កំពង់ធំ ៖ កាលពីថ្ងៃទី ១៥ខែ កញ្ញា ឆ្នាំ ២០១២ នៅវេលាម៉ោង ៨នាទីព្រឹក នៅទីស្នាក់ការគណបក្ស ប្រជាជនកម្ពុជា ស្រុកស្ទោង មានពិធីប្រជុំ ជំរុញក្នុងយុទ្ធនាការចុះឈ្មោះបោះឆ្នោត និងពនិត្យបញ្ជីឈ្មោះថ្មី បោះឆ្នោតឆ្នាំ២០១២ ក្រោមអធិបតីភាព លោក ផាន់ សុផេង ទីប្រឹក្សាលោក ងួន ញ៉ិលអនុប្រធានទី១ នៃរដ្ឋសភា និងជាសមាជិកគណៈអចិន្ត្រៃយ៍បក្សខេត្ត និងជាអនុប្រធានក្រុមការងារ ថ្នាក់ខេត្តចុះជួយស្រុកសំបូរ ស្រុកសណ្ដាន់ ស្រុកស្ទោង ដើម្បីលើកទិសដៅអនុវត្តបន្តក្នុងការត្រៀមការបោះឆ្នោតជ្រើសរើសតំណាង រាស្ត្រ នីតិកាលទី ៥ ឆ្នាំ២០១៣ ព្រមទាំងសមាជិកគណបក្សទូទាំងស្រុកចូលរួម យ៉ាងច្រើនកុះករ។
លោក ព្រឹម រដ្ឋា ប្រធានគណបក្សស្រុកស្ទោង បានលើកយកលទ្ធផលការចុះឈ្មោះបោះឆ្នោតថ្មី ដែលត្រូវបានអនុវត្តរួមមាន ឃុំ បន្ទាយស្ទោងមាន៤៩នាក់ ឃុំចំណាក្រោម ១៦៣នាក់ ឃុំ ចំណាលើ ៩២នាក់ ឃុំ កំពង់ចិនជើង ៦៦នាក់ ឃុំកំពង់ចិនត្បូង ៣៦នាក់ ឃុំម្សាក្រង ៤០នាក់ ឃុំពាមបាង ៥៩នាក់ ឃុំពពក ៥០នាក់ ឃុំ ប្រឡាយ ៨៥នាក់ ឃុំ ព្រះដំរីមាន ២១នាក់ ឃុំ រុងរឿងមាន ៣៧នាក់ ឃុំសព្រោជមាន ២៦៨នាក់ ឃុំ ទ្រា មាន៧៦នាក់ ក្នុងនោះគណបក្សស្រុកនិងខិតខំប្រឹងប្រែងបន្តទៀត ជំរុញឲ្យប្រជាពលរដ្ឋ មកចុះឈ្មោះឲ្យមានបរិមាណកើនឡើងតាមផែនការ។
លោក ផាន់ សុផេង បានមានប្រសាសន៍ កោតសរសើរដល់ ក្រុមប្រឹក្សាឃុំទាំងអស់ដែលបានខិតខំប្រឹងប្រែង អនុវត្តតាមគោលនយោបាយរបស់គណបក្សប្រជាជនលើកទិសដៅអនុវត្តឲ្យបានសំឡេងគាំទ្រឲ្យមានការកើនឡើងថែមទៀតក្នុងការបោះឆ្នោត រាល់ភារកិច្ចដែលបានកំណត់ក្នុងរបាយការណ៍របស់គណៈអចិន្ត្រៃយ៍ស្តីពីសភាពការណ៍អនុវត្តបន្តជំរុញការងារចិញ្ចឹមចលនាមូលដ្ឋានជំរុញអនុវត្តគំរោងនានានៅមូលដ្ឋានឲ្យចេញផ្លែផ្កា ប្រកបដោយតម្លាភាព ពិនិត្យការកែសម្រួលការចាត់តាំងក្រុមការងារ ជំរុញសមាជិកគណបក្សជាយុវជនដែលដល់អាយុបោះឆ្នោត បង្កើនការងារកសាងគណបក្សក្នុងជួរយុវជន និងកម្មករ និងជំរុញសកម្មភាពយុវជនរបស់គណបក្ស ឲ្យបានខ្លាំងក្លាថែមទៀត។
លោក បានណែនាំដល់មន្ត្រីរាជាការ និងអាជ្ញាធរស្រុក កសាងផែនការទី១ ជំរុញឲ្យសកម្មភាពចុះ ឈ្មោះបោះឆ្នោត និងពិនិត្យបញ្ជីឈ្មោះបោះឆ្នោត ទី២ ត្រៀមលក្ខណៈជួយសង្គ្រោះប្រជាពលរដ្ឋក្នុងពេលមានទឹកជំនន់ ឲ្យមានលក្ខណៈប្រើប្រាស់កំលាំងរួមក្នុងការជួយអន្តរាគមន៍ ទាន់ពេលវេលា នូវឧបករណ៍ ស្បៀងអាហារ កាណូត ប្រេង អាវការពារសុវត្តិភាព ថ្នាំពេទ្យ និងត្រៀមរៀបចំទីទួលសុវត្ថិភាពដើម្បីដឹក ជញ្ជូនជម្លៀសប្រជាពលរដ្ឋ អាជ្ញាធរត្រូវចុះសង្កេតការណ៍ស្ថានភាពទឹកជំនន់ និងរាយការណ៍មកថ្នាក់លើ ជាប្រចាំ។ ចំណុចទី៣ អាជ្ញាធរត្រូវ ក៏ដូចជាសមត្ថកិច្ចជំនាញសុរិយោដី សហការឲ្យបានល្អ ជាមួយក្រុមយុវជននិស្សិតស្ម័គ្រចិត្តសម្តេច ហ៊ុន សែន ក្នុងយុទ្ធនាការវាស់វែងដីធ្លីជូនប្រជាពលរដ្ឋ តាមគោលនយោបាយសកម្មភាពថ្មី លើវិស័យដីធ្លី ឲ្យប្រជាពលរដ្ឋ ទទួលប័ណ្ណកម្មសិទ្ធិស្របច្បាប់ ដើម្បីឲ្យប្រជាពលរដ្ឋ មានលទ្ធភាពក្នុងការបង្កបង្កើនផល។ ចំណុចទី ៤ ត្រូវបញ្ចប់បញ្ហាការរុករានវាតទីយកដី ព្រៃខុសច្បាប់។
ចំណុចទី ៥ អាជ្ញាធរ មូលដ្ឋាន ត្រូវកសាងសមិទ្ធផលផ្សេងៗនៅក្នុងមូលដ្ឋាន ដែលធ្លាប់បានសន្យាជាមួយប្រជាពលរដ្ឋ និងរឹតបន្តឹងចំណងសាមគ្គីជាមួយសមាជិកបក្ស និងប្រមូលផ្តុំសមាជិកថ្មី កុំបង្កើនបញ្ហា ជាមួយគណបក្សឃុំ និងរកដំណោះស្រាយដោយសន្តិវិធីជូនប្រជាពលរដ្ឋ៕