ភ្នំពេញ: ក្រសួងការបរទេស និងសហប្រតិបត្តិការអន្តរជាតិ បានប្រកាសថា តាមការអញ្ជើញរបស់លោក ង្វៀន តាន់យុង ( Nguyen Tan Dung ) នាយករដ្ឋមន្ត្រីនៃសាធារណរដ្ឋសង្គមនិយមវៀតណាម សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នឹងដឹកនាំគណៈប្រតិភូជាន់ខ្ពស់អញ្ជើញចូលរួមកិច្ចប្រជុំកំពូល កម្ពុជា ឡាវ និងវៀតណាម ( CLV ) លើកទី៧ ស្តីពីការអភិវឌ្ឍតំបន់ត្រីកោណ ដែលនឹងប្រព្រឹត្តទៅពីថ្ងៃទី១៩ ដល់ថ្ងៃទី២០ ខែតុលា ឆ្នាំ២០១២ នៅទីក្រុងហូជីមិញ សាធារណរដ្ឋសង្គមនិយមវៀតណាម។
សេចក្តីជូនព័ត៌មាន ចុះថ្ងៃទី១២ ខែតុលា ឆ្នាំ២០១២ របស់ក្រសួងការបរទេស បង្ហាញថា គណៈប្រតិភូដែលនឹងអមដំណើរសម្តេច ហ៊ុន សែន ទៅកាន់តុប្រជុំ នៅទីក្រុងហូជីមិញ រួមមាន៖ លោកទេសរដ្ឋមន្ត្រី ចម ប្រសិទ្ធ រដ្ឋមន្ត្រីក្រសួងពាណិជ្ជកម្ម និងសមាជិកនៃរាជរដ្ឋភិបាលកម្ពុជាដទៃទៀត។
សេចក្តីជូនព័ត៌មានដដែល បានគូសបញ្ជាក់ថា នៅចុងបញ្ចប់នៃកិច្ចប្រជុំកំពូលនេះ នាយករដ្ឋមន្ត្រីកម្ពុជា ឡាវ និងវៀតណាម នឹងចុះហត្ថលេខាលើសេចក្តីថ្លែងការណ៍រួម។
សូមរម្លឹកថា តំបន់ត្រីកោណកម្ពុជា-ឡាវ-វៀតណាម ត្រូវបានបង្កើតឡើងតាមគំនិតផ្តួចផ្តើមរបស់នាយករដ្ឋមន្ត្រីនៃប្រទេសកម្ពុជា-ឡាវ-វៀតណាម កាលពីឆ្នាំ១៩៩៩ នៅក្នុងកិច្ចប្រជុំកំពូល នាទីក្រុងវៀងចន្ទន៍ ប្រទេសឡាវ។
តំបន់អភិវឌ្ឍន៍ត្រីកោណ កម្ពុជា វៀតណាម និងឡាវ ដើមឡើយគ្របដណ្តប់លើខេត្តចំនួន ១០ គឺខេត្តស្ទឹងត្រែង រតនគិរី និងខេត្តមណ្ឌលគិរី (កម្ពុជា) ព្រមទាំងខេត្តអាតាពី ខេត្តសារ៉ាវ៉ាន់ ខេត្តសេកុង (ឡាវ) និងខេត្តដាក់ឡាក់ ខេត្តដាក់ណុង ខេត្តកុនទុំ ខេត្តយ៉ាឡាក់ (វៀតណាម)។ ក៏ប៉ុន្តែបន្ទាប់មក នាយករដ្ឋមន្ត្រីនៃប្រទេសទាំងបី បានឯកភាពគ្នាដាក់បញ្ចូលខេត្តចំនួនបីទៀត រួមមាន៖ ខេត្តក្រចេះ (កម្ពុជា) ខេត្តចម្ប៉ាសាក់ (ឡាវ) និងខេត្តបិញភៀក (វៀតណាម)។
ឯកសារគោលដែលប្រើប្រាស់ការអភិវឌ្ឍរួមគ្នារវាងប្រទេសទាំងបី គឺផែនការមេស្តីពី ការអភិវឌ្ឍសេដ្ឋកិច្ចសង្គម សម្រាប់តំបន់ត្រីកោណអភិវឌ្ឍន៍កម្ពុជា-ឡាវ-វៀតណាម ដែលបានអនុម័តដោយនាយករដ្ឋមន្ត្រីនៃប្រទេសទាំងបី កាលពីឆ្នាំ២០០៤ នាកិច្ចប្រជុំកំពូលនៅទីក្រុងវៀងចន្ទន៍ ប្រទេសឡាវ ក្នុងគោលបំណងអភិវឌ្ឍន៍ផែនការមេស្តីពី ស្ថានភាពសេដ្ឋកិច្ច សង្គម ធនធាន សក្តានុពល ព្រមទាំងរចនាសម្ព័ន្ធ និងយន្តការសម្រាប់សម្របសម្រួលការអភិវឌ្ឍរួម និងដោយឡែកៗរបស់ប្រទេសទាំងបីកម្ពុជា-ឡាវ-វៀតណាម។
ឯកសារបានបង្ហាញថា ការអភិវឌ្ឍតំបន់ត្រីកោណកម្ពុជា-ឡាវ-វៀតណាម ត្រូវបានប្រទេសជប៉ុនសម្រេចផ្តល់ជំនួយក្នុងទឹកប្រាក់ចំនួន ២០ លានដុល្លារសហរដ្ឋអាមេរិក។ ក្នុងនោះប្រទេសកម្ពុជាទទួលបានចំនួន ៧,៥ លានដុល្លារសហរដ្ឋអាមេរិក ប្រទេសឡាវទទួលបានចំនួន ៧,៥ លានដុល្លារសហរដ្ឋអាមេរិក និងប្រទេសវៀតណាម ទទួលបានចំនួន ៣,៥ លានដុល្លារសហរដ្ឋអាមេរិក។ រីឯទឹកប្រាក់ចំនួន ១,៥ លានដុល្លារសហរដ្ឋអាមេរិក សម្រាប់សិក្សាស្រាវជ្រាវរួមទាំងបីប្រទេស ធ្វើឲ្យប្រសើរឡើងនូវផ្លូវគមនាគមន៍ ក្នុងតំបន់ត្រីកោណ។
ក្នុងពេលកន្លងមក ប្រទេសកម្ពុជាបានអនុវត្តន៍គម្រោងចំនួន ៤ រួចហើយ គឺ៖
១-គម្រោងសាងសង់ផ្លូវក្រួសក្រហម និងស្ពានពីអូតាឡាស់ ទៅសុភ័ក្រមិត្ត ក្នុងឃុំរំកិល ខេត្តស្ទឹងត្រែង។ គម្រោងនោះអនុវត្តន៍ដោយក្រសួងអភិវឌ្ឍន៍ជនបទ។
២-គម្រោងសាងសង់អន្តេវាសិកដ្ឋាន សម្រាប់វគ្គបំពាក់បំប៉នគ្រូបង្រៀន អនុវត្តន៍ដោយក្រសួងអប់រំ យុវជននិងកីឡា។
៣-គម្រោងសាងសង់ផ្លូវក្រួសក្រហម ពីទីក្រុងបានលុង ទៅស្រុកលំផាត់ ប្រវែង ១៩ គីឡូម៉ែត្រ ទទឹង ៦ម៉ែត្រ អនុវត្តន៍ដោយក្រសួងអភិវឌ្ឍន៍ជនបទ។
៤-គម្រោងធ្វើឲ្យប្រសើរឡើងនូវសាលាបឋមសិក្សាក្នុងខេត្តទាំងបី នៃតំបន់ត្រីកោណ មាន ៥សាលា សាងសង់ដោយក្រសួងអប់រំ យុវជន និងកីឡា៕