ឯកឧត្តម
Joe NAKANO អនុរដ្ឋមន្ត្រីការបរទេសជប៉ុន បានសម្តែង
នូវកី្តរំភើបពេលដែលឃើញព្រះរាជាណាចក្រកម្ពុជាមានស្ថិរភាព
នយោបាយ មានសក្តានុពលខាងសេដ្ឋកិច្ចខ្ពស់។
ឯកឧត្តម អ៊ាង សុផល្លែត ជំនួយការសម្តេចនាយករដ្ឋមន្ត្រី បានឲ្យដឹងថា ក្នុងឱកាសចូលជួបសម្តែងការគួរសម ចំពោះ សម្តេចអគ្គមហាសេនាបតីតេជោ ហ៊ុន សែន ថ្ងៃទី ០៤ ខែ ឧសភា ឆ្នាំ ២០១២ នៅវិមានសន្តិភាព នៃទីស្តីការគណៈរដ្ឋមន្ត្រី ឯកឧត្តម Joe NAKANO បានជម្រាបជូនសម្តេចតេជោថា
លោកធ្លាប់បានមក ធ្វើការនៅក្នុងព្រះរាជាណាចក្រកម្ពុជា
ដោយបម្រើឲ្យអង្គការក្រៅរដ្ឋាភិបាល ហើយនៅក្នុងឆ្នាំ១៩៩៧
មានព្រឹត្តិការណ៍កើតឡើងនៅក្នុងទីក្រុងភ្នំពេញនោះ
លោកក៏ស្ថិតនៅទីនេះដែរ។នៅឆ្នាំ ១៩៩៩
ទើបលោកឈប់ធ្វើការឲ្យអង្គការក្រៅរដ្ឋាភិបាល
ហើយបានចាប់ផ្តើមចូលទៅបម្រើការងារនយោបាយ វិញនៅឆ្នាំ ២០០៥។
ក្នុងពេលបំពេញទស្សនៈកិច្ចនៅប្រទេសកម្ពុជា
លោកមានកី្តរំភើបពេលដែលឃើញព្រះរាជាណាចក្រកម្ពុជាមានស្ថិរភាព
នយោបាយ មានសក្តានុពលខាងសេដ្ឋកិច្ចខ្ពស់ ហើយនៅរយៈពេលទស្សនកិច្ចនេះ
លោកក៏បានធ្វើដំណើរទៅកាន់តំបន់សេដ្ឋកិច្ចពិសេស
ដែលកំពុងតែមានសកម្មភាពយ៉ាងសកម្មរួមទាំងរាជធានីភ្នំពេញផងដែរ
ដែលទាំងនេះឆ្លុះបញ្ចាំងអំពីការដឹកនាំដ៏ឈ្លាសវៃ របស់សម្តេចតេជោនាយករដ្ឋមន្ត្រី។
ឯកឧត្តមជំនួយការថ្លែងថា សម្តេចតេជោនាយករដ្ឋមន្ត្រី បាន
ថ្លែងអំណរគុណចំពោះឯកឧត្តម Joe NAKANO ក៏ដូចជារាជរដ្ឋាភិបាល
និងប្រជាជនជប៉ុន ដែលកន្លងមកតែងតែជួយយកចិត្តទុកដាក់
ផ្តល់ជំនួយដល់កម្ពុជាឈានឆ្ពោះមកដល់ការអភិវឌ្ឍ។សម្តេចនាយករដ្ឋមន្ត្រីក៏បាន
សម្តែងនូវការកោតសរសើរចំពោះការរៀបចំកិច្ចប្រជុំកំពូលមេគង្គ-ជប៉ុន
កន្លងមក ដោយសម្តេចបានបញ្ជាក់ថា ជោគជ័យ
របស់អាស៊ានគឺស្ថិតនៅលើសមាហរណកម្មអាស៊ាន
ហើយជប៉ុនបានជួយដល់កម្ពុជាជាយុទ្ធសាស្ត្រ តែម្តង
ជាពិសេសស្ពានអ្នកលឿងគឺជាការតភ្ជាប់រវាងរបៀងខាងត្បូងទាំងស្រុង
នៅពេលដែល អាស៊ានក្លាយទៅជាសហគមន៍តែមួយ៕