ភ្នំពេញ: ក្រសួងមហាផ្ទៃ បានទទួលយល់ព្រម ជួបពិភាក្សាជាមួយតំណាងគណបក្សសមរង្ស៊ី និងគណបក្សសិទ្ធិមនុស្ស នៅព្រឹកថ្ងៃទី២០ ខែកញ្ញាឆ្នាំ ២០១២ ដើម្បីពិភាក្សាស្តីពីសមាសភាពគណៈកម្មាធិការជាតិរៀបចំការបោះឆ្នោត (គ.ជ.ប)។ ការសម្រេចដូច្នេះ ធ្វើឡើងតាមរយៈលិខិត ចុះថ្ងៃទី១៨ ខែកញ្ញា ឆ្នាំ២០១២ ដែលចុះហត្ថលេខាដោយលោក នុត សាអាន រដ្ឋលេខាធិការក្រសួងមហាផ្ទៃ។
ក្នុងលិខិតផ្ញើជូនលោក កឹម សុខា ប្រធានគណបក្សសិទ្ធិមនុស្ស និងលោក គង់ គាំ ប្រធានស្តីទី គណបក្សសមរង្ស៊ី បានជំរាបជូនប្រធានគណបក្សប្រឆាំងទាំងពីរថា លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ បានប្រគល់ភារកិច្ចជូនលោក ព្រំ សុខា រដ្ឋលេខាធិការក្រសួងមហាផ្ទៃ ទទួលជួបពិភាក្សា ជាមួយគណបក្សសមរង្ស៊ី និងគណបក្សសិទ្ធិមនុស្ស នៅថ្ងៃព្រហស្បតិ៍ទី២០ ខែកញ្ញា ឆ្នាំ២០១២វេលាម៉ោង ៩ ព្រឹក នៅទីស្តីការក្រសួងមហាផ្ទៃ។ នៅក្នុងជំនួបនោះ ក្រសួងសុំឲ្យគណបក្ស ទាំងពីរចាត់តាំងតំណាង ២នាក់ ក្នុងមួយគណបក្ស និងសុំឲ្យស្នើសមាសភាពអ្នកត្រូវចូលរួមពិភាក្សា មកក្រសួង នៅថ្ងៃទី១៩ ខែកញ្ញា ឆ្នាំ២០១២។
កាលពីថ្ងៃទី១៣ ខែកញ្ញា ឆ្នាំ២០១២ លោក កឹម សុខា ប្រធានគណបក្សសិទ្ធិមនុស្ស និងលោក គង់ គាំ ប្រធានស្តីទីគណបក្សសមរង្ស៊ី បានចុះហត្ថលេខារួមគ្នា លើលិខិតតែមួយស្នើសុំជួបលោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ ឬតំណាង ដើម្បីពិភាក្សាគ្នា ស្តីពី សមាសភាពគណៈកម្មាធិការជាតិរៀបចំការបោះឆ្នោត(គ.ជ.ប) ដោយយោងតាមច្បាប់ស្តីពីការបោះឆ្នោតជ្រើសតាំងតំណាងរាស្ត្រ និងច្បាប់ស្តីពីវិសោធនកម្មច្បាប់ ស្តីពី ការបោះឆ្នោតជ្រើសតាំងតំណាងរាស្ត្រ។
នៅក្នុងលិខិតរបស់មេដឹកនាំគណបក្សប្រឆាំងទាំងពីរ បានបញ្ជាក់បន្តថា ការស្នើសុំពិភាក្សានោះ ក្នុងគោលបំណងពិគ្រោះយោបល់ពិភាក្សារកការឯកភាពជាតិ ដើម្បីឲ្យការបោះឆ្នោតឆ្នាំ២០១៣ ខាងមុខ ប្រព្រឹត្តតៅដោយសេរី ត្រឹមត្រូវ និងយុត្តិធម៌ ព្រមទាំងធ្វើឲ្យគណបក្សនយោបាយ អង្គការសង្គមស៊ីវិលជាតិ អន្តរជាតិ ជាពិសេសប្រជាពលរដ្ឋខ្មែរទទួលបាន។
