កិច្ចព្រមព្រៀងនេះ–ដែលបានធ្វើឡើងកាលពីខែសីហាឆ្នាំ២០១២ នឹងផ្ដល់ធនធានអប់រំ កាន់តែទូលំទូលាយថែមទៀត ដល់ថ្នាក់រៀន នៅតាមបណ្ដា ខេត្តនានា នៅទូទាំងប្រទេស។ នេះក៏នឹងមានន័យផងដែរថា ការសិក្សាពីចម្ងាយអាចក្លាយជាការពិតក្នុងពេលដ៏ឆាប់ខាងមុខនេះ សម្រាប់សិស្សានុសិស្សរាប់សែននាក់នៅទូទាំងប្រទេស។
យោងតាមសេចក្ដីថ្លែងការណ៍ដែលចេញដោយក្រុមហ៊ុន Ezecom រួមគ្នាជាមួយនឹងក្រសួងអប់រំ យុវជន និងកីឡានៃរាជរដ្ឋាភិបាលកម្ពុជា Ezecom នឹងផ្ដល់សេវាអ៊ិនធើណិតដោយឥតគិតថ្លៃដល់សាលារៀន គ្រឹះស្ថានបណ្តុះបណ្តាលគ្រូចំនួន ៥០ នៅទូទាំងប្រទេស។ ក្រសួងអប់រំ ត្រូវបានគេ រំពឹងថា នឹងផ្ដល់វគ្គបណ្តុះបណ្តាលតាមរយៈអ៊ិនធើណិត និងឯកសារបង្រៀន-រៀន ដែលនឹងជួយដល់លោកគ្រូ អ្នកគ្រូ នៅតាមខេត្ត បំប៉នបន្ថែម នូវជំនាញ របស់ខ្លួន។
ឯកឧត្ដម អ៊ឹម សិទ្ធី រដ្ឋមន្ត្រីក្រសួងអប់រំ យុវជន និងកីឡា មានប្រសាសន៍ថា៖ “នេះគឺជាគំរូមួយទៀតនៃរបៀបដែលវិស័យសាធារណៈ និងវិស័យឯកជនអាចធ្វើការរួមគ្នាដើម្បីការអភិវឌ្ឍ ប្រទេសកម្ពុជា។
ក្រុមហ៊ុន Ezecom នឹងផ្ដល់ការដំឡើងបណ្ដាញខ្សែកាបអុបទិកដោយឥតគិតថ្លៃ ព្រមទាំងការប្រើអ៊ិនធើណិតដោយឥតគិតថ្លៃដល់សាលារៀន និងគ្រឹះស្ថានបណ្តុះបណ្តាលគ្រូចំនួន ៥០ នៅទូទាំងប្រទេស។ យោងតាមក្រុមហ៊ុន Ezecom ការដំឡើងនេះត្រូវបានធ្វើរួចរាល់ហើយ ហើយសេវាអ៊ិនធើណិតក៏ត្រូវដាក់ឲ្យប្រើប្រាស់រួចរាល់ហើយដែរ។
លោក Paul Blanche-Horgan ប្រធានក្រុមហ៊ុន Ezecom មានប្រសាសន៍ថា “ជានិច្ចកាល Ezecom មានបំណងប្រើប្រាស់សមត្ថភាព IT របស់ខ្លួនដើម្បីចូលរួមចំណែកក្នុងការអភិវឌ្ឍប្រទេស។ គម្រោងនេះនឹងអនុញ្ញាតឲ្យយើងប្រើប្រាស់បណ្ដាញខ្សែកាបអុបទិកប្រវែង ៩០០០គីឡូម៉ែត្ររបស់យើង ដើម្បីផ្ដល់កាលានុវត្តភាពអប់រំដល់យុវសិស្សនៅទូទាំងប្រទេស”។
យោងតាមលោក Blanche-Horgan អំណោយជាអ៊ិនធើណិត និងការដំឡើងបណ្ដាញ ដោយឥតគិតថ្លៃ មានតម្លៃជាទឹកប្រាក់ រាប់ម៉ឺនដុល្លារ សហរដ្ឋអាមេរិក។ សិស្សានុសិស្សប្រមាណ ១សែននាក់ នឹងទទួលបានផលប្រយោជន៍ពីសេវាអ៊ិនធើណិតដោយឥតគិតថ្លៃនេះ។
ក្រុមហ៊ុន Ezecom ត្រូវបានបង្កើតឡើងនៅឆ្នាំ២០០៧ ហើយចាប់តាំងពីពេលនោះមក បានក្លាយជាក្រុមហ៊ុនផ្ដល់សេវាអ៊ិនធើណិត ឈានមុខគេមួយ ក្នុងចំណោម ក្រុមហ៊ុន សេវាអ៊ិនធើណិត ឈានមុខគេជាច្រើននៅកម្ពុជា។ Ezecom ផ្ដល់សេវាខ្សែកាបអុបទិក WIMAX និងដំណោះស្រាយតាមអ៊ិនធើណិត ដល់ក្រុមហ៊ុននិងអតិថិជននៅទូទាំងប្រទេសកម្ពុជា។ ថ្មីៗនេះ ក្រុមហ៊ុន Ezecom បានទិញយក ក្រុមហ៊ុន ខ្សែកាប អុបទិក Telcotech ដោយបានពង្រីកសេវាគ្របដណ្ដប់ដល់ទៅ ៩៩% នៅទូទាំងប្រទេស៕