ភ្នំពេញ: សម្តេចនាយករដ្ឋមន្ត្រី ហ៊ុន សែន នាព្រឹកម៉ោង ៨ ថ្ងៃទី២៩ ខែសីហា ឆ្នាំ២០១២ បានដឹកនាំគណៈប្រតិភូជាន់ខ្ពស់ នៃរាជរដ្ឋាភិបាលកម្ពុជាមួយក្រុម ចាកចេញពីព្រលានយន្តហោះអន្តរជាតិភ្នំពេញ ទៅចូលរួមសន្និសីទលើកទី១៦ នៃប្រទេសចលនាមិនចូលបក្សសម្ព័ន្ធ (Non-Aligned Movement NAM) ដែលនឹងប្រព្រឹត្តទៅនៅថ្ងៃទី៣០ និងថ្ងៃទី៣១ ខែសីហា ឆ្នាំ២០១២ នៅទីក្រុងតេអេរ៉ង់ ប្រទេសអ៊ីរ៉ង់។
សម្តេចនាយករដ្ឋមន្ត្រី ក៏នឹងបន្តដំណើរទៅចូលរួមពិព័រណ៍ចិន-អាស៊ីអឺរ៉ុប នៅប្រទេសចិន ហើយរហូតដល់ថ្ងៃទី៣ ខែកញ្ញា ឆ្នាំ២០១២ ទើបសម្តេចវិលត្រឡប់មកកម្ពុជាវិញ។
មុនពេលឡើងយន្តហោះ អមដំណើរសម្តេចនាយករដ្ឋមន្ត្រី ហ៊ុន សែន ទៅកាន់ប្រទេសអ៊ីរ៉ង់ លោក ស្រ៊ី ថាមរ៉ុង្គ រដ្ឋមន្ត្រីប្រតិភូអមនាយករដ្ឋមន្ត្រី បានថ្លែងទៅកាន់ក្រុមអ្នកកាសែតថា កិច្ចប្រជុំកំពូលលើកទី១៦ នៃប្រទេសចលនាមិនចូលបក្សសម្ព័ន្ធ នឹងធ្វើឡើងក្រោមប្រធានបទ "សន្តិភាពយូរអង្វែង រួមគ្នាជាសកល"។ កិច្ចប្រជុំនោះ ក៏នឹងមានការបោះឆ្នោតជ្រើសរើសប្រទេសអ៊ីរ៉ង់ ជាប្រធានចលនាមិនចូលបក្សសម្ព័ន្ធ ក្នុងរយៈពេល ៣ឆ្នាំ។ លោក បាន គីមូន អគ្គលេខាធិការអង្គការសហប្រជាជាតិ ក៏នឹងអញ្ជើញចូលរួមក្នុងកិច្ចប្រជុំនោះផងដែរ។
លោក ស្រ៊ី ថាមរ៉ុង្គ បានបន្ថែមថា បន្ទាប់ពីចូលរួមកិច្ចប្រជុំនៅអ៊ីរ៉ង់ សម្តេចនាយករដ្ឋមន្ត្រី ហ៊ុន សែន ក៏នឹងបន្តដំណើរដឹកនាំគណៈប្រតិភូ ទៅចូលរួមបើកសម្ពោធពិព័រណ៍ចិន-អាស៊ីអឺរ៉ុប នៅប្រទេសចិនផងដែរ។ រហូតដល់រសៀលថ្ងៃទី៣ ខែកញ្ញា ឆ្នាំ២០១២ ទើបសម្តេចនាយករដ្ឋមន្ត្រី ហ៊ុន សែន អញ្ជើញវិលត្រឡប់មកដល់រាជធានីភ្នំពេញវិញ។
ក្រសួងការបរទេសកម្ពុជា បានប្រកាសថា ដំណើរទៅកាន់តុប្រជុំ នៅទីក្រុងតេអេរ៉ង់ របស់សម្តេចនាយករដ្ឋមន្ត្រី ហ៊ុន សែន ក្នុងនាមជាប្រធានអាស៊ានពេលនេះ គឺតបតាមការអញ្ជើញរបស់លោក Mahmoud Ahmadinejad ប្រធានាធិបតី នៃសាធារណរដ្ឋអ៊ីស្លាម អ៊ីរ៉ង់។
