ឯកឧត្តមបណ្ឌិតសភាចារ្យ សុខ អាន
ឧបនាយករដ្ឋមន្រ្តី រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី
នាព្រឹកថ្ងៃទី១០ ខែឧសភា ឆ្នាំ២០១២
បានអញ្ជើញជាអធិបតីក្នុងពិធីប្រគល់សញ្ញាបត្រ ជូនដល់និស្សិតសរុប
១៣៣៧នាក់ នារី ៤៦៥ នាក់
ដែលបានបញ្ចប់ការសិក្សានៅសាកលវិទ្យាល័យបៀលប្រាយ សាខាខេត្តតាកែវ។
ឯកឧត្តមបណ្ឌិតសភាចារ្យ សុខ អាន
បានសម្តែងការកោតសរសើរចំពោះលទ្ធផលនៃការសិក្សារបស់ក្មួយៗនិស្សិត
ទាំង ១៣៣៧រូប ដែលទទួលបានសញ្ញាបត្រ។ ឯកឧត្តមបណ្ឌិតសភាចារ្យ សុខ អាន មាន
ប្រសាសន៍ថា
លទ្ធផលនេះមិនមែនត្រឹមតែជាជោគជ័យរបស់ក្មួយៗផ្ទាល់ប៉ុណ្ណោះទេ
ប៉ុន្តែក៏ជាការសបញ្ជាក់ឲ្យឃើញយ៉ាងច្បាស់អំពីជោគជ័យក្នុងវិស័យ
អប់រំជាតិទាំងមូលផងដែរ ព្រោះថា
ជោគជ័យរបស់ក្មួយៗពិតជាបានរួមចំណែកដល់ការបង្កើននូវបរិមាណ
និងគុណភាពធនធានមនុស្ស។ ខ្ញុំមានជំនឿថា
ក្មួយៗជ័យលាភីទាំងអស់គឺជាបញ្ញាជនប្រកបដោយជំនាញ ចំណេះដឹង
និងចំណេះធ្វើ ព្រមទាំងមានការទទួលខុសត្រូវ សីលធម៌ល្អប្រពៃ
និងវិចារណញ្ញាណស្នេហាជាតិដ៏ពិតប្រាកដ
ដែលជាកម្លាំងស្នូលសម្រាប់បុព្វហេតុអភិវឌ្ឍន៍សង្គមជាតិយើង។
ឯកឧត្តមបណ្ឌិតបានបន្តទៀតថា ចាប់តាំងពីក្រោយថ្ងៃរំដោះ ៧ មករា ១៩៧៩
រហូតមកដល់បច្ចុប្បន្ននេះ ហេដ្ឋារចនាសម្ព័ន្ធ
សេដ្ឋកិច្ចនិងសង្គមកិច្ច
ដែលទទួលរងនូវការបំផ្លិចបំផ្លាញស្ទើរតែទាំងស្រុង
ក្នុងរបបប្រល័យពូជសាសន៍ ប៉ុល ពត ត្រូវបានស្តារ កសាង និងអភិវឌ្ឍ
ឲ្យមានការរីកចម្រើនជាលំដាប់។ ចំពោះវិស័យអប់រំ
រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ជានិច្ច
កាលតែងយកចិត្តទុកដាក់ខ្ពស់ ទាំងផ្នែកបរិមាណ
និងការកែលម្អគុណភាពអប់រំ ដើម្បីផ្តល់ឲ្យសិស្ស និស្សិត នូវចំណេះដឹង
និងកាលានុវត្តភាពក្នុងការទទួលបានមុខជំនាញផ្សេងៗ
សម្រាប់អនាគតដ៏ប្រសើររបស់សិស្ស
និស្សិតខ្លួនឯងផងនិងរបស់ប្រទេសជាតិផង។
រាជរដ្ឋាភិបាលខិតខំបង្កលក្ខណៈសម្បត្តិ
និងបង្កើនលទ្ធភាពឲ្យប្រជាពលរដ្ឋទទួលបាននូវការអប់រំ
និងការបណ្តុះបណ្តាលប្រកបដោយសមធម៌ ទៅតាមទិសដៅ ការអប់រំទាំងអស់គ្នា
(Education for All ) ជាពិសេស
មានឱកាសទទួលបាននូវការអប់រំជាមូលដ្ឋានរយៈពេល៩ឆ្នាំ
ដែលជាកត្តាដ៏មានសារៈសំខាន់មួយ
ជួយលើកស្ទួយដល់គ្រួសារក្រីក្រឲ្យឆ្លងផុតពីគំនាបនៃភាពក្រីក្រ
និងរស់នៅប្រកបដោយសុខុមាលភាពនៅក្នុងសង្គម។ លើសពីនេះ
ការចាត់ទុកវិស័យអប់រំជាវិស័យអាទិភាពមួយយ៉ាងសំខាន់
នៅក្នុងយុទ្ធសាស្រ្តចតុកោណដំណាក់កាលទី២ ក៏ដូចជា
នៅក្នុងផែនការយុទ្ធសាស្រ្តអភិវឌ្ឍន៍ជាតិបច្ចុប្បន្នកម្ម ២០០៩-២០១៣
គឺជាសក្ខីភាពបង្ហាញឲ្យឃើញយ៉ាងប្រត្យក្សអំពីការយកចិត្តទុកដាក់
របស់រាជរដ្ឋាភិបាល។
ឯកឧត្តមបណ្ឌិតសភាចារ្យ សុខ អាន
បានមានប្រសាសន៍អំពាវនាវថា
ក្នុងនាមជាប្រធានគណៈកម្មាធិការទទួលស្គាល់គុណភាពអប់រំនៃកម្ពុជា
