សុន្ទរកថា
ឯកឧត្តម សុខ អាន ឧបនាយករដ្ឋមន្ត្រី
រដ្ឋមន្ត្រីទទួលបន្ទុកទីស្តីការគណៈរដ្ឋមន្រ្តីក្នុងពិធីប្រគល់សញ្ញា
បត្រ ដល់និស្សិតបរិញ្ញាបត្រជំនាន់ទី១ ទី២ ទី៣ និងទី៤
និងនិស្សិតបរិញ្ញាបត្ររង ជំនាន់ទី១ ទី២ ទី៣ ទី៤
និងទី៥ នៃសាកលវិទ្យាល័យបៀលប្រាយ សាខាខេត្តតាកែវ
ខេត្តតាកែវថ្ងៃទី ១០ ខែឧសភា ឆ្នាំ២០១២
- ឯកឧត្តម លោកជំទាវ អស់លោក លោកស្រី
- គណៈគ្រប់គ្រង សាស្រ្តាចារ្យ បុគ្គលិក និងក្មួយៗនិស្សិតនៃសាកលវិទ្យាល័យបៀលប្រាយទាំងអស់ជាទីមេត្រី
ថ្ងៃនេះ ខ្ញុំមានក្តីសោមនស្សរីករាយចូលរួមជាមួយឯកឧត្តម លោកជំទាវ
អស់លោក លោកស្រី គណៈគ្រប់គ្រង សាស្រ្តាចារ្យ បុគ្គលិក
និងក្មួយៗនិស្សិតទាំងអស់នៃសាកលវិទ្យាល័យបៀលប្រាយ
ក្នុងពិធីប្រគល់សញ្ញាបត្រកម្រិតបរិញ្ញាបត្រ និងបរិញ្ញាបត្ររង
ដល់និស្សិតចំនួន ១៣៣៧រូប ដែលបានបញ្ចប់ការសិក្សាប្រកបដោយជោគជ័យ
នាពេលនេះ។ ឆ្លៀតឱកាសនេះ ខ្ញុំសូមកោតសរសើរ
និងវាយតម្លៃខ្ពស់ចំពោះថ្នាក់ដឹកនាំ សាស្រ្តាចារ្យ
និងបុគ្គលិកនៃសាកលវិទ្យាល័យបៀលប្រាយសាខាខេត្តតាកែវទាំងអស់
ដែលបានខិតខំយកចិត្តទុកដាក់ក្នុងការអប់រំបណ្តុះបណ្តាលដល់
និស្សិតគ្រប់កម្រិត រហូតទទួលបានលទ្ធផលជាផ្លែផ្កា
ដូចដែលយើងបានឃើញនៅថ្ងៃនេះ។
ជាមួយគ្នានេះដែរ ខ្ញុំសូមអបអរសាទរ
និងមានមោទនភាពចំពោះលទ្ធផលនៃការសិក្សារបស់ក្មួយៗនិស្សិតទាំង ១៣៣៧
រូប ដែលនឹងទទួលបានសញ្ញាបត្រក្នុងពេលបន្តិចទៀតនេះ។
លទ្ធផលនេះមិនមែនត្រឹមតែជាជោគជ័យរបស់ក្មួយៗផ្ទាល់ប៉ុណ្ណោះទេ
ប៉ុន្តែក៏ជាការសបញ្ជាក់ឲ្យឃើញយ៉ាងច្បាស់អំពីជោគជ័យក្នុងវិស័យ
អប់រំជាតិទាំងមូលផងដែរ ព្រោះថា
ជោគជ័យរបស់ក្មួយៗពិតជាបានរួមចំណែកដល់ការបង្កើននូវបរិមាណ
និងគុណភាពធនធានមនុស្ស។ ខ្ញុំមានជំនឿថា
ក្មួយៗជ័យលាភីទាំងអស់គឺជាបញ្ញាជនប្រកបដោយជំនាញ ចំណេះដឹង
និងចំណេះធ្វើ ព្រមទាំងមានការទទួលខុសត្រូវ សីលធម៌ល្អប្រពៃ
និងវិចារណញ្ញាណស្នេហាជាតិដ៏ពិតប្រាកដ
ដែលជាកម្លាំងស្នូលសម្រាប់បុព្វហេតុអភិវឌ្ឍន៍សង្គមជាតិយើង។
