ខេត្តពោធិសាត់ ៖ លោកឧត្តមសេនីយ៍ឯក យុន ឈុន្នី អគ្គស្នងការរងនគរបាលជាតិ បានអញ្ចើញជាអធិបតីក្នុងកិច្ចប្រជុំត្រួតពិនិត្យកាផ្តល់ អត្តសញ្ញាណប័ណ្ណសញ្ជាតិខ្មែរ និងជម្រុញការអនុវត្តន៍ច្បាប់ចរាចរណ៍ផ្លូវគោក ដែលប្រព្រឹត្តទៅស្នងការដ្ឋាននគរបាលខេត្តពោធិសាត់ នាថ្ងៃទី១៤ ខែកញ្ញា ឆ្នាំ២០១២ ដែលពីធីប្រជុំនេះ មានការចូលរួមពីប្រតិភូអមដំណើរ និងលោកស្នងការ ស្នងការរង ព្រមទាំងថ្នាក់ដឹកនាំនគរបាលខេត្តជាច្រើនរូប។
លោកឧត្តមសេនីយ៍ត្រី សារុន ចាន់ធី ស្នងការនគរបាលខេត្ត ក្នុងពិធីនោះបានឲ្យដឹងថាការផ្តល់អត្តសញ្ញណប័ណ្ណ ជំហ៊ានដំបូង ចាប់ពីថ្ងៃទី៤ ខែកក្កដា រហូតមកដល់ពេលនេះ ហើយប្រជាពលរដ្ឋដែលត្រូវផ្តល់ជូនមាន៦០.១៧៥នាក់ បំពេញបែបបទផ្តល់អត្តសញ្ញាណប័ណ្ណរួចបាន២១.២៣៣នាក់ ទទួលសន្លឹកអត្តសញ្ញាណប័ណ្ណ ពីក្រសួងបញ្ជូនមកវិញបាន៧៨៨២នាក់ នៅសល់៣៨៩៤២នាក់ទៀត ជំនាញកំពុងដំណើរការធ្វើជូនបន្ត ។ លោកស្នងការបានបន្តទៀតថា ចំពោះករណីគ្រោះថ្នាក់ចរាចរណ៍ មានការកើនឡើង នេះបណ្តាលមក ពីកត្តាជាច្រើនដូចជា អ្នកបើកបរប្រើប្រាស់ល្បឿនលឿន មិនប្រកាន់ស្តាំ ខ្វះការប្រុងប្រយ័ត្ន បើកជែងគ្នា បើកបរក្នុងស្ថានភាពស្រវឺង មិនគោរពសិទ្ធអាទិភាព និងបើកបរក្នុងភាពងងុយដេក ទើបធ្វើឲ្យមនុស្សស្លាប់៦៦៥៧នាក់ ស្រី៧នាក់ របួសធ្ងន់ ស្រាល៣៣៥២៧៣នាក់ ស្រី ៨០នាក់ និងខូចខាតមធ្យោបាយធ្វើដំណើរមួយចំនួនធំ ។
លោកឧត្តមសេនីយ៍ឯក យុន ឈុន្នី បានធ្វើការវាយតម្លៃខ្ពស់ ចំពោះការយកចិត្តទុកដាក់បំពេញការងារ របស់កងកម្លាំងនគរបាល ចាប់ពីខេត្តរហូតដល់មូលដ្ឋានដែលបានខិតខំប្រឹងប្រែង ពុះពារ ជំនះរាល់ការលំបាកទាំងឡាយ ទើបអាចសម្រេចបានរាល់ការងារខាងលើនេះ។ លោកមានប្រសាសន៍បន្តទៀតថា ក្នុងនាម លោកតំណាងឲ្យលោកនាយឧត្តមសេនីយ៍ អគ្គស្នងការនគរបាលជាតិ បានពាំនាំការសាកសួរសុខទុក្ខផ្តាំផ្ញើរពីសំណាក់លោក ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោកនាយឧត្តមសេនីយ៍ អគ្គស្នងការនគរបាលជាតិជូនមន្ត្រីនគរបាលគ្រប់រូប ក្នុងនោះដែរ លោកឧត្តមសេនីយ៍ឯក យុន ឈុន្នី អគ្គស្នងការរង នគរបាលជាតិ ក៍បាននាំយកមកនូវថវិកាចំនួន២លានរៀល និងម៉ាស៊ីនវាស់ ជាតិអាកុលចំនួន១គ្រឿង ផ្តល់ជូនស្នងការដ្ឋាននគរបាលខេត្តពោធិសាត់ សម្រាប់ប្រើប្រាស់ក្នុងការងារផ្តល់អត្តសញ្ញាណប័ណ្ណសញ្ជាតិខ្មែរ ជូនប្រជាពលរដ្ឋ និងការងារត្រួតពិនិត្យ ជម្រុញអនុវត្តច្បាប់ចរាចណ៍ថែមទៀតផងដែរ៕
