ភ្នំពេញ: ស្ថានទូតម៉ាឡេស៊ី ប្រចាំព្រះរាជាណាចក្រកម្ពុជា បានប្រារព្ធពិធីរំលឹកខួបបុណ្យឯករាជ្យ លើកទី ៥៥ឆ្នាំ កាលពីយប់ថ្ងៃទី១៧ ខែកញ្ញា ឆ្នាំ២០១២ នៅសណ្ឋាគារ ណាហ្គាវើល ក្នុងរាជធានីភ្នំពេញ។ ក្នុងពិធីនោះ លោកប្រមុខការទូតកម្ពុជា ហោ ណាំហុង បានប្រកាសបញ្ជាក់ពីទំនាក់ទំនងការទូតល្អរវាងកម្ពុជា និងម៉ាឡេស៊ី។
ដោយមានការចូលរួមពីសំណាក់ប្រមុខការទូតកម្ពុជាលោកឧបនាយករដ្ឋមន្ត្រី ហោ ណាំហុង និងឯកអគ្គរដ្ឋទូត អគ្គរាជទូត និងតំណាងស្ថានទូតប្រចាំកម្ពុជា។
លោកឧបនាយករដ្ឋមន្ត្រី ហោ ណាំហុង រដ្ឋមន្ត្រីក្រសួងការបរទេស និងកិច្ចសហប្រតិបត្តិការអន្តរជាតិ នៃព្រះរាជាណាចក្រកម្ពុជា បានមានប្រសាសន៍ក្នុងពិធីនោះថា ទំនាក់ទំនងរវាងព្រះរាជាណាចក្រកម្ពុជា និងប្រទេសម៉ាឡេស៊ី គឺជាទំនាក់ទំនងដ៏ល្អ និងមានជាយូរឆ្នាំមកហើយ។
លោកបានរម្លឹកថា ចាប់តាំងពីឆ្នាំ១៩៩៣មក គឺទំនាក់ទំនងរវាងកម្ពុជា និងម៉ាឡេស៊ី មានការរីកចម្រើនជាលំដាប់។
លោកឧបនាយករដ្ឋមន្ត្រី ហោ ណាំហុង បានមានប្រសាសន៍បន្តថា កម្ពុជា និងម៉ាឡេស៊ី មិនត្រឹមតែជាអ្នកជិតខាង នឹងគ្នាប៉ុណ្ណោះទេ គឺថែមទាំងជាប្រទេសស្ថិតក្នុងគ្រួសារតែមួយ គឺអាស៊ាន៕
