ភ្នំពេញ: លោក អៀង សុផល្លែត ជំនួយការផ្ទាល់សម្តេចនាយករដ្ឋមន្ត្រី ហ៊ុន សែន បាននាំពាក្យនៃកិច្ចប្រជុំរវាងសម្តេចនាយករដ្ឋមន្ត្រី ហ៊ុន សែន និងលោកស្រីនាយករដ្ឋមន្ត្រីថៃ យ៉ីងឡាក់ ស៊ីនណាវ៉ាត់ ប្រាប់ក្រុមអ្នកកាសែតថា លោកស្រី យ៉ីងឡាក់ បានមកទស្សនកិច្ចនៅកម្ពុជា ហើយបានអញ្ជើញទៅចូលរួមគោរពព្រះវិញ្ញាណក្ខន្ធព្រះករុណា ព្រះមហាវីរក្សត្រ ហើយក៏បានចូលសវនាការជាមួយសម្តេចអគ្គមហាសេនាបតីតេជោ នាយករដ្ឋមន្ត្រី ហ៊ុន សែន នារសៀលថ្ងៃទី១៩ ខែតុលា ឆ្នាំ២០១២។ កិច្ចប្រជុំនោះ ធ្វើឡើងនៅវិមានសន្តិភាព នារសៀលម៉ោង ៤ ថ្ងៃនេះ។
លោក អៀង សុផល្លែត បានបន្ថែមថា ក្នុងឱកាសជួបសវនាការជាមួយសម្តេច ហ៊ុន សែន លោកជំទាវក៏បានជម្រាបជូនសម្តេចតេជោ នូវសារលិខិតរំលែកទុក្ខរបស់រាជរដ្ឋាភិបាលថៃ ហើយក៏គោរពជម្រាបជូនសម្តេចអគ្គមហាសេនាបតីតេជោ នាយករដ្ឋមន្ត្រី នូវការសោកស្តាយយ៉ាងសង្វេគនូវការបាត់បង់របស់ព្រះបិតាជាតិរបស់កម្ពុជា។
ជាការឆ្លើយតប សម្តេចនាយករដ្ឋមន្ត្រី ហ៊ុន សែន បានថ្លែងអំណរគុណ ជូនចំពោះលោកជំទាវ យ៉ីងឡាក់ ស៊ីនណាវ៉ាត្រា ដែលបានដឹកនាំប្រតិភូ តំណាងឲ្យរាជរដ្ឋាភិបាលថៃ និងប្រជាជនថៃ មកគោរពវិញ្ញាណក្ខន្ធព្រះបរមសព ព្រះករុណា ព្រះមហាវីរក្សត្រកម្ពុជា ហើយក៏សូមថ្លែងអំណរគុណ ចំពោះការសម្តែងនូវការសោកស្តាយសង្វេគ និងក៏បានថ្លែងអំណរគុណផងដែរ ចំពោះលោកជំទាវ ស៊ីនណាវ៉ាត្រា ដែលបានទូរស័ព្ទជូនសម្តេចនាយករដ្ឋមន្ត្រីតេជោ ហ៊ុន សែន បំភ្លឺចំពោះអ្នកព័ត៌មាន ប៉ុស្តិ៍លេខ ៣ របស់ថៃ ផងដែរ៕