នៅក្នុងពិធីសំណេះសំណាល និងប្រគល់ប័ណ្ណសរសើរ កាលពីថ្ងៃទី ១៩ ខែតុលា ឯកឧត្តម ងី តាយី រដ្ឋលេខាធិការ ក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាជាតិគណនេយ្យបានកោតសរសើរនិស្សិតឆ្នើមកម្ពុជា ដែល បានប្រឡងជាប់សម្រាប់ឆមាសទី ១ ឆ្នាំ ២០១២ របស់វិទ្យាស្ថាន ខេមអេដ ដោយមានប្រសាសន៍ថា ជោគជ័យរបស់ ជ័យលាភីក្នុងការសិក្សា ថ្នាក់គណនេយ្យករជំនាញ និងអ្នកបច្ចេកទេសគណនេយ្យ គឺជាជោគជ័យរបស់វិជ្ជាជីវៈគណនេយ្យ និងសវនកម្ម ជាជោកជ័យ របស់ក្រុមគ្រួសារ និងរបស់សង្គមជាតិទាំងមូលផងដែរ។
ឯកឧត្តម ងី តាយី មានប្រសាសន៍ថា ធនធានមនុស្ស ដែលយើងបានទទួលថ្មីនេះ គឺជាធនធាន ដែលមានសារសំខាន់សម្រាប់សេដ្ឋកិច្ចកម្ពុជានិយាយជារួម និងនិយាយដោយ ឡែកគឺ ជាធាតុចូលដ៏ចាំ បាច់សម្រាប់ជួយពង្រឹងវិស័យគណនេយ្យ ហិរញ្ញវត្ថុ និងសវនកម្ម តាមរយៈ តម្លាភាព គណនេយ្យភាព និងភាពត្រឹមត្រូវនៃរបាយការណ៏ហិរញ្ញវត្ថុ។
ឯកឧត្តមរដ្ឋលេខាធិការ ថ្លែងថា ដោយឡែកទីផ្សារមូលបត្រ ត្រូវបានបើកឲ្យដំណើរការដោយជោគជ័យតាម គោលនយោបាយ របស់រាជរដ្ឋាភិបាល ក៏ត្រូវការចាំ បាច់បំផុតនូវធនធានមនុស្ស ដែលមានចំណេះ ដឹងផ្នែកគណនេយ្យ និងហិរញ្ញវត្ថុដើម្បីគាំទ្រដល់វិស័យ នេះក៏ដូចជាការចូលរួម ដើម្បីកំណើនខឿនសេដ្ឋកិច្ចកម្ពុជាឲ្យកាន់តែរឹងមាំថែមទៀត។
លោក ខេស៊ី បាណេត នាយកវិទ្យាស្ថានខេមអេដ ឲ្យដឹងថា ចាប់តាំងពីឆ្នាំ ២០០៣ មកវិទ្យា ស្ថានខេមអេដ សហការជាមួយក្រសួងសេដ្ឋកិច្ច និងហិរញ្ញវត្ថុបានបណ្តុះបណ្តាលនិស្សិត (ACCA)បាន ១៤ ជំនាន់ និង(CAT)ចំនួន ៤ ជំនាន់រួចមកហើយ។ ក្នុងរយៈពេលនេះ វិទ្យាស្ថានខេមអេដបានខិតខំយ៉ាងខ្លាំង ដើម្បីបង្កើតកាលានុវត្តភាពដល់សធារណជនទូទៅដែល សិក្សានៅវិទ្យាស្ថាននេះ ដោយយកគុណភាពជាចម្បង ជាពិសេសចំពោះគុណភាពគ្រូបង្រៀន និង កម្មវិធីសិក្សា ដើម្បីឲ្យស្របទៅនឹងមាត្រដ្ឋានអន្តរជាតិ។លោកនាយកវិទ្យាស្ថានថ្លែងថាជាលទ្ធផល វិទ្យាស្ថានខេមអេដ ត្រូវបានទទួលស្គាល់ពីសាធារណជនទាំងក្នុង និងក្រៅប្រទេស តួយ៉ាងដូចជា សមាគមគណនេយ្យករជំនាញ ACCA របស់ចក្រភពអង់គ្លេសជាដើម។
យោងតាមសេចក្តីប្រកាសព័ត៌មានរបស់វិទ្យាស្ថានខេមអេដឲ្យដឹងថា និស្សិតដែលរៀននៅ វិទ្យាស្ថានខេមអេដ តែងតែទទួលបានចំណាត់ថ្នាក់ល្អបើប្រៀបធៀបទៅនឹងប្រទេសផ្សេងៗ នៅលើសកលលោក ហើយគិតមកដល់បច្ចុប្បន្ននេះ វិទ្យាស្ថានខេមអេដមាននិស្សិតចំនួន ១៤ នាក់ហើយដែល ទទួលបានចំណាត់ថ្នាក់លេខ ២ នៅលើពិភពលោកនោះ។
នៅក្នុងពិធីនោះ ឯកឧត្តម ងី តាយី បានសំណូមពរដល់វិទ្យាស្ថានខេមអេដឲ្យបន្តយកចិត្តទុក ដាក់បន្ថែមទៀតដល់ការបណ្តុះបណ្តាលអាជីពនេះ ឲ្យកាន់តែបានលទ្ធផលល្អប្រសើរជាងមុនសំដៅ បំពេញឲ្យបាននូវផែនការរបស់ក្រសួងសេដ្ឋកិច្ច និងហិរញ្ញវត្ថុនោះ៕ ដោយលោក ជ័យ ភូមិពល