ភ្នំពេញ: គណបក្សសង្គ្រោះជាតិ បានបើកសម្ពោធទីស្នាក់ការកណ្តាលរបស់ខ្លួន នៅរាជធានីភ្នំពេញ នៅរសៀលថ្ងៃទី១១ ខែកញ្ញា ឆ្នាំ២០១២ ដោយមានការចូលរួមពីលោក កឹម សុខា ប្រធានគណបក្សសិទ្ធិមនុស្ស និងលោកសម រង្ស៊ី តាមរយៈវីដេអូ Conference។ ទីស្នាក់កណ្តាលគណបក្សសង្គ្រោះជាតិ មានទីតាំងស្ថិតនៅផ្ទះលេខ៣៨ ផ្លូវ១៩៧២ ក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
លោក ប៉ុល ហំម អនុប្រធានគណៈកម្មាធិការបណ្តោះអាសន្ន នៃគណបក្សសង្គ្រោះជាតិ បានមានប្រសាសន៍ កាលពីរសៀលថ្ងៃទី៩ ខែកញ្ញា ថា នៅថ្ងៃទី១១ ខែកញ្ញា ឆ្នាំ២០១២ គណបក្សសង្គ្រោះជាតិ នឹងបើកទីស្នាក់ការរបស់គណបក្ស។ ការសម្ពោធស្នាក់គណគណបក្ស នៅពេលនេះ យោងទៅតាម មាត្រា៩ នៃច្បាប់ស្តី ពីគណបក្សនយោបាយ នៅពេលដែលក្រសួងមហាផ្ទៃ ទទួលស្គាល់ស្តីពីការបង្កើតគណបក្សសង្គ្រោះជាតិ។ បន្ទាប់មកគណបក្ស មានសិទ្ធិលើកស្លាក និងបន្តដំណើរបំពេញបែបបទតទៅទៀត ដូចជា ការយកស្នាមមេ ៤.០០០ នាក់ ធ្វើលក្ខន្តិកៈ និងកម្មវិធីនយោបាយ ដើម្បីយកទៅដាក់ជូននៅក្រសួងមហាផ្ទៃ នៅក្នុងសប្តាហ៍ខាងមុខនេះ។
លោក ប៉ុល ហំម បានបន្តថា ចំពោះអ្នកដែលចូលរួមក្នុងពិធីបើកស្នាក់ការគណបក្ស គឺមានថ្នាក់ដឹកនាំគណបក្សសង្គ្រោះជាតិ ថ្នាក់ដឹកនាំគណបក្សសិទ្ធិមនុស្ស និងគណបក្សសមរង្ស៊ី មានដូចជា លោកកឹម សុខា លោកគង់ គាំ និងលោក សម រង្ស៊ី តាមរយៈវីដេអីខិនហ្វ្រើរិន។
លោក ប៉ុល ហំម បានបន្ថែមថា ការលើកស្លាកគណបក្សសង្គ្រោះជាតិ គឺលើកនៅតែរាជធានីភ្នំពេញ ហើយនៅតាមបណ្តាខេត្ត គឺនៅមិនទាន់លើកទេ ដោយសារតែមិនទាន់មានរចនាសម្ព័ន្ធតាមខេត្ត។
ចំពោះស្នាមមេដៃអ្នកគាំទ្រឲ្យបង្កគណបក្សសង្គ្រោះជាតិ ចំនួន ៤.០០០នាក់ រួមទាំងលក្ខន្តិកៈ ដែលយកទៅចុះបញ្ជីនៅក្រសួងមហាផ្ទៃ ត្រូវបានអនុប្រធានគណៈកម្មាធិការបណ្តោះអាសន្ន នៃគណបក្សសង្គ្រោះជាតិ លោក ប៉ុល ហំម បានបញ្ជាក់ថា "គណបក្សនឹងព្យាយមយកទៅដាក់ជូនក្រសួងមហាផ្ទៃ នៅសប្តាហ៍ក្រោយ តែមិនទាន់ដឹងថា ថ្ងៃណាទេ ដោយរង់ចាំលោកសម រង្ស៊ី ចុះហត្ថលេខាលើលិខិតនោះ ពីព្រោះលោក ជាប្រធាន”។
គណបក្សសង្គ្រោះជាតិ ដែលរួមគ្នាបង្កើតឡើងដោយគណបក្សសមរង្ស៊ី និងគណបក្សសិទ្ធិមនុស្ស បានដាក់ពាក្យទៅលោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ សុំបង្កើតគណបក្ស កាលពីថ្ងៃទី២៤ ខែសីហា ឆ្នាំ២០១២។ នៅថ្ងៃទី៣០ ខែសីហា ឆ្នាំ២០១២ លោកឧបនាយករដ្ឋមន្ត្រី ស ខេងបានយល់ព្រមឲ្យបង្កើតគណបក្សសង្គ្រោះជាតិ។ ប៉ុន្តែដើម្បីទទួលបានសុពលភាពគណបក្សសង្គ្រោះជាតិ ត្រូវបំពេញបែបបទ និងលក្ខខ័ណ្ឌ ដូចមានចែងក្នុងមាត្រា២០ ជំពូកទី៥ នៃច្បាប់គណបក្សនយោបាយ នោះគឺការបញ្ជូនស្នាមមេដៃអ្នកគាំទ្រឲ្យបានយ៉ាងតិច ៤.០០០ នាក់ លក្ខន្តិកៈ ព្រមទាំងកម្មវិធីនយោបាយរបស់គណបក្សសង្គ្រោះជាតិ ជាដើម ទៅកាន់ក្រសួងមហាផ្ទៃ៕