ភ្នំពេញ: លោកឧបនាយករដ្ឋមន្ត្រី ហោ ណាំហុង រដ្ឋមន្ត្រីការបរទេស និងសហប្រតិបត្តិការអន្តរជាតិ ជាតំណាងដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នឹងដឹកនាំគណៈប្រតិភូអញ្ជើញចូលរួមក្នុងសម័យប្រជុំលើកទី៦៧ នៃមហាសន្និបាតអង្គការសហប្រជាជាតិ នៅទីក្រុងញូវយ៉ក ចាប់ពីថ្ងៃទី២៥ខែកញ្ញា ដល់ទី៤ ខែតុលា ឆ្នាំ២០១២។
សេចក្តីជូនព័ត៌មាន របស់ក្រសួងការបរទេស និងសហប្រតិបត្តិការអន្តរជាតិ នៅថ្ងៃទី១៨ ខែកញ្ញា ឆ្នាំ២០១២ បានបង្ហាញថា លោកឧបនាយករដ្ឋមន្ត្រី ហោ ណាំហុង នឹងថ្លែងសុន្ទរកថា ក្នុងសម័យប្រជុំលើកទី៦៧ នៃមហាសន្និបាតអង្គការសហប្រជាជាតិ នៅថ្ងៃទី២៩ ខែកញ្ញា ឆ្នាំ២០១២។ ទន្ទឹមនឹងនេះ លោកឧបនាយករដ្ឋមន្ត្រី នឹងធ្វើជាប្រធាននៃកិច្ចប្រជុំរដ្ឋមន្ត្រីការបរទេសអាស៊ានក្រៅផ្លូវការ និងចូលរួមកិច្ចប្រជុំតុមូលរដ្ឋមន្ត្រីការបរទេសអាស៊ាន ជាមួយរដ្ឋមន្ត្រីការបរទេសសហរដ្ឋអាមេរិក កិច្ចប្រជុំរដ្ឋមន្ត្រីការបរទេសអាស៊ាន ជាមួយប្រធានមហាសន្និបាតអង្គការសហប្រជាជាតិ និងអគ្គលេខាធិការអង្គការសហប្រជាជាតិ។
សេចក្តីជូនព័ត៌មានដដែល បានលើកឡើងទៀតថា លោកឧបនាយករដ្ឋមន្ត្រី ហោ ណាំហុង នឹងចូលរួមកិច្ចប្រជុំជាន់ខ្ពស់ នៃអនុសញ្ញាអាវុធគីមី ស្តីពី “១៥ ឆ្នាំ នៃអនុសញ្ញាអាវុធគីមី: ភាពជោគជ័យនៃប្រតិបត្តិការ និងការប្តេជ្ញា ចំពោះអនាគតកាល” និងចុះហត្ថលេខាលើអនុសញ្ញាអង្គការសហប្រជាជាតិចំនួន៤ ដូចខាងក្រោម៖
១-អនុសញ្ញា ស្តីពី ការទទួលខុសត្រូវខាងរដ្ឋប្បវេណី ចំពោះការខូចខាតក្នុងអំឡុងពេលដឹកជញ្ជូនទំនិញគ្រោះថ្នាក់តាមផ្លូវគោក ផ្លូវដែក និងផ្លូវទឹកក្នុងប្រទេស។
២-អនុសញ្ញា អង្គការសហប្រជាជាតិ ស្តីពី រូបិយាណត្តិអន្តរជាតិ និងប័ណ្ណសងតាមបញ្ជាអន្តរជាតិ។
៣-អនុសញ្ញា អង្គការសហប្រជាជាតិ ស្តីពីការចាត់តាំងតំណាងសំរាប់ទូទាត់បំណុលក្នុងពាណិជ្ជកម្មអន្តរជាតិ។
៤-អនុសញ្ញា អង្គការសហប្រជាជាតិ ស្តីពីការប្រើប្រាស់គមនាគមន៍អេឡិចត្រូនិច ក្នុងកិច្ចសន្យា អន្តរជាតិ។
សេចក្តីជូនព័ត៌មាន ក៏បានបន្ថែមថា ក្រៅពីនេះ លោកឧបនាយករដ្ឋមន្ត្រី ហោ ណាំហុង នឹងជួបពិភាក្សាការងារទ្វេភាគីជាមួយរដ្ឋមន្ត្រីការបរទេសមួយចំនួន៕