សេចក្តីជូនព័ត៌មាន ចុះថ្ងៃទី២៤ ខែសីហា ឆ្នាំ២០១២ របស់ក្រសួងការបរទេស បង្ហាញថា គណៈប្រតិភូដែលអមដំណើរសម្តេចនាយករដ្ឋមន្ត្រី ហ៊ុន សែន ទៅកាន់អង្គសន្និសីទនៅទីក្រុងតេអេរ៉ង់ រួមមាន៖ លោកឧបនាយករដ្ឋមន្ត្រី ហោ ណាំហុង រដ្ឋមន្ត្រីការបរទេស និងមន្ត្រីរដ្ឋាភិបាលជាន់ខ្ពស់ជាច្រើនរូបផ្សេងទៀត។
សេចក្តីជូនព័ត៌មានដដែល បានលើកឡើងថា ក្រៅពីចូលរួមក្នុងអង្គសន្និសីទនោះ នៅប្រទេសអ៊ីរ៉ង់ សម្តេចនាយករដ្ឋមន្ត្រី ហ៊ុន សែន នឹងជួបពិភាក្សាទ្វេភាគី ជាមួយនឹងលោកប្រធានាធិបតី Mahmoud Ahmadinejad ព្រមទាំងមានកិច្ចប្រជុំដាច់ដោយឡែកមួយទៀត ដែលសម្តេចនាយករដ្ឋមន្ត្រី ហ៊ុន សែន នឹងជួបពិភាក្សាតទល់នឹងលោក Kim Yong Nam ប្រធានសភាប្រជាជនជាន់ខ្ពស់ របស់សាធារណរដ្ឋប្រជាមានិតប្រជាធិបតេយ្យកូរ៉េ (កូរ៉េខាងជើង)។
សេចក្តីជូនព័ត៌មានរបស់ក្រសួងការបរទេស ក៏បានបង្ហាញថា ក្រៅពីចូលរួមសន្និសីទប្រទេសចលនាមិនចូលបក្សសម្ព័ន្ធ នៅប្រទេសអ៊ីរ៉ង់ សម្តេចនាយករដ្ឋមន្ត្រី ហ៊ុន សែន ក៏នឹងដឹកនាំគណៈប្រតិភូជាន់ខ្ពស់ នៃរាជរដ្ឋាភិបាលកម្ពុជា អញ្ជើញទៅចូលរួមពិព័រណ៍ចិន-អាស៊ីអឺរ៉ុប លើកទី២ (China-Eurasia Expo) ដែលនឹងធ្វើឡើងនៅថ្ងៃទី១ ដល់ថ្ងៃទី៥ ខែកញ្ញា ឆ្នាំ២០១២ នៅ អ៊ូរុំឈី (Urumqi) ក្នុងតំបន់ស្វយ័តស៊ីនជាំង អ៊ុយហ្គ័រ ក្នុងប្រទេសចិន។ ដំណើរទៅកាន់ប្រទេសចិននោះ ធ្វើឡើងតាមការអញ្ជើញរបស់រដ្ឋាភិបាលចិន។
សេចក្តីជូនព័ត៌មាន បានលើកឡើងថា អំឡុងពេលស្នាក់នៅអ៊ូរុំឈី សម្តេចនាយករដ្ឋមន្ត្រី ហ៊ុន សែន នឹងជួបពិភាក្សាទ្វេភាគី ជាមួយនឹងលោកនាយករដ្ឋមន្ត្រីចិន Wen Jiabao។
ដោយឡែក សេចក្តីជូនព័ត៌មានដដែល ក៏បានលើកឡើងថា លោកឧបនាយករដ្ឋមន្ត្រី ហោ ណាំហុង រដ្ឋមន្ត្រីការបរទេសកម្ពុជា ក៏នឹងឆ្ពោះដំណើរទៅបំពេញទស្សនកិច្ចនៅប្រទេសឥណ្ឌា តបតាមការអញ្ជើញរបស់ប្រមុខការទូតឥណ្ឌា លោក S.M. Krishna។ លោកប្រមុខការទូត ហោ ណាំហុង ដឹកនាំគណៈប្រតិភូចូលរួមកិច្ចប្រជុំថ្នាក់រដ្ឋមន្ត្រី នៃកិច្ចសហប្រតិបត្តិការមេគង្គ-គង្គា លើកទី៦ (Mekong-Ganga Cooperation MGC) ដែលនឹងប្រព្រឹត្តទៅនៅថ្ងៃទី៣ និងថ្ងៃទី៤ ខែកញ្ញា ឆ្នាំ២០១២ នៅទីក្រុងញូដេលី ប្រទេសឥណ្ឌា៕
