Preah Vihear Memorial: សេចក្តីថ្លែងការណ៍ភ្នំពេញនៃគណៈបក្សនយោបាយអាស៊ី ទទួលបានការគាំទ្រ នៅប្រទេសមីយ៉ាន់ម៉ា

Saturday, September 15, 2012

សេចក្តីថ្លែងការណ៍ភ្នំពេញនៃគណៈបក្សនយោបាយអាស៊ី ទទួលបានការគាំទ្រ នៅប្រទេសមីយ៉ាន់ម៉ា

នៅព្រលានយន្តហោះអន្តរជាតិភ្នំពេញ នាថ្ងៃត្រង់ថ្ងៃទី ១៥ ខែកញ្ញា ឆ្នាំ២០១២ ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្រ្តី រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី បានមានប្រសាសន៍ ឱ្យដឹងថាសេចក្តីថ្លែងការណ៍ទីក្រុងភ្នំពេញដែលអនុម័តដោយមហាសន្និបាត លើកទី៦របស់ស្ថាប័នគណបក្សនយោបាយអាស៊ី ICAP កាលពីអំឡុងខែធ្នូ ឆ្នាំ ២០១០កន្លងមកនេះទទួលបានការសាទរពីប្រតិភូគណបក្សនយោបាយអាស៊ី និង គណបក្សកាន់អំណាចនៅមីយ៉ាន់ម៉ា។

ក្នុងសន្និសីទកាសែតពេលធ្វើមាតុភូមិនិវត្តមកពីប្រទេសមីយ៉ាន់ម៉ា ឯកឧត្តមបណ្ឌិតសភាចារ្យ សុខ អាន បានមានប្រសាសន៍ឱ្យដឹងថា ក្នុងដំណើរទស្សនៈកិច្ចទៅកាន់ប្រទេសមីយ៉ាន់ម៉ាក្នុងបេសកកម្មពិសេសជាមួយគណបក្សមកពីប្រទេសចំនួន១១ ផ្សេងទៀតដែលជាសមាជិកអចិន្រ្តៃយ៍របស់ICAP មានជាអាទិ៍៖ ប្រតិភូមកពីប្រទេស ហ្វីលីពីន កូរ៉េ អូស្តា្រលី ចិន ឥណ្ឌូនេស៊ី ជប៉ុន ម៉ាឡេស៊ី ណេប៉ាល់ វៀតណាមជាដើម និងភ្ញៀវសង្កេតការណ៍មកពីមូលនិធិ Hanns Seidel អង្គការសហប្រតិបត្តិការអន្តរជាតិដើម្បីសុវត្ថភាពធម្មជាតិ(International Eco-Safety Cooperative Organazation- IESCO)និងសម្ព័ន្ធ Awame League របស់ប្រទេសបង់ក្លាដេសគណប្រតិភូបានជួបពិភាក្សាការងារជាមួយឯកឧត្តម Thura U shwe Mann ប្រធានរដ្ឋសភាសហភាពមីយ៉ាន់ម៉ា និង ជាអនុប្រធានគណបក្សសាម្គីដើម្បីបង្រួប បង្រួម និងការអភិវឌ្ឍន៍(USDP) ឯកឧត្តម U Htay Oo អគ្គលេខាធិការគណបក្ស USDP ។ ក្រៅពីនេះក៏មានការជួបពិភាក្សាជាមួយ លោកជំទាវ Aung San Suu Kyi ប្រធានគណបក្សសម្ព័ន្ធជាតិដើម្បីលិទ្ធិប្រជាធិបតេយ្យ (NLD) នៅទីក្រុងយ៉ាងហ្គូនផងដែរ ។

នៅក្នុងជំនូបពិភាក្សា ដែលមានផ្លាស់ប្តូរអំពីបទពិសោធន៍របស់ប្រទេសនីមួយៗឯកឧត្តមបណ្ឌិត សុខ អាន បានមានប្រសាសន៍ឱ្យដឹងថា គណៈប្រតិភូគណៈអចិន្ត្រៃយ៍ ICAP បានវាយតំលៃខ្ពស់ចំពោះកំណែទម្រង់ នៅក្នុងប្រទេសមីយ៉ាន់ម៉ា ឆ្ពោះទៅរកលិទ្ធិប្រជាធិបតេយ្យសេរី ពហុបក្ស និង សេរីភាវូបនីយកម្មសេដ្ឋកិច្ច ដើម្បីចូលរួមឱ្យបានពេញលេញនៅក្នុងសហគមន៍អន្តរជាតិ ពិសេសសហគមន៍ អាស៊ាន ។ថ្នាក់ដឹកនាំគណប្រតិភូ ICAP និង គណបក្ស USDP បានបង្ហាញពីឆន្ទៈចង់បានការគាំទ្រ និង ជួយឧបត្តម្ភពីសហគមន៍អន្តរជាតិដើម្បីស្ថេរភាពនយោបាយ និងការអភិវឌ្ឍន៍សម្រាប់ប្រជាជនមីយ៉ាន់ម៉ា ។

