ក្នុងឱកាសទទួលសវនាការជាមួយឯកឧត្តម ហ្វាឌីឡាហ ប៊ីន សាអ៊ីតហាជីអាម៉ាត់ (Shaikh Haji Fadilah Bin Shaikh Haji Ahmad) ឯកអគ្គរាជទូតប្រ៊ុយណេថ្មីប្រចាំនៅកម្ពុជា នារសៀលថ្ងៃទី១១ តុលា ២០១២ នៅវិមានសន្តិភាព សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានសម្តែងនូវជំនឿយ៉ាងមុតមាំថា ព្រះចៅស៊ុលតង់ប្រ៊ុយណេ នឹងយាងមកចូលរួមក្នុងកិច្ចប្រជុំកំពូលអាស៊ានលើកទី២១ និងកិច្ចប្រជុំពាក់ព័ន្ធដទៃទៀតដែលកម្ពុជាធ្វើជាម្ចាស់ផ្ទះ និងដើម្បីទទួលតំណែងធ្វើជាប្រធានអាស៊ាន បន្ទាប់ពីកម្ពុជា ។ជាមួយនិងការថ្លែងនូវអំណរគុណចំពោះប្រទេស ប្រ៊ុយណេដែលបានសន្យាគាំទ្របេក្ខភាពដល់ប្រទេសកម្ពុជាជាសមាជិក មិនអចិន្ត្រៃយ៍របស់ក្រុមប្រឹក្សាសន្តិសុខអង្គការសហប្រជា ជាតិសម្រាប់អាណត្តិឆ្នាំ២០១៣-២០១៤ ដែលការបោះឆ្នោតប្រព្រឹត្តទៅនៅថ្ងៃទី១៨ តុលា ឆ្នាំ២០១២ ខាងមុខនេះសម្តេចតេជោ នាយករដ្ឋមន្រ្តីបាន អបអរសាទរចំពោះ វត្តមានបេសកកម្មការទូតរបស់ឯកឧត្តម ហ្វាឌីឡាហប៊ីន សាអ៊ីតហាជីអាម៉ាត់ នៅកម្ពុជាដោយបានចាត់ទុកថានឹងធ្វើឱ្យ ទំនាក់ទំនងល្អរវាងប្រទេសទាំង២ (កម្ពុជា-ប្រ៊ុយណេ)ត្រូវបានបន្តពង្រឹងថែមទៀត ។
ឯកឧត្តម ស៊្រី ថាមរ៉ុង្គ រដ្ឋមន្រ្តី ប្រតិភូអមនាយករដ្ឋមន្រ្តីបានឱ្យដឹងថា សម្តេចតេជោបានលើកឡើងថា ប្រទេសទាំង២កម្ពុជា-ប្រ៊ុយណេមានទំនាក់ទំនង និងកិច្ចសហប្រតិបត្តិការជាមួយគ្នាយ៉ាងល្អប្រសើរខ្លាំងណាស់ ទាំងក្នុងទំនាក់ទំនងទ្វេភាគី ក៏ដូចជាទំនាក់ទំនងអន្តរជាតិដែលមានការយកចិត្តទុកដាក់ដូចគ្នា ។ តាមរយៈឯកអគ្គរាជទូតរបស់ប្រទេសប្រ៊ុយណេ សម្តេចតេជោបានមានប្រសាសន៍ថា ប្រទេសទាំង២នៅមានសក្តានុពលច្រើនទៀតដែលត្រូវតែពិនិត្យ និង អភិវឌ្ឍរួមគ្នាបន្ថែម ពិសេសលើកិច្ចព្រមព្រៀងដែលភាគីទាំង២បានចុះហត្ថលេខារួមគ្នា ហើយត្រូវរើសយកវិស័យថ្មីៗបន្ថែមទៀតដែលអាចជំរុញកិច្ចសហប្រតិបត្តិ ការជាមួយគ្នាបានទាំងក្នុងក្របខ័ណ្ឌអាស៊ាន ក៏ដូចជាក្នុងក្របខ័ណ្ឌទ្វេភាគី ។ក្នុងនោះដែរដោយសារប្រទេសប្រ៊ុយណេ មានបទពិសោធន៍ក្នុងវិស័យប្រេង និង ឧស្ម័ន សម្តេចតេជោ បានមានប្រសាសន៍ថាសម្តេចចង់ឱ្យប្រទេសប្រ៊ុយណេ បន្តជូយហ្វឺកហ្វឹនធនធានមនុស្ស ក្នុងវិស័យប្រេង និង ឧស្ម័ន ក៏ដូចជាជម្រុញឱ្យមានការនាំចេញអង្ករពីកម្ពុជាទៅកាន់ប្រទេសប្រ៊ុយណេផងដែរ។
