ភ្នំពេញ: គណៈកម្មាធិការជាតិរៀបចំការបោះឆ្នោត ហៅកាត់ គ.ជ.ប. នៅថ្ងៃទី១២ ខែតុលា ឆ្នាំ២០១២ បានប្រកាសនូវលទ្ធផលបណ្តោះអាសន្ននៃការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០១២។ ក្នុងនោះ គ.ជ.ប. ក៏បានប្រកាសពីការសម្រេចពន្យារពេលមួយថ្ងៃបន្ថែមទៀត សម្រាប់ពិនិត្យ និងចុះឈ្មោះអ្នកបោះឆ្នោត នៅក្នុង ៣៨៣ ឃុំ-សង្កាត់ ដោយសារទឹកជំនន់។
លោក ឯម សូផាត សមាជិក គ.ជ.ប. បានមានប្រសាសន៍នៅក្នុងកិច្ចប្រជុំរវាងគ.ជ.ប. ជាមួយតំណាងគណបក្សនយោបាយ និងអង្គការសង្គមស៊ីវិល កាលពីព្រឹកថ្ងៃទី១២ ខែតុលា ឆ្នាំ២០១២ ថា ការចុះឈ្មោះ និងពិនិត្យបញ្ជីឈ្មោះបោះឆ្នោត ដែលបានដំណើរការពីថ្ងៃទី១កញ្ញា ដល់ថ្ងៃទី១១ ខែតុលានេះ គឺបញ្ជីឈ្មោះអ្នកបោះឆ្នោត មានគុណភាពល្អប្រសើរ ដែលអាចប្រើប្រាស់បាន នៅក្នុងការបោះឆ្នោតជ្រើងតាំងសមាជិកសភាអាណត្តិទី៥ នៅខែកក្កដា ឆ្នាំ២០១៣ ដែលមានប្រជាពលរដ្ឋ ត្រូវទៅបោះឆ្នោត ចំនួនជាង ៩,៧ លាននាក់។
លោក ឯម សូផាត បានបញ្ជាក់បន្តថា លទ្ធផលនៃដំណើរការចុះឈ្មោះបោះឆ្នោត ចាប់ពីថ្ងៃទី១កញ្ញា ដល់ថ្ងៃទី១១ ខែតុលានេះ គឺបញ្ជីឈ្មោះអ្នកបោះឆ្នោតនៅទូទាំងប្រទេស ក្នុង ១.៦៣៣ ឃុំសង្កាត់ គឺមានប្រជាពលរដ្ឋអាយុចាប់ពី ១៨ ឆ្នាំឡើងទៅ ដែលបានមកចុះឈ្មោះថ្មី មានចំនួន ៨៣៣.៦២២ នាក់។ ក្នុងនោះ គ.ជ.ប. ក៏បានកែតម្រូវឈ្មោះ មានចំនួន ៧៩.៩៥០ នាក់ និងបានលុបឈ្មោះចេញពីបញ្ជី មានចំនួន ៣៤៦.៦៦៨ នាក់។ ចំណែកអ្នកដែលគ្រប់អាយុចុះឈ្មោះបោះឆ្នោតថ្មី ដែល គ.ជ.ប. បានប៉ាន់ស្មានកន្លងមក មានត្រឹមតែ ៦១៩.៦៣០ នាក់ប៉ុណ្ណោះ។
លោក ឯម សូផាន បានបន្តថា ការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០១២ ត្រូវបានបញ្ចប់នៅថ្ងៃទី១២ ខែតុលា ឆ្នាំ២០១២ ប៉ុន្តែដោយកន្លងមក មានស្ថានភាពទឹកជំនន់ នៅតាមបណ្តាខេត្តក្រុងមួយចំនួននោះ ទើប គ.ជ.ប. បានអនុញ្ញាតឲ្យមានការពន្យារពេលចុះឈ្មោះ ចំនួន ១ថ្ងៃទៀត គឺនៅថ្ងៃទី១៣ ខែតុលា ឆ្នាំ២០១២ ក្នុងចំណោមឃុំសង្កាត់ចំនួន ៣៨៣ ឃុំសង្កាត់។