ឯកឧត្តម លោកជំទាវ អស់លោក លោកស្រី និងក្មួយៗនិស្សិតទាំងអស់
ចាប់តាំងពីក្រោយថ្ងៃរំដោះ ៧ មករា ១៩៧៩ រហូតមកដល់បច្ចុប្បន្ននេះ
ហេដ្ឋារចនាសម្ព័ន្ធ សេដ្ឋកិច្ចនិងសង្គមកិច្ច
ដែលទទួលរងនូវការបំផ្លិចបំផ្លាញស្ទើរតែទាំងស្រុង
ក្នុងរបបប្រល័យពូជសាសន៍ ប៉ុល ពត ត្រូវបានស្តារ កសាង និងអភិវឌ្ឍ
ឲ្យមានការរីកចម្រើនជាលំដាប់។ ចំពោះវិស័យអប់រំ
រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ជានិច្ច
កាលតែងយកចិត្តទុកដាក់ខ្ពស់ ទាំងផ្នែកបរិមាណ
និងការកែលម្អគុណភាពអប់រំ ដើម្បីផ្តល់ឲ្យសិស្ស និស្សិត នូវចំណេះដឹង
និងកាលានុវត្តភាពក្នុងការទទួលបានមុខជំនាញផ្សេងៗ
សម្រាប់អនាគតដ៏ប្រសើររបស់សិស្ស
និស្សិតខ្លួនឯងផងនិងរបស់ប្រទេសជាតិផង។
រាជរដ្ឋាភិបាលខិតខំបង្កលក្ខណៈសម្បត្តិ
និងបង្កើនលទ្ធភាពឲ្យប្រជាពលរដ្ឋទទួលបាននូវការអប់រំ
និងការបណ្តុះបណ្តាលប្រកបដោយសមធម៌ ទៅតាមទិសដៅ ការអប់រំទាំងអស់គ្នា
(Education for All ) ជាពិសេស
មានឱកាសទទួលបាននូវការអប់រំជាមូលដ្ឋានរយៈពេល៩ឆ្នាំ
ដែលជាកត្តាដ៏មានសារៈសំខាន់មួយ
ជួយលើកស្ទួយដល់គ្រួសារក្រីក្រឲ្យឆ្លងផុតពីគំនាបនៃភាពក្រីក្រ
និងរស់នៅប្រកបដោយសុខុមាលភាពនៅក្នុងសង្គម។ លើសពីនេះ
ការចាត់ទុកវិស័យអប់រំជាវិស័យអាទិភាពមួយយ៉ាងសំខាន់
នៅក្នុងយុទ្ធសាស្រ្តចតុកោណដំណាក់កាលទី២ ក៏ដូចជា
នៅក្នុងផែនការយុទ្ធសាស្រ្តអភិវឌ្ឍន៍ជាតិបច្ចុប្បន្នកម្ម ២០០៩-២០១៣
គឺជាសក្ខីភាពបង្ហាញឲ្យឃើញយ៉ាងប្រត្យក្សអំពីការយកចិត្តទុកដាក់
របស់រាជរដ្ឋាភិបាល។
ជាមួយគ្នានេះដែរ
ការដាក់ចេញនូវគោលនយោបាយសេរីភាវូបនីយកម្មលើវិស័យអប់រំ
និងការលើកទឹកចិត្តរបស់រាជរដ្ឋាភិបាល
ដល់គ្រឹះស្ថានសិក្សាគ្រប់កម្រិតទាំងសាធារណៈនិងឯកជនឱ្យខិតខំ
ប្រឹងប្រែងយកអស់លទ្ធភាព
និងសមត្ថភាពរបស់ខ្លួនក្នុងការបណ្តុះបណ្តាលធនធានមនុស្សប្រកបដោយគុណ
វុឌ្ឍិ និងសីលធម៌វិជ្ជាជីវៈ សំដៅកសាងមូលធនបញ្ញា (Intellectual
