្រុមហ៊ុននៅសល់ដីជាក់ស្តែង៤០២០ហិកតា ហើយបច្ចុប្បន្នក្រុមហ៊ុនឈូសឆាយដាំកៅស៊ូក្នុងទំហំផ្ទៃដី២០០០ហិកតាស្មើនឹង៥០ភាគរយនៃផ្ទៃដី។ ក្រុមហ៊ុនបានដោះស្រាយផលប៉ះពាល់ជាមួយប្រជាពលរដ្ឋចំនួន២៧០គ្រួសារ។ ចំពោះផ្ទៃដីប្រជាពលរដ្ឋ៩គ្រួសារដែលក្រុមហ៊ុនបានឈូសឆាយនិងដាំកៅស៊ូក្រុមហ៊ុនបានដោះស្រាយរួចរាល់អស់ហើយចំណែក៣១គ្រួសារទៀតក្រុមហ៊ុនមិនទាន់បានឈូសឆាយនិងដាំកៅស៊ូទេដោយរក្សាទុកឲ្យប្រជាពលរដ្ឋបង្កបង្កើនផលនិងរង់ចាំក្រុមការងារចុះបញ្ជីដីកាត់ឆ្វៀលតាមការកាន់កាប់ជាក់ស្តែងរបស់ប្រជាពលរដ្ឋ។ នេះជាសេចក្តីរាយការណ៍របស់តំណាងក្រុមហ៊ុនជូនក្រុមការងារ។ ក្នុងកំណត់ហេតុបានឲ្យដឹងទៀតថា៖ក្រុមការងារបានឯកភាពកំណត់លើគោលការណ៍ដូចខាងក្រោមៈ១.ក្រុមហ៊ុនត្រូវបោះបង្គោលព្រំដីដែលក្រុមហ៊ុនបានឈូសឆាយនិងដាំកៅស៊ូរួច,២.ផ្ទៃដីដែលនៅសល់២០០០ហិកតាទៀតដែលក្រុមហ៊ុនពុំទាន់បានឈូសឆាយក្រុមហ៊ុនត្រូវគោរពតាមគោលការណ៍កាត់ឆ្វៀលដីជូនប្រជាពលរដ្ឋហើយនៅសល់ប៉ុន្មានក្រុមហ៊ុនត្រូវទទួលយកតាមការជាក់ស្តែង,៣.ក្នុងករណីមានប្រជាពលរដ្ឋកាន់កាប់ជាក់ស្តែងក្នុងផ្ទៃដីដែលក្រុមហ៊ុនឈូសឆាយនិងដាំកៅស៊ូរួចក្រុមហ៊ុនត្រូវកាត់ឆ្វៀលជូនប្រជាពលរដ្ឋបន្ថែមទៀត,៤.ក្រុមការងារបច្ចេកទេសនិងអាជ្ញាធរមូលដ្ឋានក្នុងឃុំស្រុកទាំងពីរត្រូវចុះពិនិត្យការបោះបង្គោលព្រំដីនិងកំណត់និយាមកា។ ខណៈដែលលោកស៊ុភិរិន្ទចុះទៅដល់គោលដៅនោះប្រជាពលរដ្ឋបានសំដែងនូវភាពរីករាយត្រេកអរចំពោះការបោះបង្គោលកំណត់ព្រំដីនេះ។ លោកបានមានប្រសាសន៍ជំរាបជូនប្រជាពលរដ្ឋនៅទីនោះថា៖ការបោះបង្គោលព្រំដីរវាងក្រុមហ៊ុននិងប្រជាពលរដ្ឋបានព្រមព្រៀងនិងសហការគ្នាបានល្អ។ ការបោះបង្គោលព្រំគឺធ្វើទៅតាមព្រំចាស់របស់បងប្អូនតាមភូមិសាស្ត្រដីស្រែដែលមានស្រាប់ជាក់ស្តែងតែនេះជាការកំណត់ព្រំសិនមិនទាន់ត្រូវតាមនិយាមការដ្ឋបាលសុរិយោដីទេរង់ចាំក្រុមជំនាញបច្ចេកទេសវាស់វែងឲ្យបានត្រឹមត្រូវទៅតាមទំហំជាក់លាក់ដោយត្រូវកំណត់ឲ្យបានច្បាស់ព្រំដីក្នុងភូមិសាស្ត្រនិមួយៗ។ឯ.ឧបានជម្រាបដល់ប្រជាពលរដ្ឋក៍ដូចជាក្រុមការងារពាក់ពន្ឋ័ក្នុងការអនុវត្តភារកិច្ចនៅទីនោះថា៖យើងទាំងអស់គ្នាឈរខាងប្រជាពលរដ្ឋធ្វើកិច្ចការនេះដើម្បីប្រជាពលរដ្ឋមិនបំរើផលប្រយោជន៍អោយបុគ្គលណាឫក្រុមហ៊ុនណាទេបើក្រុមហ៊ុនណាឫបុគ្គលណាធ្វើការរំខានរារាំងដល់ក្រុមការងារនិងក្រុមយុវជនស្ម័គ្រចិត្តសម្តេចក៏ដូចជាមករំខានការងារបង្កបង្កើនផលរបស់ប្រជាពលរដ្ឋលើដីដែលបានកំណត់បោះបង្គោលព្រំហើយនឹងត្រូវដកចេញបងប្អូនអាចធ្វើស្រែអាស្រ័យផលលើដីរបស់បានដោយមិនភ័យខ្លាចនរណឫក្រុមណាមករារាំងហាមឃាត់ទៀតទេ។
នៅតាមផ្លូវចូលទៅកាន់ក្រុមហ៊ុនខេនលីមិតធីតគេឃើញមានដាក់កុងត្រូលត្រួតពិនិត្យប្រមាណជាបីកន្លែងជាហេតុធ្វើអោយប្រជាពលរដ្ឋនៅតំបន់នោះមានការថ្នាំងថ្នាក់ផងដែរ។តាមប្រភពប្រជាពលរដ្ឋបានបង្ហើបឲ្យដឹងថាកន្លងអ្នកចាំកុងត្រូលតែងតែយកលុយពីពួកគាត់៥០០០រៀលឫលើសពីនេះពេលពួកគាត់ដឹកកសិផលចេញម្តងៗ។តែទោះជាយ៉ាងណាត្រូវបានលោកអភិបាលខេត្តបញ្ជាឲ្យរើចោលចេញជាបន្ទាន់ផងដែរខណៈដែលឯ.ឧចុះត្រួតពិនិត្យការបោះបង្គោលនាពេលនេះ៕
គឿនវេត