ភ្នំពេញ ៖ ក្រសួងសុខាភិបាលបានបន្ថែមអនុរដ្ឋលេខាធិការចំនួន០២រូបនិងទីប្រឹក្សាអមក្រសួងសុខាភិបាល០៣រូបទៀតដើម្បីបំរើការងារក្នុងក្រសួងឲ្យកាន់តែរីកចម្រើនថែមទៀត។
ពិធីប្រកាសតែងតាំងនេះបានប្រព្រឹត្តទៅកាលពីថ្ងៃទី១៤ខែកញ្ញាឆ្នាំ២០១២នៅទីស្តីការក្រសួងក្រោមអធិបតីភាពលោកវេជ្ជបណ្ឌិតម៉មប៊ុនហេងរដ្ឋមន្ត្រីក្រសួងសុខាភិបាល។
សមាសភាពដែលត្រូវទទួលមុខតំណែងនេះរួមមានលោកសាស្ត្រាចារ្យឈួអ៊ីម៉េងប្រធានមន្ទីរពេទ្យកុមារជាតិត្រូវដំឡើងជាអនុរដ្ឋលេខាធិការ លោកស្រីអ៊ុំសាម៉ុលបំរើការងារនៅមន្ទីរពេទ្យគន្ធបុប្ផាជាអនុរដ្ឋលេខាធិការ លោកសាស្ត្រាចារ្យយក់សូផាន់ណាអតីតសកលវិទ្យាធិការសាកលវិទ្យាល័យវិទ្យាសាស្ត្រសុខាភិបាលជាទីប្រឹក្សាអមក្រសួងលោកសាស្ត្រាចារ្យសាន់ចាន់សឿនអគ្គនាយករងបច្ចេកទេសក្រសួងសុខាភិបាលនិងជប្រធានកម្មវិធីជាតិផ្តល់ថ្នាំបង្ការជាទីប្រឹក្សានិងលោកវេជ្ជបណ្ឌិតសាយសេងលីអតីតនាយកមន្ទីរពេទ្យខ្មែរមិត្តភាព សូវៀតជាទីប្រឹក្សា។
ការប្រកាសតែងតាំងមន្ត្រីជាន់ខ្ពស់នេះបានធ្វើឲ្យក្រសួងសុខាភិបាលបង្កើនអនុរដ្ឋលេខាធិការដល់១២រូបនិងទីប្រឹក្សាអមក្រសួងជិត២០រូប។
លោកសាស្ត្រាចារ្យឈួអ៊ីម៉េងតំណាងឲ្យមន្ត្រីទើបតែងតាំងថ្មីបានឡើងប្តេជ្ញាចិត្តថាដើម្បីឆ្លើយតបទៅនឹងទំនុកចិត្តរបស់ថ្នាក់ដឹកនាំដ៏ខ្ពង់ខ្ពស់នៃក្រសូងសុខាភិបាលនិងរាជរដ្ឋាភិបាលយើងខ្ញុំសូមធ្វើការប្តេជ្ញាចិត្តខិតខំធ្វើការដើម្បីចូលរួមចំណែកជំរុញការអភិវឌ្ឍប្រទេសជាតិចូលរួមចំណែកកាត់បន្ថយភាពក្រីក្ររបស់ប្រជាជនកម្ពុជានិងចូលរួមចំណែកជំរុញការអនុវត្តគោលនយោបាយសុខាភិបាលឲ្យមានប្រសិទ្ធភាពខ្ពស់ដើម្បីសំរេចបានគោលដៅសហស្សវត្សនិងរួមចំណែកអនុវត្តយុទ្ធសាស្ត្រចតុកោណរបស់រាជរដ្ឋាភិបាលឲ្យបានជោគជ័យត្រចះត្រចង់។
នៅក្នុងឱកាសនោះដែរលោកវេជ្ជបណ្ឌិតម៉ម ប៊ុនហេង បានមានប្រសាសន៍ថាការតែងតាំងមន្ត្រីជន់ខ្ពស់នាពេលនេះគឺជាការយកចិត្តទុកដាក់ខ្ពស់របស់សម្តេចតេជោហ៊ុនសែនជាប្រមុខរាជរដ្ឋាភិបាលដ៏ឆ្លាតវ័យចំពោះមន្ត្រីដែលមានស្នាដៃនិងចូលនិវត្តន៍ដើម្បីបានបន្តការងារចូលរួមចំណែកកសាងប្រទេសជាតិពិសេសក្នុងវិស័យសុខាភិបាល។លោករដ្ឋមន្ត្រីបានបន្តថាដូច្នេះសូមកុំធ្វើឲ្យថ្នាក់ដឹកនាំយើងអស់សង្ឈឹមត្រូវខិតខំធ្វើការដើម្បីបំរើដល់សុខភាពប្រជាពលរដ្ឋយើង៕