Capital) ដើម្បីឆ្លើយតបទៅនឹងតម្រូវការទីផ្សារ ការងារ
កំពុងផ្តល់នូវឥទ្ធិពលជាវិជ្ជមានមកលើសង្គមកម្ពុជា
តាមរយៈការជំរុញឲ្យមានការប្រកួតប្រជែងកាន់
តែខ្លាំងលើគុណភាពនៃការផ្តល់សេវាអប់រំរវាងបណ្តាគ្រឹះស្ថានសិក្សានៅ
កម្ពុជា។
ឯកឧត្តម លោកជំទាវ អស់លោក លោកស្រី និងក្មួយៗនិស្សិតទាំងអស់
តាមរយៈកិច្ចខិតខំប្រឹងប្រែងរបស់រាជរដ្ឋាភិបាល
ដោយមានការចូលរួមសហការពីសំណាក់ដៃគូអភិវឌ្ឍន៍នានា និងវិស័យឯកជន
វិស័យអប់រំនាពេលបច្ចុប្បន្នទទួលបាននូវការរីកចម្រើនទៅមុខគួរឲ្យ
កត់សម្គាល់ ជាពិសេស វិស័យអប់រំថ្នាក់ឧត្តមសិក្សា
និងក្រោយឧត្តមសិក្សា។ ប៉ុន្តែទោះបីជាយ៉ាងនេះក្តី
យើងកត់សម្គាល់ឃើញថា ការកើនឡើងនូវចំនួនគ្រឹះស្ថានឧត្តមសិក្សា
ក៏នៅតែពុំទាន់ឆ្លើយតបទៅនឹងតម្រូវការជាក់ស្តែងនៅឡើយ
ហើយក៏ពុំទាន់ធានាបាននូវគុណភាពអប់រំដូចបណ្តាសាកលវិទ្យាល័យនាំមុខ
មួយចំនួននៅក្នុងសកលលោកដែរ។ លើសពីនេះ
ស្ថិតក្នុងចរន្តសកលភាវូបនីយកម្ម
និងការវិវត្តឥតឈប់ឈររបស់បច្ចេកវិទ្យា និងវិទ្យាសាស្រ្ត
កម្ពុជាត្រូវប្រឈមនឹងការលំបាកជាច្រើនទៀតក្នុងការធានានូវ
និរន្តរភាពនៃគុណភាពអប់រំ
ក៏ដូចជាធានាឱ្យបាននូវទីផ្សារការងារសម្រាប់ក្មួយៗដែលទើបនឹងបញ្ចប់
ការសិក្សា។
ក្រៅពីនេះ ភាពមិនស៊ីចង្វាក់គ្នារវាងសកម្មភាពអប់រំបណ្តុះបណ្តាល
និងតម្រូវការជាក់ស្តែងរបស់ទីផ្សារពលកម្ម
ក៏ជាក្តីកង្វល់មួយទៀតរបស់រាជរដ្ឋាភិបាល។ នាពេលបច្ចុប្បន្ននេះ
ខ្ញុំយល់ថាការបណ្តុះបណ្តាលលើជំនាញគ្រប់គ្រង នីតិសាស្រ្ត សេដ្ឋកិច្ច
គណនេយ្យ ធនាគារ ទេសចរណ៍ និងបដិសណ្ឋារកិច្ច
ហាក់បីដូចជាមានសកម្មភាពច្រើនលើសពីតម្រូវការនៅក្នុងទីផ្សារពលកម្ម។
គ្រប់គ្រឹះស្ថានអប់រំ
និងបណ្តុះបណ្តាលគួរយកចិត្តទុកដាក់បន្ថែមលើការបណ្តុះបណ្តាលផ្នែក
បចេ្ចកទេសវិទ្យាសាស្ត្រ ជាអាទិ៍ វិស័យកសិកម្ម វិស្វកម្ម យន្តសាស្រ្ត
អេឡិចត្រូនិច សហគ្រាសធុនតូច-មធ្យម ជាដើម
ដែលសុទ្ធតែជាប្រភេទជំនាញដែលទីផ្សារពលកម្មកំពុងត្រូវការនាពេល
បច្ចុប្បន្ន និងទៅអនាគត។
