ដោយ ៖ សាគុណ
ខេត្តសៀមរាប ៖ ក្នុងអំឡុងមកចូលរួមកិច្ចប្រជុំរដ្ឋមន្ត្រីសេដ្ឋកិច្ចអាស៊ានលើកទី៤៤ នៅក្រុងសៀមរាប កម្ពុជានិងឥណ្ឌូនេស៊ីបានព្រមព្រៀងគ្នាចុះហត្ថលេខានាំអង្ករចេញទៅប្រទេសឥណ្ឌូនេស៊ី ជាលើកដំបូង ដែលកិច្ចព្រមព្រៀងនេះត្រូវបានចហត្ថលេខាដោយលោកទេស រដ្ឋមន្ត្រី ចម ប្រសិទ្ធ រដ្ឋមន្ត្រីក្រសួងពាណិជ្ជកម្មនៃព្រះរាជាណាចក្រកម្ពុជា និងលោក Gita Irawan Wirijawan រដ្ឋមន្ត្រីពាណិជ្ជកម្មឥណ្ឌូនេស៊ី នៅល្ងាចថ្ងៃទី២៨ ខែសីហា ឆ្នាំ២០១២ នៅក្រុងសៀមរាប ។
ក្នុងឱកាសចុះហត្ថលេខានោះ លោកទេសរដ្ឋមន្ត្រី ចម ប្រសិទ្ធ បានថ្លែងថា ក្នុងការនាំអង្ករចេញទៅប្រទេសឥណ្ឌូនេស៊ីនេះ គឺក្រុមហ៊ុន Green Trade ជាក្រុមហ៊ុនរបស់រដ្ឋកម្ពុជា ជាអ្នកផ្គត់ផ្គង់អង្ករដល់ក្រុមហ៊ុន DULOG ដែលជាក្រុមហ៊ុនរបស់រដ្ឋឥណ្ឌូនេស៊ីតាមកិច្ចព្រម ព្រៀងដែលចុះហត្ថលេខានាពេលនេះ ។ លោកទេសរដ្ឋមន្ត្រីបានបញ្ជាក់ថា នេះជាលើកទី ១ហើយដែលកម្ពុជា បានព្រមព្រៀងនាំអង្ករចេញទៅប្រទេសឥណ្ឌូនេស៊ីដែលមានបរិមាណ ១សែនតោនក្នុង១ឆ្នាំ ហើយប្រសិនបើដំណើរការទៅដោយរលូន យើងនឹងអាចនាំចេញឲ្យបានច្រើនជាងនេះទៀត ។
លោករដ្ឋមន្ត្រី Gita Irawan Wirijawan បានថ្លែងថា កិច្ចព្រមព្រៀងនេះ នឹងជម្រុញទំ នាក់ទំនងសេដ្ឋកិច្ច និងពាណិជ្ជកម្មរវាងប្រទេសទាំងពីរ ឥណ្ឌូនេស៊ី-កម្ពុជា ។ លោករដ្ឋ មន្ត្រីថ្លែងបន្តថា ជាការពិតណាស់ នេះជាសញ្ញាល្អមួយសម្រាប់ប្រទេសទាំងពីរ ខ្ញុំគិតថា កិច្ចព្រមព្រៀងនេះ គឺជាការចាប់ផ្តើមដំបូង ហើយនឹងមានជាបន្តបន្ទាប់ទៀតទៅថ្ងៃអនាគត លោកសង្ឃឹមថាយើងនឹងពង្រឹងទំនាក់ទំនងនេះឲ្យកាន់តែរឹងមាំថែមទៀត ៕