និងគណៈកម្មាធិការជាតិបណ្តុះបណ្តាល
ឯកឧត្តមសូមអំពាវនាវដល់គ្រប់សាកលវិទ្យាល័យ
និងគ្រឹះស្ថានអប់រំបណ្តុះបណ្តាលវិជ្ជាជីវៈទាំងអស់
ត្រូវគិតគូរឲ្យបានខ្លាំងក្លាដល់ការបន្តជំរុញសកម្មភាពបណ្តុះបណ្តាល
របស់ខ្លួន
ឲ្យមានលក្ខណៈកាន់តែឆ្លើយតបទៅនឹងតម្រូវការជាក់ស្តែងនៅលើទីផ្សារ
ពលកម្ម ជាពិសេស ជំរុញសកម្មភាពស្រាវជ្រាវឲ្យបានស៊ីជំរៅ
ដោយតម្រូវឱ្យសិស្ស
និស្សិតគ្រប់រូបចំណាយពេលវេលាអោយបានកាន់តែច្រើនសម្រាប់រៀនសូត្រ
ហើយត្រូវយកគុណភាពជាអាទិភាព គោរពតាមគោលការណ៍អប់រំ
និងលិខិតបទដ្ឋានគតិយុត្តិនានា ដូចជា ច្បាប់ស្តីការអប់រំ
ក្របខ័ណ្ឌគុណវុឌ្ឍិជាតិ ស្តង់ដាគុណភាពអប្បបរមា ស្តង់ដាជាតិសមត្ថភាព
និងស្តង់ដាជាតិមុខរបរ ។ល។
ឯកឧត្តមលើកឡើងផងដែរថា
ការសិក្សារបស់និស្សិតត្រូវតែផ្សារភ្ជាប់ទៅនឹងការអនុវត្តជាក់
ស្តែង រួមផ្សំនឹងសិល្បៈ និងកីឡាផងដែរ។ ឯកឧត្តមបណ្ឌិត សុខ អាន
បានណែនាំថា
គ្រប់គ្រឹះស្ថានឧត្តមសិក្សាទាំងអស់ត្រូវយកចិត្តទុកដាក់ដល់
ការបង្កើតឲ្យមានការចុះសិក្សាអនុវត្តតាមរោងចក្រ សហគ្រាស កសិដ្ឋាន
ស្រែចំការ រមណីយដ្ឋាន អាហារដ្ឋាន ធនាគារ សណ្ឋាគារ និងមជ្ឈមណ្ឌលវប្បធម៌
ហើយត្រូវបង្កើតឲ្យមានជាការសម្តែងសិល្បៈ
ឬការប្រកួតកីឡាដើម្បីធ្វើឲ្យនិសិ្សតយល់ដឹង
និងមានស្មារតីរីករាយក្នុងការសិក្សា
ហើយការអប់រំបណ្តុះបណ្តាលមិនត្រឹមតែសំដៅទៅលើចំណេះដឹង
និងសមត្ថភាពជំនាញបច្ចេកទេសប៉ុណ្ណោះទេ
ប៉ុន្តែចាំបាច់ត្រូវតែផ្សារភ្ជាប់ទៅនឹងសីលធម៌ គុណធម៌
ការបញ្ជ្រាបនូវវប្បធម៌ និងអរិយធម៌
សំដៅថែរក្សាឲ្យបាននូវអត្តសញ្ញាណជាតិផងដែរ។
វិស័យអប់រំនិងបណ្តុះបណ្តាលវិជ្ជាជីវៈនៅកម្ពុជា
គឺពិតជាត្រូវការចាំបាច់ណាស់នូវកិច្ចសហប្រតិបត្តិការ
និងការជួយឧបត្ថម្ភគាំទ្រពីសហគមន៍ជាតិនិងអន្តរជាតិ ជាពិសេស
វិស័យឯកជន និងដៃគូអភិវឌ្ឍន៍ទំាងអស់។
លោក ឌៀប សីហា សាកលវិទ្យាធិការនៃ
សាកលវិទ្យាល័យបៀលប្រាយ បានឲ្យដឹងថា គិតចាប់ពីឆ្នាំសិក្សា២០០៥-២០០៦
រហូតមកទល់បច្ចុប្បន្នមាននិស្សិតចុះឈ្មោះចូលរៀនសរុប ៣៣៨៨នាក់
នារី១៣២២នាក់ ដែលក្នុងនោះនិស្សិតអាហាររូបកណ៍សរុបចំនួន ៦៦៥នាក់
និងមានសាស្រ្តាចារ្យចំនួន៨៧នាក់
ដែលបានបណ្តុះបណ្តាលទៅលើមហាវិទ្យាល័យប្រាំដែលរួមមានៈ
មហាវិទ្យាល័យគ្រប់គ្រងធុរកិច្ច, មហាវិទ្យាល័យសេដ្ឋកិច្ច,
មហាវិទ្យាល័យនីតិសាស្រ្តនិងវិទ្យាសាស្រ្តសង្គម,
មហាវិទ្យាល័យវិទ្យាសាស្រ្តអប់រំនិងភាសា
និងមហាវិទ្យាល័យវិទ្យាសាស្រ្តនិងបចេ្ចកវិទ្យា។
តាមការស្ទង់មតិបានបង្ហាញថានិស្សិតដែលបានបញ្ចប់ការសិក្សាតាម
សិ្ថតិខាងលើទទួលបានការងារធ្វើ ៨៥%-៨៨%
ក្នុងនោះប្រាក់ខែគិតជាមធ្យម ២៣០ដុល្លារក្នុង១ខែ
ចំណែកនិស្សិតកំពុងសិក្សាបច្ចុប្បន្នទទួលបានការងារធ្វើ៦០%៦៤.៣%
ប្រាក់ខែគិតជាមធ្យម ១៥០ដុល្លារក្នុង១ខែ៕