ក្នុងន័យនេះ
ក្នុងនាមខ្ញុំជាប្រធានគណៈកម្មាធិការទទួលស្គាល់គុណភាពអប់រំ
នៃកម្ពុជា និងគណៈកម្មាធិការជាតិបណ្តុះបណ្តាល
ខ្ញុំសូមអំពាវនាវដល់គ្រប់សាកលវិទ្យាល័យ
និងគ្រឹះស្ថានអប់រំបណ្តុះបណ្តាលវិជ្ជាជីវៈទាំងអស់
ត្រូវគិតគូរឲ្យបានខ្លាំងក្លាដល់ការបន្តជំរុញសកម្មភាពបណ្តុះបណ្តាល
របស់ខ្លួន
ឲ្យមានលក្ខណៈកាន់តែឆ្លើយតបទៅនឹងតម្រូវការជាក់ស្តែងនៅលើទីផ្សារ
ពលកម្ម ជាពិសេស ជំរុញសកម្មភាពស្រាវជ្រាវឲ្យបានស៊ីជំរៅ
ដោយតម្រូវឱ្យសិស្ស
និស្សិតគ្រប់រូបចំណាយពេលវេលាអោយបានកាន់តែច្រើនសម្រាប់រៀនសូត្រ
ហើយត្រូវយកគុណភាពជាអាទិភាព គោរពតាមគោលការណ៍អប់រំ
និងលិខិតបទដ្ឋានគតិយុត្តិនានា ដូចជា ច្បាប់ស្តីការអប់រំ
ក្របខ័ណ្ឌគុណវុឌ្ឍិជាតិ ស្តង់ដាគុណភាពអប្បបរមា ស្តង់ដាជាតិសមត្ថភាព
និងស្តង់ដាជាតិមុខរបរ ។ល។
ទន្ទឹមនេះផងដែរ
ការសិក្សារបស់និស្សិតទៀតសោតត្រូវតែផ្សារភ្ជាប់ទៅនឹងការអនុវត្តជាក់
ស្តែង រួមផ្សំនឹងសិល្បៈ និងកីឡាផងដែរ។
ដូច្នេះគ្រប់គ្រឹះស្ថានឧត្តមសិក្សាទាំងអស់ត្រូវយកចិត្តទុកដាក់ដល់
ការបង្កើតឲ្យមានការចុះសិក្សាអនុវត្តតាមរោងចក្រ សហគ្រាស កសិដ្ឋាន
ស្រែចំការ រមណីយដ្ឋាន អាហារដ្ឋាន ធនាគារ សណ្ឋាគារ និងមជ្ឈមណ្ឌលវប្បធម៌
ហើយត្រូវបង្កើតឲ្យមានជាការសម្តែងសិល្បៈ
ឬការប្រកួតកីឡាដើម្បីធ្វើឲ្យនិសិ្សតយល់ដឹង
និងមានស្មារតីរីករាយក្នុងការសិក្សា
ហើយការអប់រំបណ្តុះបណ្តាលមិនត្រឹមតែសំដៅទៅលើចំណេះដឹង
និងសមត្ថភាពជំនាញបច្ចេកទេសប៉ុណ្ណោះទេ
ប៉ុន្តែចាំបាច់ត្រូវតែផ្សារភ្ជាប់ទៅនឹងសីលធម៌ គុណធម៌
ការបញ្ជ្រាបនូវវប្បធម៌ និងអរិយធម៌
សំដៅថែរក្សាឲ្យបាននូវអត្តសញ្ញាណជាតិផងដែរ។
ឯកឧត្តម លោកជំទាវ អស់លោក លោកស្រី និងក្មួយៗនិស្សិតទាំងអស់
វិស័យអប់រំនិងបណ្តុះបណ្តាលវិជ្ជាជីវៈនៅកម្ពុជា
គឺពិតជាត្រូវការចាំបាច់ណាស់នូវកិច្ចសហប្រតិបត្តិការ
និងការជួយឧបត្ថម្ភគាំទ្រពីសហគមន៍ជាតិនិងអន្តរជាតិ ជាពិសេស
វិស័យឯកជន និងដៃគូអភិវឌ្ឍន៍ទំាងអស់។ ឆ្លៀតឱកាសនេះ