សូមបញ្ជាក់ថា នៅព្រឹកថ្ងៃទី១៨ ខែកញ្ញា ឆ្នាំ២០១២ គណបក្សប្រឆាំង បានជួបពិភាក្សាសម្ងាត់បិទទ្វារ នៅសណ្ឋាគារអឹមភើរៀល ដើម្បីទទួលយកនូវផែនការអនុសាសន៍ពីតំណាងអង្គការក្រៅរដ្ឋាភិបាល សម្រាប់យកទៅជជែកជាមួយក្រសួងមហាផ្ទៃ នៅថ្ងៃទី២០ ខែកញ្ញា ឆ្នាំ២០១២។
ការព្យាយាមប្រឹងប្រែង ជួបពិភាក្សាជាមួយនឹងតំណាងក្រសួងមហាផ្ទៃ ដែលជាស្ថាប័នរៀបចំសមាសភាព គ.ជ.ប. មុននឹងបញ្ជូនទៅកាន់រដ្ឋសភា ដើម្បីអនុម័តនោះ បានធ្វើឡើងក្រោយពីលោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ បានបដិសេធនូវការស្នើសុំ និងរូបមន្តដោះដូរសមាសភាព គ.ជ.ប. និងគ.ជ.ប. តាមខេត្តរាជធានី ស្រុកខណ្ឌក្រុង និងគ.ជ.ប. តាមឃុំសង្កាត់ ដែលគណបក្សប្រឆាំងទាំងពីរ បានស្នើឡើង។
ក្នុងលិខិតចុះថ្ងៃទី៧ ខែកញ្ញា ឆ្នាំ២០១២ ដែលត្រូវបានគេផ្សព្វផ្សាយដល់អ្នកកាសែត កាលពីថ្ងៃទី១២ ខែកញ្ញា ឆ្នាំ២០១២ ត្រូវបានលោកឧបនាយករដ្ឋមន្ត្រី ស ខេង លើកឡើងថា សំណើររួមគ្នារបស់គណបក្សប្រឆាំងទាំងពីរ ក្នុងការដោះដូរសមាសភាព គ.ជ.ប. អាចធ្វើឲ្យដំណើរការបោះឆ្នោតទាំងមូល ត្រូវប្រឈមជាមួយភាពជាប់គាំង ដែលនឹងនាំឲ្យប៉ះពាល់មកលើស្ថិរភាពនយោបាយរបស់ជាតិ។
សូមរម្លឹកថា ក្នុងលិខិតរួមគ្នារបស់គណបក្សសមរង្ស៊ី និងគណបក្សសិទ្ធិមនុស្ស ចុះថ្ងៃទី៣០ ខែសីហា ឆ្នាំ២០១២ បានស្នើសុំឲ្យលោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ ធ្វើការដោះដូរសមាសភាព គ.ជ.ប. ទាំង ៧ រូប ដែលត្រូវជាឥស្សរជនឯករាជ្យ និងត្រូវជ្រើសរើសដោយគណៈកម្មការចម្រុះមួយ ដែលមានសមាសភាពចេញពីតំណាងគណបក្សនយោបាយ ដែលមានអាសនៈក្នុងរដ្ឋសភា។ ក្រៅពីនោះ គណបក្សប្រឆាំងទាំងពីរ ក៏បានស្នើរូបមន្ត ដើម្បីឲ្យមានការដោះដូរសមាសភាព គ.ជ.ប. នៅថ្នាក់ជាតិ និងតាមខេត្តរាជធានី ស្រុកខណ្ឌ ព្រមទាំងនៅឃុំសង្កាត់ និងសមាសភាព គ.ជ.ប. នៅតាមការិយាល័យបោះឆ្នោត និងរាប់សន្លឹកឆ្នោតផងដែរ៕