ភ្នំពេញ: សន្និសីទថ្នាក់តំបន់លើកទី២ ស្តីពី “ការចូលរួមរបស់ស្ត្រីក្នុងវិស័យនយោបាយ” មានគោលបំណង ដើម្បីប្រមូលផ្តុំអ្នកដឹកនាំ អ្នកស្វែងរកការគាំទ្រលើយេនឌ័រ អ្នកពាក់ព័ន្ធ និងដៃគូកម្មវិធីថ្នាក់តំបន់ផ្សេងៗគ្នា របស់អង្គការសន្តិភាព និងអភិវឌ្ឍន៍ ដើម្បីលើកកំពស់សមភាពយេនឌ័រ ក្នុងការចូលរួមលើវិស័យនយោបាយ។ នេះបើតាមសេចក្តីប្រកាសព័ត៌មាន។
សេចក្តីប្រកាសលើកឡើងថា កម្មវិធីថ្នាក់តំបន់នេះ បាន និងកំពុងអនុវត្តនៅក្នុង ៥ប្រទេស (បង់ក្លាដេស កម្ពុជា ទីម័រខាងកើត ហ្វីលីពីន និងវៀតណាម) ដើម្បីចែករំលេកបទពិសោធន៍រវាងប្រទេសក្នុងតំបន់គោលដៅទាំង ៥ ដោយផ្តោតជាពិសេសលើការអនុវត្តល្អ ដើម្បីចូលរួមគ្នា សម្រាប់អភិវឌ្ឍន៍ក្នុងតំបន់។
សន្និសីទថ្នាក់តំបន់លើកទី២នេះ នឹងធ្វើឡើងនៅសណ្ឋាគារអប្សរាអង្គរ តាមបណ្តោយផ្លូវជាតិលេខ៦ (ផ្លូវព្រលានយន្តហោះ) ខេត្តសៀមរាប ព្រះរាជាណាចក្រកម្ពុជា នៅថ្ងៃអង្គារ ទី២៣ ខែតុលា ឆ្នាំ២០១២ វេលាម៉ោង ៨ និង ៣០ នាទីព្រឹក ដល់ម៉ោង ១១ និង ៤៥ នាទីព្រឹក ក្រោមអធិបតីភាពលោកស្រីវេជ្ជបណ្ឌិត អ៊ឹង កន្ថាផាវី រដ្ឋមន្ត្រីក្រសួងកិច្ចការនារី អ្នកតំណាងរដ្ឋាភិបាល គ្រឹះស្ថានអប់រំ និងអង្គការមិនមែនរដ្ឋាភិបាល មកពី ៥ ប្រទេស (បង់ក្លាដេស កម្ពុជា ទីម័រខាងកើត ហ្វីលីពីន និងវៀតណាម) អង្គការអភិវឌ្ឍន៍អន្តរជាតិ (ទីភ្នាក់ងារអេស្ប៉ាញ ដើម្បីកិច្ចសហប្រតិបត្តិការ អភិវឌ្ឍន៍អន្តរជាតិ (AECID) និង UN Women ជាដើម)៕