ខ្ញុំសូមអំពាវនាវដល់អង្គការជាតិនិងអន្តរជាតិ
ក៏ដូចជាបណ្តាប្រទេសជាដៃគូរអភិវឌ្ឍន៍ទាំងអស់ ជាពិសេស វិស័យឯកជន
សូមបន្តការគាំទ្របន្ថែមទៀត
ដើម្បីលើកកម្ពស់វិស័យអប់រំឲ្យកាន់តែរីកចម្រើនឡើង
និងឆ្លើយតបទៅនឹងតម្រូវការជាក់ស្តែងរបស់ប្រទេស។
មុននឹងបញ្ចប់
ខ្ញុំសូមយកឱកាសនេះរំលឹកជាថ្មីម្តងទៀតដល់គ្រប់សាកលវិទ្យាល័យ
និងគ្រឹះស្ថានអប់រំបណ្តុះបណ្តាលទាំងអស់ ទាំងផ្នែកសាធារណៈ និងឯកជន
ធ្វើយ៉ាងណាធានាឲ្យបាននូវគុណភាពនៃការអប់រំបណ្តុះបណ្តាល
របស់ខ្លួន ដើម្បីធ្វើឲ្យសិស្សនិសិ្សតទទួលបាននូវចំណេះដឹងពិតប្រាកដ
និងមានសមត្ថភាពគ្រប់គ្រាន់ ឈានឆ្ពោះទៅរកការលើកតម្លៃសញ្ញាបត្រ
និងទទួលបានជាបណ្តើរៗនូវការទទួលស្គាល់ជា អន្តរជាតិ។
ជាមួយគ្នានេះដែរ
ខ្ញុំសូមផ្តាំផ្ញើដល់ក្មួយៗនិស្សិតជ័យលាភីទាំងអស់
ក្នុងនាមក្មួយៗជាទំពាំង ស្នងឬស្សី ចូរក្មួយៗយកសមត្ថភាព
និងចំណេះដឹងដែលក្មួយៗមាន ទៅប្រើប្រាស់ឲ្យអស់លទ្ធភាព
និងបង្កើនតម្លៃក្នុងការរួមចំណែកការពារ
និងកសាងមាតុភូមិជាទីស្នេហារបស់យើង។
សូមក្មួយៗបន្តការសិក្សាស្រាវជ្រាវ ហើយត្រូវចាត់ទុកថា ការរៀនសូត្រ
គឺជាដំណើរការមួយដែលមិនចេះចប់ ដើម្បីដុសខាត់ចំណេះដឹង និង
ចំណេះធ្វើរបស់ខ្លួនម្នាក់ៗឲ្យកាន់តែប្រសើរថែមទៀត។
ខ្ញុំសូមសម្តែងនូវការអបអរសាទរជាថ្មីចំពោះនិស្សិតដែលជាជ័យលាភីទាំង
អស់ និងសូមសម្តែងនូវការកោតសរសើចំពោះសាកលវិទ្យាល័យបៀលប្រាយ
ជាពិសេសសាខាខេត្តតាកែវ ដែលទទួលបានលទ្ធផល គួរជាទីមោទនៈ
ក្នុងការចូលរួមអភិវឌ្ឍធនធានមនុស្សនៅកម្ពុជា
ប្រកបដោយស្មារតីទទួលខុសត្រូវខ្ពស់ ស្របទៅតាមចតុស្តម្ភអប់រំ
ពោលគឺអប់រំឲ្យមានចំណេះដឹង ចំណេះធ្វើ សីលធម៌ល្អ និងឲ្យចេះរួមរស់ជាមួយគ្នា ប្រកបដោយសុខដុមរមនា ។
ជាទីបញ្ចប់ ខ្ញុំសូមជូនពរ ឯកឧត្តម លោកជំទាវ អស់លោក លោកស្រី
ភ្ញៀវកិត្តិយស សាស្រ្តាចារ្យ ក្មួយៗនិស្សិតទាំងអស់
សូមប្រកបតែនឹងសុខភាពល្អ ជោគជ័យក្នុងការងារ
និងមានសុភមង្គលនៅក្នុងគ្រួសារ។