ឯកឧត្តម បណ្ឌិត សុខ អាន ក៏បានមានប្រសាសន៍ឱ្យដឹងទៀតថា គណៈអចិន្រ្តៃយ៍ ICAPបានអញ្ជើញគណបក្ស USDP ដែលជាគណបក្សកាន់អំណាចនៅប្រទេសមីយ៉ាន់ម៉ានិងគណបក្ស NLD របស់លោកជំទាវ Aung San Suu Kyi ឱ្យចូលរួមក្នុងគ្រួសារគណបក្សនយោបាយនៅអាស៊ី ហើយទទួលបានការស្វាគមន៍ពីគណបក្សទាំងពីរនេះ ។

ក្រោយពីបញ្ចប់ដំណើរទស្សនៈកិច្ចគណៈប្រតិភូគណៈអចិន្ត្រៃICAP និង គណបក្សUSDP នៃសហភាពមីយ៉ាន់ម៉ា បានចេញសេចក្តីថ្លៃងការណ៍រួមមួយដែលបញ្ជាក់អំពីចំណុចសំខាន់ៗនៃដំណើរការកសាងរដ្ឋប្រជាធិបតេយ្យ និង សន្តិភាព នៅសហភាពមីយ៉ាន់ម៉ាក៏ដូចជាលើកទឹកចិត្តឱ្យសហគមន៍អន្តរជាតិផ្តល់ការគាំទ្រចំបាច់និងកិច្ចសហប្រតិបត្តិការនានាដើម្បីជម្រុញការអភិវឌ្ឍន៍សេដ្ឋកិច្ច និង ស្ថេរភាពនយោបាយស្របតាមបរិបទសាកលភាវូបនីយកម្ម ។

ទាក់ទងសេចក្តីថ្លែងការណ៍នេះដែរឯកឧត្តម បណ្ឌិត សុខ អាន បានមានប្រសាសន៍ឱ្យដឹងថា សេចក្តីថ្លែងការណ៍រួមនេះក៏បានបញ្ជាក់សាជាថ្មី អំពីសារៈសំខាន់នៃសេចក្តីថ្លៃងការណ៍ភ្នំពេញ ដែលអនុម័តដោយមហាសន្និបាតលើកទី៦ របស់ICAP ដែលកម្ពុជាធ្វើជាម្ចាស់ផ្ទះកាលពីអំឡុងខែធ្នូ ឆ្នាំ២០១០កន្លងមកនេះ ដែលបង្ហាញអំពីគោលការណ៍សន្តិសហវិជ្ជមានចំនួន ៥ ចំនុច មានជាអាទិ៍៖ ការគោរពអធិបតេយ្យភាពបូរណភាពទឹកដីនៃប្រទេសនីមួយៗ សិទ្ធិស្វ័យសម្រេចរបស់ប្រទេសនិងប្រជាជន ការមិនឈ្លានពានគ្នា និង ការដោះស្រាយបញ្ហាដោយសន្តិវិធីជាដើម។

សូមបញ្ជាក់ថាដោយមានការគាំទ្រពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជណាចក្រ កម្ពុជា នៅថ្ងៃទី១១ ខែកញ្ញា ឆ្នាំ២០១២ គណៈប្រតិភូគណបក្សប្រជាជនកម្ពុជា ដឹកនាំដោយឯកឧត្តម បណ្ឌិតសភាចារ្យ សុខ អាន ឧបនាយករដ្ឋមន្រ្តី រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី សមាជិកអចិន្រ្តៃយ៍នៃគណបក្សប្រជាជនកម្ពុជា និងជាសមាជិកអចិន្រ្តៃយ៍នៃសន្និសីទអន្តរជាតិ នៃគណបក្សនយោបាយនៅអាស៊ី ICAP បានអញ្ជើញទៅចូលរួមក្នុងបេសកកម្មពិសេសរបស់ICAP នៅសាធារណៈរដ្ឋ សហភាពមីយ៉ាន់ម៉ាចំនួន៣ថ្ងៃ៕