ជាមួយគ្នានោះ លោក ឯម សូផាត បានបន្ថែមថា គ.ជ.ប. ទុករយៈពេល ១០ថ្ងៃ សម្រាប់ឲ្យប្រជាពលរដ្ឋប្តឹងតវ៉ាផ្ទាល់មាត់ បន្ទាប់ពីបិទបញ្ជីឈ្មោះដំបូង នៅថ្ងៃទី១៩ខែតុលា ខាងមុខនេះ បន្ទាប់ពីមានបាត់ឈ្មោះ ខុសឈ្មោះ ខុសការិយាល័យ ឬមានឈ្មោះស្ទួន ជាដើម។
លោក ឯម សូផាត មានប្រសាសន៍បន្តថា ដំណើរការនៃការការពិនិត្យបញ្ជីឈ្មោះនិងការចុះឈ្មោះបោះឆ្នោតឆ្នាំ២០១២នេះ គឺពុំមានបណ្តឹងតវ៉ាពីសំណាក់ប្រជាពលរដ្ឋទេ ដោយសារតែ គ.ជ.ប. មានកិច្ចសហការបានល្អជាមួយអង្គការមិនមែនរដ្ឋាភិបាល អាជ្ញាធរមូលដ្ឋាន និងស្ថាប័នរដ្ឋ-ឯកជន ក្នុងការចូលរួមជំរុញប្រជាពលរដ្ឋឲ្យទៅពិនិត្យបញ្ជី និងចុះឈ្មោះបោះឆ្នោត។ ជាមួយគ្នានោះដែរ ស្មៀនឃុំសង្កាត់ ក៏បានជួយណែនាំប្រជាពលរដ្ឋ ដែលខ្វះឯកសារ ឲ្យទៅស្វែងរកឯកសារបន្ថែម ដើម្បីបានចុះឈ្មោះបោះឆ្នោត ដោយគ្មានការបដិសេធពីសំណាក់ស្មៀនឃុំសង្កាត់ឡើយ។
លោក ឯម សូផាត បានមានប្រសាសន៍បញ្ជាក់ដែរថា ការធ្វើពហិការបស់គណបក្សនយោបាយចំនួនពីរ ( គណបក្សសមរង្ស៊ី និងសិទ្ធិមនុស្ស ) ក្នុងការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០១២ គឺមិនបានប៉ះពាល់ដល់គុណភាពនៃបញ្ជីឈ្មោះអ្នកបោះឆ្នោត សម្រាប់ជ្រើសតាំងសមាជិកសភា នៅឆ្នាំ២០១៣ ឡើយ។
ជាមួយគ្នានោះដែរ សមាជិក គ.ជ.ប. ដែលទើបជាប់ឆ្នោតបន្តការងារ ៥ ឆ្នាំ បន្តជាថ្មីនេះ ក៏បានបដិសេធច្រានចោលនូវរបាយការណ៍របស់អង្គការខុមហ្វ្រែល ដែលបានលើកឡើងថា មានប្រជាពលរដ្ឋចំនួនយ៉ាងតិច ១,៥ លាននាក់ មិនបានចុះឈ្មោះបោះឆ្នោតនោះ ជាការមិនពិត ដោយលោកថា ជាការធ្វើសវនកម្មគ្មានវិជ្ជាជីវៈទេ ហើយគួរតែអង្គការនេះ មកសហការជាមួយនឹងគណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប. ដើម្បីចៀសវាងធ្វើរបាយការណ៍ គ្មានការពិតបែបនេះ។
លោក ឯម សូផាត បានបញ្ជាក់ថា នៅក្នុងការបោះឆ្នោត ឆ្នាំ២០១៣ ខាងមុខ នឹងមានគណបក្សនយោបាយច្រើន ចូលរួប្រកួតប្រជែង រួមទាំងគណបក្សប្រឆាំងផងដែរ ពីព្រោះគណបក្សនោះ គេកំពុងរៀបចំខ្លួនដើម្បីចូលរួមប្រកួតប្រជែងក្នុងការបោះឆ្នោតខាងមុខនោះ ហើយចំនួនប្រជាពលរដ្ឋ នឹងទៅចូលរួមបោះឆ្នោត មានចំនួនច្រើនជាងការបោះឆ្នោតក្រុមប្រឹក្សាឃុំសង្កាត់នៅឆ្នាំ២០១២ កន្លងមក៕