ឯកឧត្តម ហ្វាឌីឡាហប៊ីន សាអ៊ីតហាជីអាម៉ាត់ (Shaikh Haji Fadilah Bin Shaikh Haji Ahmad) ឯកអគ្គរាជទូតប្រ៊ុយណេថ្មីប្រចាំនៅកម្ពុជា បានសន្យាថា នឹងនាំប្រសាសន៍សម្តេចតេជោ នាយករដ្ឋ មន្រ្តីទៅទ្វាយព្រះចៅ ស៊ុលតង់។
ឯកឧត្តម ឯកអគ្គរាជទូតប្រ៊ុយណេថ្មីប្រចាំនៅកម្ពុជា បានមានប្រសាសន៍បញ្ជាក់ថា នឹងខិតខំប្រឹងប្រែងឱ្យអស់ពីសមត្ថភាពដើម្បីជម្រុញកិច្ចសហប្រតិបត្តិការមិត្តភាពនិងទំនាក់ទងនងទ្វេភាគីឱ្យកាន់តែល្អប្រសើរថែមទៀត។
ដោយឡែក នារសៀលថ្ងៃទី១១ តុលា ២០១២ ដែរ សម្ដេចអគ្គមហាសេនាបតីតេជោ ហ៊ុន សែន ក៏បានអនុញ្ញាតឱ្យឯកឧត្តម គ្រីសស្ទីន កូនន់ ឯកអគ្គរដ្ឋទូតបារាំង ដែលបញ្ចប់បេសកកម្មការទូតនៅព្រះរាជជាណាចក្រ កម្ពុជា ចូលជួបសម្ដែងការ គួរសមនៅវិមានសន្ដិភាព ។
ក្នុងជំនួបនោះឯកឧត្តម គ្រីសស្ទីន កូនន់ បានមាន ប្រសាសន៍ថា បើទោះបីជាអាយុត្រូវចូល និវត្ដន៍បានមកដល់ក៏ដោយ ប៉ុន្ដែឯកឧត្តម ទើបតែបំពេញការងារបានរយៈពេល២ឆ្នាំ ប៉ុណ្ណោះនៅកម្ពុជា ។ ក្នុងរយៈពេល២ឆ្នាំ នៃបេសកកម្មឯកឧត្តមបាន ចងចាំ ជានិច្ចនូវការងារជាច្រើនដែលធ្លាប់ធ្វើ នៅកម្ពុជា។ ឯកឧត្តម គ្រីសស្ទីន កូនន់ក៏បានសម្ដែងការ សោកស្ដាយចំពោះការឆាប់ចាកចេញ បំផុតពីបេសកកម្មការទូតនៅកម្ពុជានេះផងដែរ ។
ជាមួយនិងការ ថ្លែងអំណរគុណចំពោះទំនាក់ទំនងដ៏ល្អ រវាងប្រទេសទាំង២កម្ពុជា-បារាំង សម្ដេចតេជោបានមានប្រសាសន៍ បើ ទោះបីជាប្រទេសបារាំងផ្លាស់ប្ដូរអ្នកដឹក នាំក៏ដោយ ក៏នយោបាយកុងសង់ស៊ីស នៅតែល្អនឹងគ្នា ។ សម្ដេច តេជោក៏បានថ្លែងអំណរគុណចំពោះប្រទេស បារាំង ដែលបានសន្យាគាំទ្របេក្ខភាព កម្ពុជាជាសមាជិកមិនអចិន្ដ្រៃយ៍របស់ ក្រុមប្រឹក្សាសន្ដិសុខអង្គការសហប្រជា ជាតិសម្រាប់អាណត្ដិឆ្នាំ២០១៣-២០១៤ ។ ក្នុងនោះសម្ដេចតេជោក៏បានសំណូមពរ ឱ្យបារាំងជួយអំពាវនាវដល់បណ្ដាប្រទេស និយាយភាសាបារាំង ជួយបោះឆ្នោត គាំទ្រចំពោះបេក្ខភាពប្រទេសកម្ពុជាក្នុង តួនាទីនេះផងដែរ ។
ឯកឧត្តម គ្រីសស្ទីន កូនន់ បានលើកឡើង ថា ប្រការដែលកម្ពុជាទទួលបានសុខ សន្ដិភាព និងការចូលរួមយ៉ាងសកម្មនៅ ក្នុងតួនាទីជាអន្ដរជាតិក្នុងការថែរក្សា សន្ដិភាពរបស់ពិភពលោក វាគឺជាក្ដីរីក រាយរបស់បារាំង ហើយបារាំងនឹងជួយ កៀងគរដល់បណ្ដាប្រទេសនិយាយភាសា បារាំងទាំងអស់ឱ្យគាំទ្របេក្ខភាពកម្ពុជា ជាសមាជិកមិនអចិន្ដ្រៃយ៍របស់ក្រុម ប្រឹក្សាសន្ដិសុខអង្គការសហប្រជាជាតិ ដែលនឹងបោះឆ្នោតនៅថ្ងៃទី១៨ ខែតុលា ឆ្នាំ២០១២៕