ភ្នំពេញ: គណៈកម្មាធិការជាតិរៀបចំការបោះឆ្នោត ហៅកាត់ គ.ជ.ប បានចុះពិនិត្យមើលការពិនិត្យបញ្ជីឈ្មោះ និងចុះឈ្មោះបោះឆ្នោត និងសម្រេចជាគោលការណ៍ បង្កើតមជ្ឈមណ្ឌលស្វែងរកឈ្មោះអ្នកបោះឆ្នោត តាមប្រព័ន្ធអ៊ីនធឺណិត នៅលេខាធិការដ្ឋានរាជធានីខេត្តរៀបចំការបោះឆ្នោត។
សេចក្ដីប្រកាសព័ត៌មានពី គ.ជ.ប ចុះថ្ងៃទី៨ ខែកញ្ញា ឆ្នាំ២០១២ បានបង្ហាញថា ចាប់តាំងពីការពិនិត្យបញ្ជីឈ្មោះ និងចុះឈ្មោះបោះឆ្នោត ដែលបានចាប់ផ្ដើមពីថ្ងៃទី១ ខែកញ្ញាមក ថ្នាក់ដឹកនាំគណៈកម្មាធិការជាតិរៀបចំការបោះឆ្នោត បានចុះពិនិត្យមើលដំណើរការនេះ នៅតាមបណ្ដាឃុំ-សង្កាត់ នៃរាជធានី-ខេត្តមួយចំនួន រួមមាន ខេត្តស្វាយរៀង ព្រៃវែង តាកែវ កំពត និងកែប។
នៅក្នុងសេចក្ដីប្រកាសព័ត៌មាន លោក ទេព នីថា អគ្គលេខាធិការ គ.ជ.ប បានមានប្រសាសន៍ថា នៅសប្ដាហ៍ទី២ នៃខែកញ្ញានេះ ថ្នាក់ដឹកនាំ គ.ជ.ប នឹងត្រៀមចុះទៅពិនិត្យមើលការងារពិនិត្យបញ្ជីឈ្មោះ និងចុះឈ្មោះបោះឆ្នោត នៅខេត្តមួយចំនួនទៀត។ លោកបន្តថា ជាទូទៅក្នុងរយៈពេលមួយសប្ដាហ៍ ដំណើរការនេះបានប្រព្រឹត្តទៅល្អទាំងសណ្ដាប់ធ្នាប់ និងសុវត្ថិភាព និងទទួលលទ្ធផលគួរកត់សម្គាល់។ នៅរាជធានីភ្នំពេញ អភិបាលរាជធានី និងអភិបាលខណ្ឌទាំង ៩ បានជួយជំរុញឲ្យគ្រប់សង្កាត់ទាំងអស់ ប្រើប្រាស់ប្រព័ន្ធអ៊ីនធឺណិត ស្វែងរកឈ្មោះអ្នកបោះឆ្នោត ដើម្បីជាជំនួយក្នុងការពិនិត្យបញ្ជីឈ្មោះ និងចុះឈ្មោះបោះឆ្នោត។
សេចក្ដីប្រកាសព័ត៌មានបានបន្ថែមថា នៅថ្ងៃទី៧ ខែកញ្ញា គ.ជ.ប បានសម្រេចជាគោលការណ៍ ឲ្យលេខាធិការដ្ឋានរាជធានី-ខេត្តរៀបចំការបោះឆ្នោត (លធ/ខប) រៀបចំបង្កើតមជ្ឈមណ្ឌលស្វែងរកឈ្មោះអ្នកបោះឆ្នោត ក្នុងបញ្ជីបោះឆ្នោតតាមប្រព័ន្ធអ៊ីនធឺណិត តាមគេទំព័រ www.voterlist.org.kh ដើម្បីផ្ដល់ព័ត៌មានជូនអ្នកបោះឆ្នោត។ បន្ថែមលើនេះ គ.ជ.ប ក៏បានធ្វើលិខិតមួយ កាលពីថ្ងៃទី៤ ខែកញ្ញា ផ្ញើជូនក្រសួងមហាផ្ទៃ ដើម្បីសុំជួយអន្តរាគមន៍ដល់អភិបាល នៃគណៈអភិបាលរាជធានី-ខេត្ត បង្កលក្ខណៈងាយស្រួលឲ្យសាលាឃុំ-សង្កាត់ នៃរាជធានី-ខេត្តណា ដែលមានលទ្ធភាព និងសមត្ថភាពអាចប្រើប្រាស់កុំព្យូទ័រ ជាមួយនឹងអ៊ីនធឺណិត សំដៅពង្រឹងគុណភាពបញ្ជីបោះឆ្នោត និងបម្រើសេវាជូនប្រជាពលរដ្ឋ ក្នុងការស្វែងរកឈ្មោះ និងទិន្នន័យក្នុងពេលពិនិត្យបញ្ជីឈ្មោះ និងចុះឈ្មោះបោះឆ្នោត។
គួររម្លឹកថា កន្លងមក គ.ជ.ប តែងបើកមណ្ឌលស្វែងរកឈ្មោះអ្នកបោះឆ្នោតតាមប្រព័ន្ធអ៊ីនធឺណិត តាមរយៈទូរស័ព្ទរបស់អ្នកបោះឆ្នោត តែក្នុងរយៈពេលមុនថ្ងៃបោះឆ្នោតប៉ុណ្ណោះ៕ .