ព្រៃវែង ៖ ដោយរួមដំណើរដោយថ្នាក់ដឹកនាំជាន់ខ្ពស់រាជរដ្ឋាភិបាល នៅតាមបណ្ដាក្រសួងពាក់ព័ន្ធ មួយចំនួននោះ កាលពីថ្ងៃទី១៣ ខែកញ្ញា ឯកឧត្តម ឧបនាយករដ្ឋមន្ត្រី គាត ឈន់ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានអញ្ជើញទៅបំពេញទស្សនកិច្ចការងារ នៅក្នុងខេត្តព្រៃវែង ដែលមានគោលដៅ សំខាន់ក្នុងការពិនិត្យមើលគម្រោងហេដ្ឋារចនាសម្ព័ន្ធរូបវន្តនៅទីនោះ។
យោងតាមសេចក្តីជូនដំណឹងរបស់ក្រសួងសេដ្ឋកិច្ច និងហិរញ្ញវត្ថុឲ្យដឹងថា នៅក្នុងទស្សនកិច្ច ការងារនោះ គណៈប្រតិភូបានឆ្លៀតពិនិត្យគម្រោងស្ថាបនាផ្លូវជាតិលេខ ៨ ដែលក្រុមហ៊ុនសៀងហៃ ខន់ស្ត្រាក់សិន(ហ្គ្រុប)ជាអ្នកសាងសង់ ដែលគ្រោងនឹងដាក់សម្ពោធឲ្យប្រើប្រាស់ជាផ្លូវការនៅថ្ងៃទី ២២ ខែវិច្ឆិកា ឆ្នាំ ២០១២ ក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន។ នៅក្នុងពេលពិនិត្យ ការដ្ឋានសាងសង់ផ្លូវនោះ តំណាងក្រុមហ៊ុនបានរាយការណ៍ពីលទ្ធផលនៃការងារសាងសង់ និងការងារជួសជុល-ថែទាំផ្លូវ ដោយបានបញ្ជាក់ថា នៅត្រង់កន្លែងដែលមានស្នាមប្រេះ ឬខូចខាតខ្លាំងដោយ សារជំនន់នាំឲ្យមានទឹករលកខ្លាំងនាពេលកន្លងមក ក្រុមហ៊ុននឹងធ្វើការជួសជុល-កែលំអឲ្យបានហើយរួចរាល់ឡើងវិញ។ឯកឧត្តម គាត ឈន់ បានណែនាំដល់ក្រុមហ៊ុនឲ្យធ្វើយ៉ាងណា ពង្រឹងគុណភាព និង ប្រសិទ្ធភាព ដើម្បីរក្សាបាននូវទំនុកចិត្តទាំងរាជរដ្ឋាភិបាលកម្ពុជា និងទាំងរដ្ឋាភិបាលចិនផងដែរ។
ជាលទ្ធផលនៃបេសកកម្មការងារ ឯកឧត្តម ឧបនាយករដ្ឋមន្ត្រីនៅខេត្តព្រៃវែងរួមមានបាន ពិនិត្យ និងជ្រើសរើសយកគម្រោងអភិវឌ្ឍចំនួន ៨ ដែលជាអាទិភាពខ្ពស់សម្រាប់ឆ្នាំ ២០១៣ ដើម្បីបន្ត ធ្វើការសិក្សាវាយតម្លៃគម្រោងចំណាយជាក់ស្តែង និងគោរពសុំការសម្រេចដ៏ខ្ពង់ខ្ពស់ពីសម្តេចតេជោ នាយករដ្ឋមន្ត្រី ដែលក្នុងចំណោមគម្រោងទាំងនោះ ក៏មានគម្រោងស្ថាបនាផ្លូវលេខ ៣១៣ ពីសាលា ស្រុកបាភ្នំទៅដល់កអណ្ដើក និងផ្លូវជាតិលេខ ៣១១ ភ្ជាប់ពីផ្លូវជាតិលេខ ១១ ត្រង់កែងស្នេហ៍ដល់សាលាស្រុកបាភ្នំ ដែលមានហិរញ្ញប្បទានរួចហើយ ដើម្បីជួយសម្រួលចរាចរទិសមកពីខេត្តព្រៃវែងឬទៅ កំពង់ចាម សៀមរាបជាដើម អាចធ្វើដំណើរវៀងតាមផ្លូវនេះដោយមិនចាំបាច់ធ្វើដំណើរទៅតាមអ្នក លឿង និងក៏មានមួយគម្រោងទៀតគឺគម្រោងសាងសង់ផ្លូវលេខ ៣១០ ភ្ជាប់ពីអ្នកលឿងទៅពាមជរ និងព្រំដែនវៀតណាម ដើម្បីជួយដោះស្រាយបញ្ហាគមនាគមន៍ ជាពិសេសការដឹកជញ្ជូនទំនិញកសិផលគ្រប់ប្រភេទរបស់ប្រជាពលរដ្ឋ ដែលកំពុងសាងសង់ជាជំហានៗ។
