កម្មាធិការជាតិរៀបចំការបោះឆ្នោត(គជប)បានអំពាវនាវអោយប្រជាពល រដ្ឋទាំងអស់ដែលគ្រប់អាយុបោះឆ្នោត ត្រូវនាំគ្នាទៅពិនិត្យឈ្មោះ និងចុះឈ្មោះបោះឆ្នោត ដែលនឹងត្រូវចាប់ផ្តើមនៅថ្ងៃទី០១ខែកញ្ញា ឆ្នាំ២០១២ខាងមុខនេះ។ ឯកឧត្តមទេព នីថា អគ្គលេខាធិការនៃគណៈកម្មាធិការជាតិរៀបចំការបោះឆ្នោត(គជប)បាន អំពាវនាវអោយប្រជាពលរដ្ឋទាំងអស់ ជាពិសេសយុវជនដែលគ្រប់អាយុបោះឆ្នោតត្រូវនាំគ្នាទៅចុះឈ្មោះ ឆ្នោតអោយបានគ្រប់ៗគ្នា។ សម្រាប់អ្នកបានចុះឈ្មោះហើយ ត្រូវនាំគ្នាទៅពិនិត្យបញ្ជីរឈ្មោះ ដែលនឹងត្រូវបិទនៅតាមឃុំ-សង្កាត់ ដែលបានចុះឈ្មោះកន្លងមក។
សម្តេចអគ្គមហាសេនាបតីតេជោហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ក្នុងពិធីចែកសញ្ញាបត្រដល់និស្សិតបញ្ចប់ការសិក្សានៅសាកលវិទ្យា ល័យបៀលប្រាយ កាលពីព្រឹកថ្ងៃទី១៥ខែសីហា ឆ្នាំ២០១២ បានអំពាវនាវអោយប្រជាពលរដ្ឋទាំងអស់ ជាពិសេសយុវជន ត្រូវនាំគ្នាទៅចុះឈ្មោះ និងពិនិត្យបញ្ជីឈ្មោះបោះឆ្នោតអោយបានគ្រប់ៗគ្នា ដើម្បីបំពេញកាតព្វកិច្ចជាប្រជាពលរដ្ឋខ្មែរ។
ការ បោះឆ្នោតសកលខាងមុខនេះ គណៈកម្មាធិការជាតិរៀបចំការបោះឆ្នោត (គ.ជ.ប) គ្រោងចំណាយថវិកាសរុបចំនួនជាង២០លានដុល្លារអាមេរិក សម្រាប់រៀបចំការបោះឆ្នោតជ្រើសរើសតំណាងរាស្ត្រ នៅថ្ងៃទី២៨ ខែកក្កដា ឆ្នាំ២០១៣។
គួរបញ្ជាក់ថា ការបោះឆ្នោតជ្រើសតាំងតំណាងរាស្ត្រ នីតិកាលទី៥ ឆ្នាំ២០១៣ នឹងធ្វើឡើងនៅថ្ងៃអាទិត្យ ទី២៨ ខែកក្កដា ឆ្នាំ២០១៣។ ចំណែកចំនួនអាសនៈរដ្ឋសភា ត្រូវបានរដ្ឋាភិបាលសម្រេចរក្សាទុកចំនួន ១២៣ រូប ដូចអាណត្តិទី៣ និងទី៤ ដដែល៕