ភ្នំពេញ ៖ បុរសជាជនសង្ស័យ២នាក់ត្រូវបាននគរបាលខណ្ឌដូនពេញឃាត់ខ្លួនភ្លាមៗ បន្ទាប់ពីពួកគេធ្វើសកម្មភាពឆក់កាបូបពីនារី២នាក់ជិះម៉ូតូតាមផ្លូវសាធារណៈ ហើយមិនបានសម្រេច បើកម៉ូតូគេចខ្លួនមិនបានប៉ុន្មាននាទីក្រោយមកក៏ត្រូវចាប់ខ្លួនតែម្ដង ។
ហេតុការណ៍ឆក់កាបូបទៅលើនារីរងគ្រោះនេះបានកើតឡើងកាលពីវេលាម៉ោង៧និង៤០នាទីយប់ ថ្ងៃទី១៨ខែកញ្ញាឆ្នាំ២០១២ នៅចំណុចមុខហាងកាហ្វេត្រជាក់ចិត្ដ៦៨ ផ្លូវលេខ១៥៤ សង្កាត់ផ្សារថ្មី១ ខណ្ឌដូនពេញ ។
សមត្ថកិច្ចបានឱ្យដឹងថា មុនពេលកើតហេតុ គេបានឃើញនារី២នាក់ជិះម៉ូតូម៉ាកស្គូពីពណ៌ស១គ្រឿង តាមបណ្ដោយផ្លូវលេខ១៥៤ក្នុងទិសដៅពីលិចទៅកើត លុះមកដល់ចំណុចទល់មុខហាងកាហ្វេត្រជាក់ចិត្ដ៦៨ ក៏ស្រាប់ តែមានម៉ូតូ១គ្រឿងម៉ាកហុងដាសេ១២៥ ពណ៌ខ្មៅ ស៊េរីឆ្នាំ២០០៩ ពាក់ស្លាកលេខភ្នំពេញ 1AK-6031 ក្នុងទិសដៅ ស្របគ្នាជាមួយនឹងម៉ូតូនារីរងគ្រោះ រួចក៏ធ្វើសកម្មភាពឆក់កាបូបដែលបណ្ដាលឱ្យនារីរងគ្រោះដួលម៉ូតូ ហើយក្រុមចោរ ដែលធ្វើសកម្មភាពមិនបានសម្រេច ក៏ព្យាយាមបើកគេចពីកន្លែងកើតហេតុ ប៉ុន្ដែត្រូវអ្នកធ្វើដំណើរនៅជិតនោះស្រែក ថាចោរឆក់កាបូប ក៏សមត្ថកិច្ចនគរបាលខណ្ឌដូនពេញធ្វើការប្រដេញផងដែរស្ទាក់ចាប់រហូតដល់ចំណុចផ្លូវ៦៣ សង្កាត់ ផ្សារថ្មី១ ទល់មុខហាងកាហ្វេមណ្ឌលគិរី ក៏ក្របួចបានក្រុមចោរឆក់ទាំង២នាក់ខាងលើ បញ្ជូនទៅកាន់អធិការដ្ឋាននគរ បាលខណ្ឌដូនពេញ ។
សមត្ថកិច្ចបន្ដថា ជនសង្ស័យមានឈ្មោះ ហ៊ាន ហឿង អាយុ១៩ឆ្នាំ ស្នាក់នៅផ្ទះជួលលេខ៧ៅ សង្កាត់ ជ្រោយចង្វា ខណ្ឌឫស្សីកែវ និងឈ្មោះ ជា តាំងហុង អាយុ១៩ឆ្នាំ ស្នាក់នៅសង្កាត់បឹងកេងកង៣ ខណ្ឌចំការមន ចំណែកនារីរងគ្រោះទាំង២នាក់ត្រូវបានស្គាល់អត្ដសញ្ញាណនោះទេ ដោយសារពេលក្រុមចោរធ្វើសកម្មភាពឆក់ ធ្វើឱ្យពួកគេដួល និងមិនបានបាត់បង់របស់របរ ក៏មិនបានប្ដឹងសមត្ថកិច្ច បើកម៉ូតូចេញពីកន្លែងកើតហេតុ ។ ប៉ុន្ដែជនសង្ស័យ ទាំង២ខាងលើ សមត្ថកិច្ចកំពុងកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញតាមនីតិវិធី ៕