ស្ទឹងត្រែង ៖ ប្រជាពលរដ្ឋនៅសង្កាត់សាមគ្គីជាង៨០០រយគ្រួសារទទួលបានសលាកបត្របញ្ជាក់កាន់កាប់ដីធ្លី ដោយស្របច្បាប់ ហើយពួកគាត់នាំគ្នានិយាយថា យើងទាំងអស់គ្នាមានសំណាងល្អ ដោយទទួលបានលិខិតកាន់កាប់ដី ដោយមិនបាច់ចំណាយលុយទៅទិញដីទេ ព្រោះមានសម្តេចអគ្គមហាសេនាបតីតេជោ ហ៊ុន សែនជាប្រមុខរាជរដ្ឋាភិបាល គិតគូរពីសុខទុកដល់បងប្អូនប្រជាពលរដ្ឋ ដល់ទីជនបទ។
លោកស្រី តែ ស៊ីឡែន អាយុ៤៨ឆ្នាំរស់នៅភូមិខាំ ផាន់ សង្កាត់សាមគ្គី ក្រុងស្ទឹងត្រែងបាននិយាយថាកន្លងមករូបគាត់ក៏ដូចក្រុមគ្រួសារផ្សេងទៀត រស់នៅភ័យព្រួយ ហើយពុំសូវហ៊ានដាំដំណាំអ្វី ជាយុទ្ធសាស្ត្រនោះទេ ដោយខ្លាចរដ្ឋឬក៏ក្រុមហ៊ុន ដកហូតយក តែបច្ចុប្បន្ន បានសម្តេច ហ៊ុន សែន និងលោកជំទាវ បានគិតគូរសព្វបែបយ៉ាង ឲ្យប្រជាពលរដ្ឋតាំងពីលំនៅដ្ឋាន ដីកសិកម្ម សំរាប់ប្រកបរបរចិញ្ចឹមជីវិត មានសុភមង្គលរស់នៅ បានសុខស្រួលទាំងផ្លូវចិត្តនិងផ្លូវសេដ្ឋកិច្ច។
លោកសេង សុផាត មន្ត្រីជំនាញផ្នែកសុរិយោដីក្រុងបានបញ្ជាក់ថា ទោះជាជួបការលំបាក ជាអន្លើៗយ៉ាងណាក្តី ក៏ក្រុមយុវជណស្ម័គ្រចិត្តនិងមន្ត្រីជំនាញ រួមទាំងអាជ្ញាធរក្រុង ភូមិឃុំ សង្កាត់សំរេចវាស់វែងដីធ្លីជូន ប្រជាពលរដ្ឋ នៅសង្កាត់សាមគ្គី ក្រុងស្ទឹងត្រែង គិតមកដល់ពាក់កណ្តាល ខែកញ្ញានេះ បាន៨១៣គ្រួសារ រៀបចំបំពេញសាលាកបត្របាន ៨៤៣ សាលាប័ត្រវាស់វែងក្បាលដី លំនៅដ្ឋានបាន៤១២ក្បាលដី ដីកសិកម្មបាន៥៤៣ក្បាលដី គិតសរុបជាហិកតាបានជាង១០២៣ហិចតា និងកំណត់ចំណុចវាស់វែងបាន២៤២៦ចំណុច៕