ភ្នំពេញ: ទីបំផុតទៅ បន្ទាប់ពីអ្នកកាសែតសួរនាំរឿងជនជាតិស៊ុយអ៊ែត កាលពីព្រឹកថ្ងៃទី៦ ខែកញ្ញា ឆ្នាំ២០១២ រួចមក គឺនៅល្ងាចថ្ងៃដដែលនោះ លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ បានចុះហត្ថលេខា លើលិខិត សម្រេចបណ្តេញបុរសជនជាតិស៊ុយអ៊ែត ដែលពាក់ព័ន្ធនឹងបទល្មើសបង្កើតគេហទំព័រ ចេញពីកម្ពុជា។ នេះបើតាមការបញ្ជាក់របស់អ្នកនាំពាក្យក្រសួងមហាផ្ទៃ។
តាមនីតិវិធី បន្ទាប់ពីរដ្ឋមន្ត្រីក្រសួងមហាផ្ទៃ បានចុះហត្ថលេខា យល់ព្រមលើលិខិតបណ្ថេញចេញនោះរួចរាល់ហើយ គឺយ៉ាងយូររយៈពេលមួយសប្តាហ៍ក្រោយមក ប៉ូលិសនៅនាយកដ្ឋានអន្តោប្រវេសន៍ នឹងត្រូវអនុវត្តតាមសេចក្តីសម្រេចនោះ។
សូមរម្លឹកថា នៅក្រៅកិច្ចប្រជុំលើកទី៧ របស់គណៈកម្មាធិការជាតិ សម្រាប់ការ អភិវឌ្ឍន៍តាមបែបប្រជាធិបតេយ្យ នៅថ្នាក់ក្រោមជាតិ គ.ជ.អ.ប. នៅទីស្តីការក្រសួងមហាផ្ទៃ នាព្រឹកថ្ងៃទី៦ ខែកញ្ញា ឆ្នាំ២០១២ លោកឧបនាយករដ្ឋមន្ត្រី ស ខេង បានមានប្រសាសន៍ទៅកាន់អ្នកកាសែតថា "ឯកសារ មិនទាន់បានមកដល់ដៃរបស់ខ្ញុំទេ ប៉ុន្តែធ្វើតាមច្បាប់។ អានឹងវាអត់ប្រព្រឹត្តបទល្មើសនៅយើងទេ។ ប្រព្រឹត្តបទល្មើសនៅស៊ុយអែតឯណោះ"។
ប៉ូលិសកម្ពុជា បានចាប់ខ្លួនជនជាតិស៊ុយអ៊ែតម្នាក់ កាលពីថ្ងៃព្រហស្បតិ៍ ទី៣០ ខែសីហា ឆ្នាំ២០១២ តាមសំណើរបស់រដ្ឋាភិបាលស៊ុយអ៊ែត។ រដ្ឋាភិបាលកម្ពុជា បានសម្រេចថា នឹងបញ្ជូនជនជាតិស៊ុយអ៊ែត ឈ្មោះ Gottfrid Svartholm Warg អាយុ ២៧ឆ្នាំ ចេញពីកម្ពុជា។
ជនជាតិស៊ុយអ៊ែតនោះ ជាសហស្ថាបនិកគេហទំព័រ The Pirate Bay ដែលត្រូវបានតុលាការស៊ុយអ៊ែត កាត់ទោសអោយជាប់ពន្ធនាគារមួយឆ្នាំ ក្រោមបទចោទរំលោភកម្មសិទ្ធិបញ្ញា កាលពីឆ្នាំ២០០៩។
គេហទំព័រ The Pirate Bay បង្កើតឡើងនៅឆ្នាំ២០០៣ មានសមាជិករហូតដល់៣០ លាននាក់។ គេហទំព័រនេះ អនុញ្ញាតអោយសមាជិក អាចទាញយកឯកសារ បទចម្រៀង និងកម្មវិធីហ្គេមនានា ដោយមិនគោរពកម្មសិទ្ធិបញ្ញាឡើយ៕