គណៈប្រតិភូក៏បានពិនិត្យមើលគម្រោងអភិវឌ្ឍហេដ្ឋារចនាសម្ព័ន្ធរូបវន្តក្នុងខេត្តព្រៃវែង ពីស្ថាន ភាពផ្លូវខេត្តលេខ ៣៨៧ A ត្រង់ចំណុចទីរួមស្រុកកញ្ជៀចប្រវែង ២៥ គីឡូម៉ែត្រ ដែលផ្លូវនេះកំពុង ទទួលរងការខូចខាតយ៉ាងខ្លាំង កំណាត់ផ្លូវពីវត្តជាខ្លាង ឃុំជាខ្លាង ស្រុកស្វាយអន្ទរ ទៅដល់ស្រុកបាភ្នំ ប្រវែង ២៧,៥គីឡូម៉ែត្រ ដែលបច្ចុប្បន្នមានស្ថានភាពជាផ្លូវក្រាលគ្រួសក្រហមទទួលរងការខូចខាត ខ្លាំងដោយ មានគ្រលុកធំៗបង្កការលំបាកដល់ចរាចរសម្រាប់យានយន្តគ្រប់ប្រភេទ។កំណាត់ផ្លូវនេះ បានបំរើឲ្យការដឹកជញ្ជូនផលិតផលកសិកម្មរបស់ប្រជាពលរដ្ឋឃុំទឹកថ្លា ឃុំដំរីពួន ឃុំអង្គរទ្រេត និងឃុំ ជាខ្លាងទៅកាន់ផ្សារស្វាយអន្ទរ និងឆ្ពោះទៅកាន់ទីរួមខេត្តព្រៃវែង។
ឆ្លើយតបនឹងសំណូមពររបស់អាជ្ញាធរដែនដីនៅក្នុងគ្រានោះ ឯកឧត្តម គាត ឈន់ បានស្នើឲ្យ ក្រសួងពាក់ព័ន្ធពិចារណាលើសំណូមពរការសាងសង់ផ្លូវចូលតាមភូមិភ្ជាប់នឹងផ្លូវជាតិលេខ ៨ ប្រវែង សរុបជាង ២៣ គីឡូម៉ែត្រ ផ្លូវភ្ជាប់ពីផ្លូវជាតិលេខ ៨ ទៅស្រុកស៊ីធរកណ្តាល ផ្លូវភ្ជាប់ពីក្រុងព្រៃវែងទៅ ស្រុកពោរៀង និងផ្លូវភ្ជាប់ទៅស្រុកពាមជរ ដើម្បីចំណាត់អាទិភាព និងពិនិត្យលទ្ធភាពជាជំហានៗ។
នៅក្នុងឆ្នាំ ២០១២ រាជរដ្ឋាភិបាលបានផ្តល់ជូននូវគម្រោងអភិវឌ្ឍចំនួន ៤៧ ដល់ខេត្តព្រៃវែង ដែលមានថវិកាសរុបប្រមាណ ១៦៣ ៧៩៣ លានរៀលស្មើនឹង ៤១ លានដុល្លារសហរដ្ឋអាមេរិកដោយ មិនទាន់បានរាប់បញ្ចូលនូវគម្រោងអភិវឌ្ឍខ្នាតធំ ដែលហិរញ្ញប្បទានឥណទានពីដៃគូអភិវឌ្ឍនោះ ឡើយ។
នៅក្នុងកិច្ចប្រជុំមួយនៅសាលាខេត្តព្រៃវែង ឯកឧត្តម គាត ឈន់ បានមានប្រសាសន៍ថា ជារួម តម្រូវការក្នុងការអភិវឌ្ឍន៍មានទំហំធំធេងណាស់ បើគិតក្នុងក្របខ័ណ្ឌទូទាំងប្រទេស និងមានតម្រូវការ សព្វយ៉ាងនៅគ្រប់ទីកន្លែងទាំងអស់ ព្រោះកម្ពុជាកំពុងតែស្ថិតក្នុងដំណាក់កាលស្តារ និងកសាង។ទោះ ជាមានការផ្តល់ជូនគម្រោងអភិវឌ្ឍយ៉ាងណាក៏នៅតែមិនគ្រប់ ដោយសារតែថវិកាជាតិនៅមានកម្រិត។ ឯកឧត្តម ឧបនាយករដ្ឋមន្ត្រីថ្លែងថា ដើម្បីសម្រេចបានការអភិវឌ្ឍន៍ទូទាំងប្រទេស រាជរដ្ឋាភិបាលបាន ធ្វើការផ្តល់ជូនការអភិវឌ្ឍន៍ជាជំហានគីង្គក់ ដូចជាគោលការណ៍ដ៏ខ្ពង់ខ្ពស់របស់សម្តេចប្រមុខរាជរដ្ឋាភិបាលនោះឯង៕