ដោយ ៖ សំរិត
ភ្នំពេញ ៖ លោក ប៉ា សុជាតិវង្ស អភិបាលរងរាជធានីភ្នំពេញបាន អនុញ្ញាតឱ្យលោកស្រីខារូល មីហ្សេល អូហ្វលីនក្រុមនាយករងនៃអង្គការវីនរ៉ក់អន្តរជាតិនិងលោកស្រីអាណា ឌីអូណែឡា ប្រធានកម្មវិធីប្រចាំតំបន់អាស៊ី បុគ្គលិកអង្គការចូលជួបពិភាក្សាការងារនៅសាលារាជធានីភ្នំពេញដើម្បីស្នើសុំយកគំរោងរបស់ក្រសួងការងារ សហរដ្ឋអាមេរិកមកអនុវត្តនៅប្រទេសកម្ពុជា ក្នុងការឆ្លើយតបទៅនិងបញ្ហាកុមារនៅក្នុងវិស័យកសិកម្ម នេសាទ និងការងារកុមារ បំរើតាមផ្ទះ និងសុំមតិពីអាជ្ញាធរទៅលើបញ្ហាកុមារនៅក្នុងរាជធានីភ្នំពេញកាលពីដើមសប្ដាហ៍ ខែកញ្ញា ឆ្នាំ២០១២នេះ ។
ក្នុងឱកាសនៃកិច្ចការជួបពិភាក្សានេះលោកស្រីខារូល មីហ្សេល អូហ្វលីនមានគោលបំណងដើម្បីស្នើសុំយកគំរោងរបស់ក្រសួងការងារ សហរដ្ឋអាមេរិកមកអនុវត្តនៅប្រទេសកម្ពុជា ក្នុងការឆ្លើយតបទៅនិងបញ្ហាកុមារនៅក្នុងវិស័យកសិកម្ម នេសាទ និងការងារកុមារ បំរើតាមផ្ទះ និងសុំមតិដឹកនាំពីលោកទៅលើបញ្ហាកុមារនៅក្នុងរាជធានីភ្នំពេញ។
ក្រៅពីកិច្ចពិភាក្សាការងាររួចមកលោក ប៉ា សុជាតិវង្ស អភិបាលរងរាជធានីភ្នំពេញបានផ្តល់អនុសាសន៍មួយចំនួន និងបានទទួស្គាល់នូវការងារ សហការកន្លងមករបស់អង្គការនេះក្នុងការជួយគាំទ្រដល់សាលារាជធានីភ្នំពេញ រៀបចំសិក្ខាសាលាកសាងផែនការសកម្មភាព ដើម្បីប្រយុទ្ធប្រឆាំងការជួញដូរការរត់ពន្ធ ការធ្វើអាជីវកម្មពលកម្មលើមនុស្ស និងការធ្វើអាជីវកម្មផ្លូវភេទលើស្រី្ត និងកុមារ ។ ជាមួយគ្នានេះដែរលោកក៍បានសង្កត់ធ្ងន់ទៅលើសារៈសំខាន់នៃការបង្កើនការគាំទ្រលើការចូលរួមរបស់យុវជន និងការអភិវឌ្ឍន៍ការងាររបស់យុវជន ដែលជាកំលាំងចលករណ៍ដ៏សំខាន់មួយក្នុងការផ្លាស់ប្តូរសង្គមទៅរកភាពប្រសើរឡើង។
ពាក់ព័ន្ធទៅនឹងកម្មវិធីស្តីពីពលកម្មកុមារដែលបានស្នើដោយ អង្គការលោកបាន បញ្ជាក់ទៀតថាយន្តការដ៏ល្អដែលអាចឆ្លើយតប ទៅនឹងបញ្ហាការងារកុមារនៅតាមផ្ទះ និងទម្រង់ផ្សេងៗ នៃពលកម្មកុមារគឺត្រូវផ្តោតការយកចិត្តទុកដាក់ទៅលើការការពារនិងដោះស្រាយមូលហេតុ ដែលជា ឬសគល់នៃពលកម្មកុមារពោលគឺភាពក្រីក្រ ។ ពិសេសធ្វើការគាំទ្រដល់កិច្ចខិតខំប្រឹងប្រែងរបស់រាជរដ្ឋាភិបាលកម្ពុជាទៅលើការកែទំរង់វិស័យនេសាទ ដែលពីមុន ឡូតិ៍នេសាទ ជួលឱ្យក្រុមហ៊ុនឯកជន ឥឡូវនេះដាក់ឱ្យស្ថិតនៅក្រោមការគ្រប់គ្រងរបស់សហគមននេសាទ ។ ទន្ទឹមនេះការពង្រឹងប្រព័ន្ធនិងរចនាសម្ព័ន្ធភូមិ ក៍ត្រូវធ្វើការគាំទ្រការងារភូមិនៅក្នុងការងារអភិបាលកិច្ចល្អ ។ ជួយដល់ការងារស្នូលនៅតាមភូមិនីមួយៗនិងអាចគាំទ្រដល់សាលារាជធានីភ្នំពេញ ដើម្បីបង្កើតនូវការងារនិងសេវាកម្មស្នូលនិងការបណ្តុះបណ្តាលវិជ្ជាជីវៈ ។ ក្តីសង្ឃឹមធំមួយ គឺបង្កើតនូវភូមិគំរូដែលមានការងារ និងសេវាកម្មស្នូលហើយដែលអាចក្លាយជាគំរូសំរាប់ប្រទេសជាតិទាំងមូល ។ ធ្វើការផ្សព្វផ្សាយពីបញ្ហាកុមារធ្វើការតាមផ្ទះនៅរាជធានីភ្នំពេញដល់ប្រជាជនទូទៅ និងទៅដល់និយោជកទាំងអស់ ។ គាំទ្រដល់កុមារកំព្រាតាមរយៈកម្មវិធីអាហារូបត្ថម្ភ និងសេវាកម្មផ្សេងៗទៀតរួមទាំងវិស័យការងារ ។ បន្ទាប់មកលោកក៏បានសម្ដែង រីករាយនឹងសហការជាមួយអង្គការវីនរ៉ក់នៅពេលដែលអង្គការនេះទទួលបានការអនុវត្តន៍គម្រោងពីកម្មវីធីរបស់ក្រសួងការងារសហរដ្ឋអាមេរិក៕
