.jpg)
កិច្ចប្រជុំស្តីពី “ការតភា្ជប់អាស៊ាន សំរាប់កសាងសហគមន៍អាស៊ាន” រយៈពេលពីរថ្ងៃ ចាប់ពីថ្ងៃទី៧ និងថ្ងៃទី៨ ខែកញ្ញា ឆ្នាំ២០១២ នៅសណ្ឋាគារ អាំងទែកុងទីណង់តាល់ ក្នុងរាជធានីភ្នំពេញ ធ្វើឡើង ក្នុងបំណង ដើម្បីពង្រឹងកិច្ចទំនាក់ទំនង និងការអភិវឌ្ឍ អាស៊ាន ជាពិសសការតភ្ជាប់តំបន់អាស៊ានជាសហគមន៍តែមួយ ក្នុងឆ្នាំ២០១៥។
លោក Lim Chze Cheen តំណាងអគ្គលេខាធិការអាស៊ាន លោក ស៊ូរិន ពិតសុវណ្ណ បានមានប្រសាសន៍ថា ការតភ្ជាប់អាស៊ាន គឺជាកូនសោរគន្លឹះ សម្រាប់ការអភិវឌ្ឍយូរអង្វែង ក្នុងសមាគមន៍អាស៊ាន។
លោកបន្តថា នៅសល់តែរយៈពេលបីឆ្នាំទៀតប៉ុណ្ណោះ អាស៊ាននឹងក្លាយទៅជាសហគមន៍អាស៊ាន ក្នុងឆ្នាំ២០១៥ ដែលតម្រូវឲ្យប្រទេស ជាសមាជិកអាស៊ាន ត្រូវដោះស្រាយរាល់វិបត្តិផ្សេងៗ ដើម្បីខិតខំប្រឹងប្រែងកសាងសហគមន៍អាស៊ានមួយនេះ ឲ្យលេចចេញជារូបរាងឡើង។
លោក Lim Chze Cheen បានបញ្ជាក់ថា ខណៈដែលសមាជិកអាស៊ានទាំងអស់ មានការប្តេជ្ញា ក្នុងការកសាងសហគមន៍អាស៊ាន ធនាគារអភិវឌ្ឍន៍អាស៊ី ហៅកាត់ថា ADB បានប៉ាន់ប្រមាណថា អាស៊ាននឹងត្រូវការទឹកប្រាក់វិនិយោគហេដ្ឋារចនាសម្ព័ន្ធជាង ៦០០ ពាន់លានដុល្លារ ក្នុងរយៈពេល ១០ឆ្នាំទៀត។
នៅក្នុងសុន្ទរកថា នាកិច្ចប្រជុំរដ្ឋមន្ត្រីសេដ្ឋកិច្ចអាស៊ាន លើកទី៤៤ នាទីក្រុងសៀមរាប កាលពីថ្ងៃទី២៧ ខែសីហា ឆ្នាំ២០១២ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃប្រទេសកម្ពុជា បានថ្លែងថា៖ “ថវិកាប្រមាណជា ៦០០ លានដុល្លារនេះ គឺស្ថិតក្នុងបរិមាណតិចតួចនៅឡើយ ពុំគ្រប់គ្រាន់ក្នុងការទ្រទ្រង់តម្រូវការយ៉ាងសម្បើម ចំពោះតំណភ្ជាប់អាស៊ានបានទេ។ ដូច្នេះរដ្ឋមន្ត្រីសេដ្ឋកិច្ចអាស៊ាន និងរដ្ឋមន្ត្រីហិរញ្ញវត្ថុអាស៊ាន ត្រូវផ្តោតជាសំខាន់ ក្នុងការទាក់ទាញដៃគូហិរញ្ញវត្ថុ ដើម្បីបង្កើននូវថវិកា ជាពិសេសដៃគូអាស៊ានបូកបី កិច្ចប្រជុំអាស៊ីបូព៌ា និងស្ថាប័នពហុភាគី”។
តំណាងអគ្គលេខាធិការអាស៊ាន ក៏បានលើកឡើងថា ការតំណភ្ជាប់ តំបន់អាស៊ាន នៅសល់តែជាងពីរឆ្នាំទៀតប៉ុណ្ណោះ គឺនៅឆ្នាំ២០១៥។ ដូច្នេះអ្វីដែល ជាចំណុចអាទិភាពនៃដំណើរការសមាហរណកម្ម ក្នុងតំបន់ គឺសារៈសំខាន់នៃរូបសាស្ត្រអាស៊ាន ស្ថាប័ន និងទំនាក់ទំនងរវាងមនុស្ស និងមនុស្ស។ សកម្មភាពទាំងនេះ នឹងធ្វើឲ្យដំណើរការផលិតផលមានដំណើរ ការល្អប្រសើរ, សេវាកម្ម និងមនុស្សដោយបន្ទាត់ នៃពេលវេលា នឹងក្លាយជាកត្តា ប្រឈមពិតប្រាកដ។
ក្នុងពេលផ្តើមសន្និសីទ កាលពីថ្ងៃទី៧ ខែកញ្ញា ឆ្នាំ២០១២ លោកឧបនាយករដ្ឋមន្ត្រី ហោ ណាំហុង រដ្ឋមន្ត្រីការបរទេសកម្ពុជា ក្នុងនាមជាប្រធានអាស៊ាន បានលើកឡើងថា លោកឧបនាយករដ្ឋមន្ត្រី ហោ ណាំហុង រដ្ឋមន្ត្រីការបរទេសកម្ពុជា ដែលជាប្រធាននៃកិច្ចប្រជុំ បានលើកឡើងថា សមាគមអាស៊ាន មានគោលបំណងជំរុញការតភ្ជាប់តំបន់ ខណៈពេលដែលអាស៊ាន កំពុងឆ្ពោះទៅជាសហគមន៍អាស៊ាន នាឆ្នាំ២០១៥ ដោយត្រូវការចូលរួមយ៉ាងពេញលេញពីវិស័យឯកជន។
លោកឧបនាយករដ្ឋមន្ត្រី ហោ ណាំហុង បានគូសបញ្ជាក់ថា “ក្នុងការតភ្ជាប់តំបន់អាស៊ាន ឲ្យបានចប់សព្វគ្រប់ ខ្ញុំគិតថា វិស័យឯកជន គួរតែត្រូវចាត់ទុកជាដៃគូដ៏សំខាន់ពេញលេញមួយ។ អាស៊ានត្រូវតែធ្វើសមាហរណកម្ម មានភាពទាក់ទងគ្នាឲ្យបានច្រើន ទាំងផ្នែកនយោបាយ និងសេដ្ឋកិច្ច ជាកន្លែង ដែលវិស័យឯកជនដើរតួជាម៉ាស៊ីនយ៉ាងសំខាន់ សំរាប់កំណើនសេដ្ឋកិច្ច និងការអភិវឌ្ឍន៍”៕